الف مبروك
معلش غلطان
ايه اللي يخليك تعمل الشغل متاخر
ويعكوا في العربيه علشان يروحوا
من اول اليوم افضل
رقم العضوية : 176105
تاريخ التسجيل : 01Jun2015
المشاركات : 248
النوع : ذكر
الاقامة : مصر
السيارة: سكودا
السيارة[2]: فيات
الحالة :
السلام عليكم
منذ فترة كبيرة وانا بحس بهبدة فى الجزء الخلفى للسيارة بالاضافة الى ايضا العربية بتهبد شوية من الامام فى المطلبات..... طبعا انا عارف ان دول المساعدين عاوزين يتغييروا
شهر ورا شهر وسنه ورا سنه وانا مكسل اغير المساعدين لانى بكره موضوع الوقوف فى الورش وبحاول الم كل المشاكل عشان تتصلح فى يوم واحد
لانك عمرك ماهتعرف تظبط السيارة فى كل حاجة لازم هتلاقى شئ اتصل وبعدين شئ اخر ابتدى يبوظ
وانا السواقة هادية وبالراحة وبحاول امشى فى طرق نظيفة على قدر الامكان لاحافظ على السيارة لان المساعدين بقوا تعبانين وخاصة انى لم اركب المساعدين فى السيارة منذ شرائها عام 2007 - لانى لما اشتريت السيارة صاحب السيارة قالى انه لسا مركب مساعدين العربية المانى ومركبهم فى التوكيل (ايام ما كانت الفليشيا ليها بقى شنه ورنه ولسا ليها توكيل)
************المشهد الاول : الحى السابع بمدينه نصر *************
المهم رحت الحى السابع منطقة الورش ورحت على ورشه وقلت لصاحب الورشه ايه اخبار المساعدين راح هز كل جزء فى السيارة وقال المساعدين اللى وراه ضايعيين والاماميين خفاف
تتكلف كام مصنعية تغيير المساعدين؟ قالى 250 جنية
الساعة كانت 6 مساءا
طبعا لو فكيت المساعدين فى هذه المنطقة من الصعوبة انى الاقى كل قطع الغيار لانه طبعا وكالعادة كل شوية بتطلع حاجة جديدة طالما العربية اتفكت وطبعا مفيش غير 2 محل فقط بيبيعوا قطع غيار اسكودا وجداد فقط
المهم قلت اروح منطقة مليانة محلات لقطع الغيار عشان انا عارف ومجرب هذه المشكلة
وكان معايا مبلغ 1700 جنية قلت اغير كل المساعدين بحوالى 1100 جنية والباقى مصنعية وشوية الرفايع اللى بتطلع
رحت راكب العربية واتحركت الى الحرفيين وانا فى الطريق خطر ببالى فكرة انى اروح منطقة صقر قريش
لانى على المنتدى سمعت ان هذه المنطقة هى الحرفيين رقم 2
وقلت صقر قريش بالمعادى اقرب من الحرفيين والطريق الدائرى افضل بكتير
المهم وانا بفكر كده كنت دخلت على طريق الدائرى الحرفيين
المهم عملت يوتيرن من عند كوبرى التجمع الخامس الجديد
والمفاجأة الغريبة ان كان فيه صيانه بالكوبرة وقافلين نص الطريق
والعرييات زحمة
*********المشهد الثانى : صقر قريش بالمعادى*******************
المهم رحت صقر قريش والساعة كانت 7 مساءا
دخلت المنطقة اللى فيها الورش وقلت ادور على المساعدين الاول عشان اعرف السعر واعرف الانواع وروح الورشه بعد ما اتكد انهم موجودين
لقيت عدد 2 محل عندهم علامة اسكودا وبرده بيبيعوا جديد فقط
المهم سالت فى المحل الاول قالى انه مبيبيعش حاجات الفليشيا!!!!!!!!!!!!!!
