الموضوع: هو إحنا شعب متدين بطبعه فعلا ؟؟؟؟.....

المشاركة الأصلية كتبت بواسطة subhimust

يا فندم مش كل مقولة تقال تبقى خلاص يعني حقيقة
يعني مثلا مصر ام الدنيا يعتي هل مصر هي اللي ولدت الدنيا مثلا هههه يعني احيانا الشعوب بيطلعوا كلام من باب تمجيد الذات م لازم نمسك احنا بقى الكلام ونخليه واقع وحقيقة

المشاركة الأصلية كتبت بواسطة subhimust

الكلام دة بيتقال للاسترضاء وتضخيم الانا عند الشعوب
يعنى من الاخر ....كلام للاستهلاك المحلى عشان الناس تتفاخر وتنسى الواقع اللى بتعيشة

زى شعب فهلوى .....المصرى ابن نكتة ..... وهكذا

بس ده يعتبر تضليل للناس ..وتغييب لوعيهم ..وخصوصا إن في ناس معتقده في كده فعلا ..وشايفه إن إحنا متدينين بطبعنا ..ومش هييجي مثلا شيخ يعلمنا ديننا ..وإن إحنا الدين عندنا بالفطره ..وعشان كده لما تيجي تتناقش مع حد عشان تقوله مثلا إن في حاجات هو بيعملها ملهاش أصل في الدين وتعتبر بدعه ..تلاقيه يقولك ..يعني كل اللي كانوا عايشين قبلنا مبتدعين؟؟ ..يعني كل اللي كانوا عايشين قبلنا غلط وإنت اللي صح ؟؟؟..يبقى كده بقي فيه تضليل وتغييب للوعي كمان

أكيد لأ طبعا... قال شعب متدين قال

زمان من اللي بنشوفه ف الافلام رقص وخمره وبيره وستات.. طبعا كان واضح ان في قله محترمه بس الاغلب رايح ف داهيه

دلوقتي نايت كلوب وكباريهات وبوي فريند وجيرل فريند وشات وصاحبي واصلها زميلتي بس بعاملها زي اختي وسفاله وانحطاط ف الافلام والمسلسلات والاخلاق

مفيش تربيه اصلا دلوقتي ... ولا في اخلاق ... ممكن يكون في تكه ضمير بس مش تدين

طبعا دي مش قاعده بس الواضح من اللي بنشوفه ان احنا مش شعب متدين

و ع فكره احنا بردوا شعب مش بتاع شغل

المشاركة الأصلية كتبت بواسطة subhimust

تضليل ايه يا فندم هو سعادتك عايش معانا على كوكب مصر ام من زحل ؟؟؟؟؟؟؟؟؟؟؟؟؟

أنا بتكلم عن الحالة المثالية ..إنما الحالية الواقعية أنا عارفها كويس قوي ..واللي خلاني أطرح التساؤل ده هي الناس اللي مصدقه فعلا حكاية إن إحنا شعب متدين بطبعة ..مع إن الواحد لو قعد ينتقد هيطلع مصايب ..طيب أقولك على حاجه ..ومش عايزك بعد ما تسمع الكلام ده تقول عليا تكفيري أو داعشي أو الكلام ده

عايزين نتفق أولا كده وقبل أي حاجه إن الساب لله كافر ..يعني اللي يشتم ربنا كافر ..والساب لدين الله كافر برضه ..أظن دي حاجه مش محتاجين نقول فيها كلام ولا فيها خلاف أصلا ..والساب لله والساب لدين الله لو ماتوا على حالهم دون توبه فلا يدفنوا في مقابر المسلمين ولا يغسلوا ولا يرث فيهم المسلمين ..المهم عشان ما أدخلش في تفاصيل

