-
الف حمد لله علي سلامتك في الاول والحمد لله انها جات علي اد كدا بس بصراحة مش حارق دمي غير الحيوان التاني دا اللي مكلفش خاطره في حادثة كبيرة زي دي وهو السبب فيها انو ينزل يشوف البني ادم اللي جوة العربية دا حصله ايه بس عموما كما تدين تدان وربنا اكيد هيوقفله اللي يعمل فيه كدا
بالنسبة للعربية بصراحة انا رايي توديها التوكيل خصوصا ان توكيل تويوتا محترم وسمعته كويسة وكمان حرام تبهدل العربية مع الصنايعية دا غير بهدلتك انت طبعا من ناحية الفلوس اكيد برة التوكيل ارخص لكن لو مش هتفرق معاك يبقي طبعا صلحها في التوكيل والف حمد الله علي سلامتك مرة تانية وربنا يكفينا جميعا شر الطرق والحوادث
-
على فكرة أنا كمان م المنصورة .
-
يوجد مركز خدمه تابع لتويوتا فى بورسعيد وهو مركز جامد جدا بجوار كوبرى الرسوه ببورسعيد المجمع الصناعى الأول منطقه سى 8 والمسافه بين المنصوره وبورسعيد بعد الطريق الدائرى ساعه ونصف والطريق ده هيخليك تتطلع على مركز الخدمه من بره بره ومش هتخش بورسعيد إبدا .
وتحت إمرك فى أى حاجه وقدر الله وماشاء فعل .
وبالنسبه لقطع غيار مستعمل موجود فى بورسعيد منطقه بنك الأسكان لو محتاج قطع غيار مستعمل
-
اولا الحمد لله على سلامتك دى حادثه مش هينة و ربنا نجاك منها
انا رأيى توديها التوكيل علشان تحافظ على العربية ده لو الفلوس متفرقش معاك اوى
مع الصنايعية هتدوخ السبع دوخات وعمرها ماهتطلع زى التوكيل , وهتقعد بعدها مده تصلح اللى بوظوه اثناء التصليح
-
والله ربنا يكون فى عونك انا بردو لسه خارج من حادثه بس الحمد لله مامن عليها بس ولا الدموع بحارب فى الاجرائات والعربيه واقفه زى ماهى بقالها شهر
والمهندس قال تتكهن بس انا نفسى اصلحها مع انها مقلوبه والماتور الحمد لله سليم بس للاسف ولا طايل ده ولا ده
بس انا بصراحه لو مكانك هصلحها بره التوكيل اصلها يعنى مش بتتصلح بالكمبيوتر جوه التوكيل ناس بردو زى اللى بره بتصلحها بس مش اى ناس
فـ انت شطارتك تنقى الصنايعيه اللى هيعملوهالك وتفاااااااصل فى الحاجه المستحسن تاخد معاك خبير يكون قريب منك علشان يبقى قلبه عليك وانت بتدفع
وماتقلقش هترجع زى الاول والحمد لله انها جت فى الحديد .... وربنا يسهلهالك ويسهلهالنا
-
الف حمد عاى السلامة اعملها برة التوكيل لو عندك حد يتابع مع الصنايعية او او انت عندك وقت لو كل ده مش متوفر اعملها فى التوكيل ولو انت نفسيا حاسس انها مش هترجع ذى الأول بيعها بحالتها .
-
الف حمد لله على سلامتك بس اسمحلى اقولك انت الغلطان انك تاخد منزل كوبرى على 140 .بس الحمد لله انك سليم و دا قضاء ربنا سبحانه وتعالى
المهم انا رايئ تصلحها بره التوكيل لو تعرف صنايعى شاطر و امين لانك كده كده حاجات كتير هتغيرها مش هتصلحها . بس لو متعرفش صنايعى كويس يبقى التوكيل احسن و فاصل معاهم متخدش كلامهم انه اخر كلام و اللى ينفع يتصلح خليهم يصلحوه ميغيرهوش .
-
متشكر اوي ياشباب على ردودكم ووقوفكم جنبي
وربنا ما يوريكم اي حاجه وحشه سواء في عربيات او في غيرو ان شاء الله
انا من المنصورة بصراحه معرفش صنايعيه من ناحية الميكانيكا
اما السمكره فانا ليا اصحابي بيقولولي فيه سمكريه بيشتغلو في بي امات
انا اساسا لحد دلوقتي مفصول من ساعة الحادثة ولا رحت ولا سالت ولا جبت حد يبص عليها
هشوف كده التوكيل هيرد عليا ويقولي كم التكلفه وهعرفكم بردو عشان اخد رايكم لان انتم عارفين ان مواضيع زي دي بتطول
مستني ردودكم معانا
وشكرا ليك يا وائل و وليد و اسوكينج
-
الف حمدالله على سلامتك وفعلا فى دهيه اى حاجة المهم انك الحمد لله سليم
حضرتك انا من القاهرة وقريبى عمل نفس الحادثة بتاعتك بالضبط بس الفرق انه فى منزل الكوبرى واحد قفل عليه فلحق ووقف بس واحد سواق تاكسى قديم ومهكع دخل فيه من ورا على سرعة 80 او 90 تقريبا وطبعا لبس فى اللى قدامه بشكل مفزع
المهم اللى عمله كالتالى راح التوكيل وسألهم على التكلفة (معاه مرسيدس 200 -90) المهم انه كلم ناس يعرفهم فى الحرفيين لقى الفرق تقريبا فوق ال 10000 جنية
المهم انه عملها فى الحرفيين والعربيه مستحيل تقول ان فيها حاجة
العربيه اتعملت فى 10 ايام وتقريبا من الصبح لغاية 10 باليل يوميا كان هناك
وفى الاخر حمدالله على سلامتك وبلاش السرعه
-
1- حمدا لله على سلامتك، والحمد لله إنها جت على قد كده.
2- قبل ما تأخذ قرار بإنك تصلحها سواء فى التوكيل أو برة فكر كمان فى بديل آخر هو إنك تبيعها على حالتها دى. إجابتك على الآسئلة دى هى اللى هترجح إختيارك لبديل من الإتنين (تبيع ولا تصلح):
* تكلفة الإصلاح.
* حضرتك مستعد تدفع كام فى الإصلاح.
* النتيجة المتوقعة بعد الإصلاح.
* سعر السيارة بعد إتمام الإصلاح.
* المدة التى تنوى إبقاء السيارة معك إذا أصلحتها وحالتها رجعت كويسة.
* سعر السيارة الآن على حالتها.
حضرتك فكر كويس وحاول توصل لإجابات محددة على الأسئلة دى قبل ما تاخد أى قرار
Content Relevant URLs by
vBSEO 3.6.0 PL2