زمان كنت بفكر افتح كافيتريا و ما زال الامل موجود
كنت بدور على العدة لفت نظرى الفحم
الفحم بعد ارتفاع سعرة وصل الكيلو ل7 و 8 جنيه
بعد ما كان ب6 جنيه
طبعا احنا بنتكلم على فحم الفواكه
طبعا الكافيه مكانش هيبقى ده السعر لانى كنت هجيب بالجمله
واحد ادانى رقم واحد صاحب مصنع فحم
اتصلت بيه قالى انا اقل كميه بطلعها من المصنع طن
طبعا قولتله شكرا و قفلت
بعدها بكام يوم اتصلت تانى و كنت عايز اعرف ايه سر الطن ده
قالى ده فحم مضغوط شبه الاقراص كدة
وقالى سعر كويس جدا
لما جيت احسبها كدة لقيته اقل بكتير من نص سعر الفحم العادى و بكتير جدا كمان
المهم نزلت كافيتريا كبيرة و قولتلهم انا عايز اشوف الفحم المضغوط ده
جابولى كيس وزنه حوالى ربع كيلو قالولى هوا ده
قولتلهم بكام ده قالولى بخمسه جنيه
طبعا انا اتصدمت ده انا لو عملت الكيس ده بأتنين جنيه كمان هكسب
كل ما فى الامر اعاده تغليف الفحم بأسم تجارى و بيعه بأقل سعر فى السوق
مع عمل عبوات بأحجام مختلفه على فكرة الفكرة دى انا حاسس انها كويسه
و بالاخص لما صاحب المصنع قالى انا ممكن اعرفك على حد يغلفلك عبوات بس ليا نسبه
ايه رأيكم فيها ؟
و حد عنده خبره فى التغليف او التوزيع ؟
و يكون على مستوى المحافظه ام خارجها ؟