بدون مقدمات طويله انا هدخل فى الموضوع علطول ..
مبدأيا المنتدى هنا منتدى عبقرى .. وده لسببين .. ان فى ناس هنا بتفهم بجد فى العربيات وده مهم .. والسبب التانى الاهم ان الناس محترمه جدا ومحدش بيبخل بمعلومه او مساعده .. وده اللى ساعدنى أخد قرارى اللى هقوله حالا
من 3 شهور بالضبط قررت أغير عربيتى .. انا حاليا معايا أكسنت أر بى .. عمليه واعتماديه وواسعه و بتجرى .. لكن مشكلتها حاجه واحده بس خلتنى مش طايق اركبها اكتر من كده .. العفشه
هى مش مشكلتها الحقيقه هى مشكلة شوارعنا الجميله زى مانتو عارفين
عشان مطولش عليكما انا حطيت criteria واضحه لاختيار عربيتى الجديده .. أول حاجه فيها كانت العفشه طبعاااااااااااااا .. عايز عربيه مريحه فى الحفر والمطبات الجميله بتاعتنا .. تانى حاجه تكون حاجه غير الكورى لانى زهقت من التنطيط وعدم الثبات .. العربيه مش ثابته خالص وعرفت ان الالنترا والسيراتوا كمان كده
تالت حاجه العربيه يبقى فيها عوامل أمان لأنى زمان كنت لوحدى لكن دلوقتى معايا عيلة ربنا يحفظهم .. والاكسنت كانت فاضيه مفيهاش حتى اير باج واحده
رابعا واخيرا كنت عايز ادلع نفسى شويه .. عايز شوية اوبشنز .. زى ماقلتلكوا الاكسنت كانت فاضيه تماما يدوبك موتور وفتيس ودركسيون بس

وتوكلت على الله وبدأت رحلة البحث الطويل المرهق .. وبعد بحث ومقارنه استقريت على 3 عربيات واستبعدت الباقى للاسباب التاليه:
استبعدت المازدا عشان موتور وفتيس قديم وأداء مش أد كده
اللانسر شارك عشان صالون فقير شويه من جوه وهتغير شكل السنه الجايه كمان
السيفيك عشان سعرها مبالغ فيه بصراحه .. لو حطيت 10 الاف على سعرها هركب حاجه زى بيجو 508 اللى هى فئه اعلى فى كل حاجه
الامبريزا عشان شكلها مش داخل دماغى حسيتها مش شبابى خالص
الفوكس عشان ضيقه جدااااا .. عربيه وهميه فى كل حاجه لكن لو ركبتها 5 دقايق هتتخنق من المساحه الضيقه سواء ورا او قدام
السكودا عشان مش بحبها مع احترامى لكل اللى راكبينها
وطبعا استبعدت اى حاجه هاتش باك عشان عايز حاجه عائليه

المهم انى فى الاخر حصرت المقارنه فى 3 عربيات .. فلوانس / كورولا / استرا

مجربتش ولا واحده فيهم لان للاسف موضوع التيست درايف ده فى مصر طلع من المستحيلات السبعه .. أو التمانيه مش فاكر .. مش اى توكيل بيعمل تيست درايف ومش على اى عربيه

لكن قريت كتير عنهم .. وبعد كل ده وصلت لقرارى الاتى .. هجيب كورولا باذن الله

مبدأيا عايز اقول ان الفلوانس عربيه جميله فعلا .. صالونها اكتر صالون شدنى فعلا وحسيت انى راكب عربيه فخمه .. قريت كل حاجه عنها ومساهمات الاعضاء والملاك اللى واضح انهم بيحبوها جدا ومبسوطين بيها جدا .. لكن اللى قفلنى منها حاجتين :
موضوع نقص الزيت .. انا عارف انه حالات فرديه وكانت فى موديلات 2014 لكن برضه محدش ضامن الظروف .. مش متخيل انى ادفع 170 الف فى عربيه ولا قدر الله اغير موتورها بعد شهر ..
موضوع الفتيس ال CVT وطريقة سواقته الغريبه .. قريت كذا حد من الاعضاء المحترمين بيشرح طريقة السواقه والتعامل معاه وحسيت انى هتعامل مع اختراع مش مع فتيس اتوماتيك عادى .. لازم ادوس وبعدين اشيل رجلى وادوس تانى وحوارات .. ليه كل ده .. انا حد بيحب الجري ومعرفش هرتاح مع حاجه زى كده ولا لأ

الاسترا برضه عربيه محترمه لكن برضه بعدت عنها لسببين :
السبب الاول مصر كلها عارفاه طبعا وهو باختصار .. منصور
السبب التانى انها ضيقه شويه من ورا .. وانا عايز حاجه اوسع من الاكسنت

وبالتالى توكلت على الله وعزمت على الكورولا .. تصميمها مش أوى بس فى نفس الوقت مش وحش .. أوبشنز هايله لأول مره فى تاريخ تويوتا .. تسارع وأداء ممتاز .. أمان وESP .. واسعه واعتماديه
يعيبها حاجه واحده فقط ان عفشتها متوسطه .. مش ناشفه ومش ناعمه .. وربنا يستر ومتتعبنيش بأه زى الاكسنت .. ياريت لو حد جربها يقولى رأيه تحديدا فى موضوع العفشه ده .. هل هى متعبه .. يعنى بتنزل منها مرهق ولا مريحه؟

طولت عليكما صح ؟ لكن طمعان تدونى رأيكوا فى اللى قلته واختياراتى ولو حد عنده رأى تانى هبقى مبسوط لو سمعته .. شكررررررررراااا