قلت مش مشكلة اسال المحل التانى يمكن الراجل ده مركز على الاوكتافيا والفولكس
وطبعا حقة
اذا كان فى المنتدى اساسا عملوا كده وجمعوا الفليشيا فى ركن عشان متشوهش سمعة الاوكتافيا
المهم سالت المحل التانى قالى عنده فيكا تركى وهو زيت وغاز
قتل لا انا عاوز مايلى الالمانى
قعد يقولى ده احسن - طب بكام ؟ قالى ب 400 جنية تقريبا الخلفى
المهم قلت موضوع المساعدين ده موضوع مقرف ولازم اشتريهم احسن نوع عشان دول بيتغيروا كل كام سنه وقلت اركب نفس الماركة اللى راكبه المانى ياما ادور على مساعدين استيراد نضاف وطبعا مفيش فى هذه المنطقة
سالت محل تالت عنده علامة اسكودا
قالى انه مبيشتغلش فى الفليشيا
سالته منين اشترى مساعدين المانى - قالى فى وسط المعادى
المهم عرفت بكده ان موضوع صقر قريش ده بالنسبة للفليشا تجربة فاشلة جدا نظرا لعدم توافر قطع الغيار
قلت الحق اروح الحرفيين واعمل المساعدين لان الوقت كده بقى ضيق
لان المساعدين سمعت ان فيه ماركة مايلى توكيلها فى الحرفيين من خلال احد مشاركات المنتدى وكتب انه اشترى المساعدين ب 550 جنية فى شهر 2 الماضى - طبعا لازم نستفيد من خبرات المنتدى
ركب السيارة وانا على سرعة 80 كده بحس بغربلة فى الدركسون فقلت اخلى لاسرعة هادية الى ان اوصل ولما وصلت الحرفيين
************مشهد 3 الحرفيين **************
دخلت منطقة الحرفيين حوالى الساعة الثامنه مساءا
وداخل المنطقة تلاقى مابين كل ورشة وورشه ورشه واتنين
وتلاقى ناس كتير بتجرى وشوارع ضيقة مكربسة عربيات من كل الانواع والاشكال
وتلاقى كل الماركات جديد ومستعمل وخلافة
قعدت اتمشى بالعربية وانا لا اعرف اى ورشه معينه
المهم سالت واحد صاحب محل بيبيع انصاص عربيات متقطعة قلتله عاوز حد بتاع عفشة كويس
قالى اهو : ميدو مساعدين
لقيت اسم الورشة فعلا ابناء الغربية - ميدو مساعدين
قلت كويس
سالت الراجل المصنعية لفك وتركيب اربع مساعدين كام
طبعا بسال ومن حقى اسال عشان لا افاجئ بارقام خيالية بعد ما الشغل يتعمل
يعنى ممكن تلاقى الموضوع يدخل فى 500 جنية مثلا وانت مش عامل حسابك
قالى 200 جنية - قلت كويس
انا معايا 1700 منهم 200 مصنعية والباقى المساعدين والرفايع
المهم لقيت عنده فى الورشه مالا يقل عى 8 صنايعية شباب صغير
كل اتنين ماسكين عربية
المهم قلتلة فك المساعدين عشان لو فى حاجة تانية هتتعمل
--- طبعا مش هتكلم عن زحمة الشارع والوقت اللى اتاخد عشان تعرف تركن جمب الورشة وانه طلع عربيته عشان اركن مكانة
جاء اثنين من الصنايعية ورفعوا العربية من الامام وقعدوا يفكوا المساعدين المهم قال حالتهم مش تعبانة - قلت هركب جديد وخلاص عشان المشوار والوقت والمجهود ودول بقالهم سنين فالحمد لله وكتر خيرهم
طبعا موضوع الصنايعية الكتار ده كويس انهم بينجزو فى الوقت ومقرف لانك مبتعرفش تتابع كل واحج بيعمل ايه وده مهم جدا
الراجل قلتله اشترى مساعدين نوع ايه
قالى هات ساكس
قلتله ومايلى الالمانى : قالى ده وحش -----هههههههه
فى عقلى وحش ازاى والمساعدين بقالهم حوالى عشر سنين وكانوا زى الفل
المهم فكوا المقصات وفكوا البارات الطرف
وقالوا عاوزين جلب مقصات وبارات طرف داخلى وكوتش كوبلن داخلى
جاء الصنايعى معى ورحنا عند محل مشهور جدا اسمه المهدى
السلام عليكم
عليكم السلام
عاوزين مساعدين ساكس المانى
قالى العربية ايه؟
قلتله فليشيا
قالى الفليشيا مبينزلش ليها الساكس !!!! بينزل ليها مايلى الالمانى
قلتله بكام
قالى 550 امامى و 500 خلفى قلتله هات الاثنين
اشتريت الحاجة:
- 2 مساعد امامى 550 جنية
- 2 مساعد خلفى 500 جنية
- 2 كوتش خارجى كوبلن 25 جنية
- 2 جلية مقص 100 جنية
- 2 كوتشة بارات خارجى 25 جنية
المجموع بعد الخصم = 1175
سالته البارات الداخلى قالى معندوش فلتله بكام هما قالى ب 180 جنية التركى
بس قالى هو عنده السكارته كاملة بالبارات ب 340 جنية
الصنايعى قالة لا الاسكارته سليمة عاوزين البارت فقط
ومكانش عندة البارات الداخلى فقلت اسال عليهم فى محل اخر
رحت لفيت بقى على كل محلات الاسكودا وكله يقلك مفيش البارت دى
ليه ياعم يقولك عشان شغل الفليشيا بقى بيقل (!!!!!!!!!!!!!!!!!!!!!!)
