مدينة نصر- المهندسين

**a_tantawy7** · 15-11-2008 01:42 PM

السلام عليكم يا شباب,
النهاردة عندي مشوار في شارع عدن , متفرع من شهاب , المهندسين.
و انا هتحرك من مدينة نصر , شارع مصطفى النحاس.
ممكن حد يداني على طريق سهل للوصول؟ علما بأني هتحرك الساعة 6 مساءا.
و أفضل مكان أركن فيه هناك, لأني أعرف أن المنطقة هناك زحمة.
ياريت من اللي يقدر يفيدني سرعة الرد لأني نازل كمان 4 ساعات تقريبا.
ألف شكر مقدما.

**Kamal-1** · 15-11-2008 01:54 PM

1- اما انك تطلع اكتوبر وتنزل المهندسين
2- الدائري حتى ميدان لبنان

**1.8Tee** · 15-11-2008 01:58 PM

بلاش كوبرى 6 أكتوبر عشان الأصلاحات.

**a_tantawy7** · 15-11-2008 02:02 PM

المشاركة الأصلية كتبت بواسطة Kemo0o

1- اما انك تطلع اكتوبر وتنزل المهندسين
2- الدائري حتى ميدان لبنان

معلش يا باشا, بس لو طلغت أكتوبر هنزل أنهي نزلة, 15 مايو ثم نزلة جامعة الدول العربية. ولا أكمل ميدان لبنان؟

**MoToRiZeR** · 15-11-2008 03:08 PM

بص يا باشا

تركب أكتوبر ثم وصلة 15 مايو .. من 15 مايو ادامك طريقين .. تنزل أحمد عرابي .. النزلة بتاعته تاني نزلة بعد الكيت كات .. فيه نزلة بعد الكيت كات علي طول و بتبقي شايف عرابي منها بس لو نزلت هتلاقي الملف مسدود و هتلاقي نفسك لازم تلف و تطلع عند السيرك .. إنزل بقي النزلة اللي بعديها و خد أول يو تيرن في عرابي علي جامعة الدول .. و تخش شهاب من ناحية جامعة الدول هتلاقي "جاد" علي الناصية .

الطريق التاني .. تكمل الكوبري للأخر و تنزل هتلاقي منفذ لميت عقبة متطلعوش تكمل طوالي لحد ما هتلاقي الكوبري اللي بيودي عالمحور في الأخر متطلعوش برضه و تطلع من اليمين علي ميدان لبنان تخش الميدان نفسه و تخش يمين في الشارع علي ناصيته كنتاكي عالشمال يعني كنتاكي هيبقي علي شمالك .. تمشي طوالي لحد ما تلاقي مغربي بتاع النضارات يمين و شمال ده شهاب بالعرض خش فيه و إركن في أي شارع جانبي يستحسن متركنش في شهاب لأن ساعات قليلة بيبقي فيه ونش فا حرص برضه و ممكن لو ركنت تلاقي حد قفل عليك لأن الناس بتركن صف تاني كتير . فا الأحسن تركن في الشوارع الجانبية .

فيه طريق تاني برضه لو كملت أكتوبر و منزلتش وصلة مايو هتلاقي نزلة في أكتوبر مكتوب عليها محور 26 يوليو .. إنزلها هتلاقي شارع كمل فيه علي طول و هتلاقي أخره يمين هتطلع عند المصل و اللقاح كدة و شارع البطل أحمد عبد العزيز كمل للأخر و خش جامعة الدول و خد يو تيرن و خش شهاب من ناحية جاد . أعتقد ده هيبقي أكتر واحد دايركت بس لو لقيت أكتوبر زحمة إهرب علي 15 مايو .

و لكن بصراحة الساعة 6 أي حتة في المهندسين هتبقي زحمة .. أول طريق عرابي زحمة .. تاني طريق أروق واحد نوعاَ ما .. تالت طريق البطل أحمد عبد العزيز زحمة .. ده غير إن شهاب نفسه زحمة .