مره وأنا مروح من شغلي جه في بالي كده إني أعمل إحصائية مع نفسي كده أشوف إيه حال الناس مع بعضها ..وده من خلال إني هدقق شوية وأنا ماشي في الناس وتصرفاتها ..يعني تقدر تقول كده هبحلق في كل واحد ماشي وهشوف أي فعل غريب يصدر منه ..عادي يعني ..أنا مش همشي ورا حد ولا هراقبه ..أنا قلت هدقق بس مش أكتر ..المهم وأنا مروح على البيت كده وقبل البيت عندي بييجي نص كيلو كده في حته أنا متعود أركب فيها لكن في اليوم ده قلت لأ ..أنا همشي ..المهم لقيت واحد نازل من توكتوك بينط وقام بتاع التوكتوك بيلف جامد فالواحد اللي بينط من التوكتوك ده قام محدوف كان هيقع المهم إنه موقعش ..قام صاحبنا اللي كان نازل م التوكتوك ده قام سابب الدين للي كان سايق التوكتوك ..قام الوله اللي كان سايق التوكتوك قام شاتم صاحبنا بأمه ..وطبعا قعدوا يزعقوا لبعض وأنا بصراحه خدت بعضي ومشيت ..وأنا ماشي في نفس اليوم ..معرفش بقى هي جات معايا كده ولا ده العادي بتاع كل يوم وأنا مكنتش باخد بالي ..المهم وأنا ماشي كده لقيت واحد راكب عربية نص نقل ..راكب في الصندوق ورا وبيسب الدين لواحد ماشي ..تقريبا كان عامله حاجه ..المهم على ما روحت ..كنت سمعت عدد 2 سب دين ..ده غير ا لشتايم البذيئة اللي بالأم ..ودي بتبقى في لغة الحوار العاديه بين أتنين ..

السؤال بقى ..اللي سب الدين ده كافر لو مات على حاله ..يعني لو جاتله سكته قلبيه ووقع من طوله وهو مكانه كده يبقى ده كافر ..طيب في ناس تانيه كانت واقفه وقت واقعة سب الدين ..محدش منهم إتكلم ..محدش منهم قاله يابني إتقي الله ..يابني حرام عليك ..هتقولي وإنت مقولتش ليه ؟؟هقولك أنا مقولتش على نفسي متدين بطبعي ..أنا المثال اللي قولته فوق ده عينة من حاجات كتييييييييير الواحد بيشوفها كل يوم في الشارع ..عشان كده أنا بقول إزاي في حد مصدق إن إحنا شعب متدين بطبعه ؟؟...مش عارف !!!!!!!!!!!!!!!!!!!!!!!!!!!!!!!!!!!!!

المشاركة الأصلية كتبت بواسطة subhimust

سب الدين ده صراحة منتشر بين اسوأ فئة في مصر بل في العالم سواقين الميكروباص والتوكتوك
ونعم ساب الدين كافر بالضروره حتى لو طلع حد وقال ان هو مش بيكون قصده بردو كافر بالضرورة
على العموم مش هو ده الموضوع السؤال الان :
حضرتك ينفع تسيب ابنك يتربى في الشارع ؟؟؟؟؟؟؟؟؟؟ اجابة السؤال ده هي اللي هتبين احنا شعب متدين بطبعه ام لا

لأ طبعا ..بس خلي بالك ..ده لسان مقالي إني مسبش إبني يتربي في الشارع ...لكن ممكن يكون لسان الحال مخالف للسان المقال ..أنا مش بتكلم عن نفسي ..أنا بتكلم عن واحد لو سألته قلتله ترضى تسيب إبنك يتربي في الشارع هيقولك لأ ...وهو سايب الوله طول النهار في الشارع ما بيطلعش غير عشان الأكل والنوم ..ولما تيجي تسأله تقوله يا حاج الوله إبنك من أول يوم في أجازته وهو قاعد في الشارع ..يقولك خليه يتودج ..آه ..ما هو لازم يتخربش كده ويتعلم ..هيقعد في البيت زي خيبيتها كده ما ينفعش ..

سؤال حضرتك بيفكرني باللي بيقول ..إن إحنا شعب متدين بطبعه ..وحضرتك طبعا عارف إجابته ..لأ ما ينفعش أسيب إبني يتربى في الشارع