الساعة داخلة على 10 مساءا وانا مش لاقى البارت وفى الورشة العربية اتفككت
المهم الراجل بتاع الورشة قالى انه هيركب الحاجة على مااجيب البارات ولو ملقيتهاش هيركب على كده وهيقرط عليه شوية!!!!!!!!
- قلتله هدور عليهم تانى واخذت منه بارة مفكوكة وطبعا ايدى اتملت شحم
- وهما بيشتغلوا سمعت اتثنين واحد بيسال التانى الراجل اداك بقشيش قاله لا وراح شاتم صاحب السيارة بامه بالفاظ قذرة لامه لم يعطية بقشيش(حاجة بصراحة مقرفه)
رحت سالت فى اكثر من محل وفى الاخر لقيت محل قالى موجودين
بكام ياعم قالى الجوز ب 90 جنية (طبعا شكيت فى السعر)
قلتله هاتهم
جابهم لقيتهم البارات فقط بدون البيض
قلتله فين البيض؟
قالى اللى بيتاكل فى البارات هى راس الكورة والبيض ده ممكن تركبة على القديم.
ياعم ازاى الكلام ده؟
قالى انت مين اللى بيشتغل فى العربية
قلتله ورشه هناك كده
قالى روحله وهو هيركبهم
دفعت الفلوس ورحت للورشة وانا داخل الورشة
كل واحد من الصنايعية يشوفنى يقولى جبت البارات
اقوله اه يبص عليهم يقولى ويزعق ( ايه ده؟ ايه ده؟)
الصنايعى اللى بعدة يشوفهم ( ايه ده. ايه ده)
الى ان وصت لصاحب الورشة ( ايه ده؟ ايه ده؟)
رحت مزعق فيهم - قلتلهم الكورة دى بتركب قى البيض وبعدين ايه هو اللى ايه ده ايه ده. ده المحل اللى قالى كده (طبعا انا عارف ان المحل غلطان )
قالولى هات 25 جنية ثمن علبة شحم و30 جنية مكبس
اديتهم 55 جنية ورحت جارى على المحل ومعايا البارة القديمة والاتنين الجداد
قلتله الوشة قالوا مش هما دول عاوزين البارة بالبيض زى دى بالظبط
قالى طب لحظة ونادى واد من عندة وبعته يجيب من محل اخر
المهم الساعة داخلى على 10:30 والمحلات بدئت تقفل
والعربية مفكوكة فى الشارع
قلت الحق اجرى الف على محلات تانية او اشترى مستعمل وخلاص
وقلت للراجل لو جاب البارات هشتريها منه وسيت الفس معاه
وقت ادور انا فى محلات تانيه عشان الوقت
الحمد لله ربنا كرمنى ولقيت محل اسمه الكوثر قالى البارت موجودة
هات ياعم البارت
دخلوا جوا مخزن وغاب كتير وجاب علبتين زرق وقالى بارات المانى وحركات
المهم قلتله بكام قالى الواحد ب 95 جنية
فتحنا العلبه طلع الشكل غير شكل البارة القديمة
قعد يبص فى العلبة وطلع العلبة مكتوب عليها بالقلم الحبر فليشيا وهى مش فليشيا
المهم دخل المخزن وغاب كتييييير
طبعا الوقت بيجرى والمحلات بتقفل وكنت قلقان جدا
المهم جاب البارات والحمد لله طلعت واشتريها وعمل تخفيض واشتريتها ب 175
جريت على صاحب الورشة
والحمد لله طلعت البارت
الواد بقى الصنايعيى قالى : انت جبت اتنين ليه؟ دى واحده بس اللى بايظة
قلتله مقلتش ليه من الاول؟
قلتله ركب الجداد (طبعا اكيد مش عاوزين يفكوا البارة التانية لانى لاحظت انها اخذت وقت كبير)
المهم صاحب الورشة قالى انه رايح مشوار وهيرجع تانى (طبعا روح) والساعة بقت 11
وقالى ادى الفلوس لاحمد الصنايعى
المهم فضلوا يركبوا ويعملوا فى العفشة واذا بمسار قالى ده فوت
خد ياعم خمسه جنية وروح اشترى مسمار
قعدت وايدى على قلبى لحسن حاجة تبوظ او تتكسر وتحصل مشكلة
وسالتهم ليه البارات دى مش منتشرة رغم ان الحرفيين المفروض فيها كل حاجة
قالوا لى : كل المستوريدن الان بيتجهوا للعربيات الجديدة والقديم سوقة بقى قليل
وطبعا لان العربيات الجديدة الطلب عليها جامد وايضا مكسبها اعلى
يعنى بعد فترة قطع غيار الفليشيا متوقع انه يبقى مش متوفر بالكم بتاع الان وهكذا
المهم الحمد لله ركبوا المساعدين الامام والراجل ركب العربية عشان يلفها ويركب المساعدين الخلفى
طبعا المرش فوت منه والفتيس علق منه ووسخ الفرش بالشحم والباب اتوسخ شحم
ورفعوا العربية وفتحوا الشنطة عشان يفكوا المساعدين من فوق ومش عارفين مكان المساعد من الشنطة فكانوا عاوزين يشيلوا الكنبة وبعدها عرفوا ان مكانه تخت الفرش وقعدوا يشدوا الفرش وطبعا الشحم لغوص العربية.
المهم ركبوا المساعدين الخفى ونسيوا كاوتشه وانا قلتلهم يعدلوها ولو مكنتش واقف على الشغل كان ممكن يتعك والساعة بقت 12:00
واخذت ال 4 مساعد القدام والبارتين قلت يمكن يتباعوا خردة مثلا
قالى بقى تروح تظبط زوايا عند المحل بتاع كريم فى اخر الشارع
قلتله بكام الزوايا قالى ب 40 جنية
انا سالته لان المبلغ اللى كان متبقى بالظبط 290 جنية
قلت كويس 200 جنية مصنعية و 40 زوايا وبكده اعرف اديهم بقشيش
المهم ركب معايا عشان نروح للزوايا وفى الطريق بديلة المصنعية
قالى هو قالك كام قلتله قالى 200 جنية
لقيته فاجئنى وقالى وفبة 120 جنية كاوتش للمساعدين !!!!!!!!!
قلتله كاوتش ايه ومفلتليش ليه قبل ما تركبهم؟
قالى لازم يتركب للمساعدين كاوتش عشان ميضربش زيت وقالى الواحد ب 60 جنية
قلتله طب دلوقتى انا معايا كله 290 جنية ولسا هعمل زوايا ب 40 جنية
قلتله طب نكلم صاحب الورشة
كلمته وقالى ال 120 جنية دول كاوتش قالتله انا معايا كل المبلغ 290 وفيه زوايا ب 40 جنية
والمفروض تقولى على موضوع الكاوتش ده
طلع راجل زوق وقالى مش مشكلة ادفع خمسين للكاوتش
المهم الحمد لله اديت الواد 250 جنية واربعين زوايا
وطبعا مشهد الزوايا ده طلع كلام غريب
واحنا بنعمل زوايا الواد بتاع الزوايا قال للواد بتاع العفشة انت اللى شاتغلتوا فى البولو بتاعت امبارح
قاله لا انا وكان واحد كمان
قاله الكوبلن كان مفكوك
قاله ان الشغل مكانش فى الكوبلن
قله بس المفروض تقله ان الكوبلن مفكوك
ومكنش عاوز يوضح عشان انا واقف معاهم
وتقريبا هوا ودوه لحد تانى يظبطلة حوار الكوبلن ده
والعفشجى قاله حاجات البولو مقرفة ومش موجودة
المهم عملوا الزوايا والواد جاء جلس مكان الدركسون وفكه عشان يظبطه راح قاطع منه حته كنت لازقها
ولما خلص قلت ادى العفشجى بقشيش بس مكانش فيه فلوس وهو عارف فسالته لو فيه ماكينه فلوس قريبة قالى عند شارع جمال
قلتله تعالى نروح عشان اديك بقشيش
رحنا والطريق كان زحمه جامد والعربية لقيتها بترمى شمال سنه
فالمهم وصلنا للمكينه واديته بقشيش ورجعنا لورشة الزوايا وقتلهم فيه حدفة شمال
لقيت اكثر من شخص رد وقال حط الفردة اليمين مكان الشمال
وقالوا لو لقيتها بتحدف لسا يبقى تيجى للزوايا ولو حدفت العكس يبقى الكاوتش وهيطبع
المهم طلعت على الطريق والاقى الرجرجة على سرعة ال 100 شغاله
يبقى كده اكيد ترصيص كاوتش
والساعة اصبحت 2 مساءا وكنت فى غاية التعب والارهاق
الحمد لله رب العالمين
------ اشهد ان لا اله الا الله - وان سيدنا محمد رسول الله --------
رقم العضوية : 25254
تاريخ التسجيل : 15Nov2008
المشاركات : 11,512
النوع : ذكر
الاقامة : القا هره
السيارة: شاهين 1400 /97
السيارة[2]: 516.2008 تيجو2013
دراجة بخارية: دايون 150
الحالة :
الف مبروك
معلش غلطان
ايه اللي يخليك تعمل الشغل متاخر
ويعكوا في العربيه علشان يروحوا
من اول اليوم افضل
ياتقول كلام في محله يا تقول حلو ياحلو
http:///photos/a.879931698703941.107...370587/?type=1
رقم العضوية : 103297
تاريخ التسجيل : 12Jun2011
المشاركات : 4,030
النوع : ذكر
الاقامة : Alexandria
السيارة: 2008 suzuki alto
السيارة[2]: fiat 128
الحالة :
كلامك ده بيأكدلي إني دائما ببقى غلطان لما أحب أعمل شغل بسرعة ...أو في وقت متأخر ..أو في آخر يوم في أسبوع الصنايعية ..اللي هو يوم السبت ..عمري ما عملت شغل وأنا مستعجل او الصنايعي مكانش ليه مزاج يفتح فيه وأنا خليته يفتح فيه وطلع الشغل كويس ..
--------
m_m_sh_a سابقا
رقم العضوية : 176105
تاريخ التسجيل : 01Jun2015
المشاركات : 248
النوع : ذكر
الاقامة : مصر
السيارة: سكودا
السيارة[2]: فيات
الحالة :
دى طبيعة شغلهم كده مش موضوع شغل مستعجل او متاخر
بالعكس لو روحت تصلح عندهم الصبح هيفك العربية ويركنك جمبه طول اليوم لانه هيفك جمبك كمان عربيتين تلاته ويقعد كل شويه يقولك اشترى دى عشان تقعد تلف وترجعلة بعد ساعة
الوقت ده بيكونوا بيقفلوا فيه العربيات المفتوحة من الصبح
وتغيير المساعدين مش حرفية عاليه ده حتى فيه ناس عاملين بوست انهم بيغيروا المساعدين بنفسهم
المشكلة ان قطع الغيار بقت بتقل فى السوق ومعظم التجار بقت بتفضل الشغل فى الموديلات الجديدة
------ اشهد ان لا اله الا الله - وان سيدنا محمد رسول الله --------
رقم العضوية : 25216
تاريخ التسجيل : 15Nov2008
المشاركات : 14,019
النوع : ذكر
الاقامة : Haram & My mobile phone
السيارة: New Accent 08
السيارة[2]: Picanto 09
دراجة بخارية: no
الحالة :
العفشجى ده مش شاطر
A.Saad
المفضلات