عملت حادثه شديده بكورولا ومحتاج وجودكم جنبي

**boing** · 16-11-2008 12:16 AM

اولا قبل اي اي كلام الحمد لله على كل شي
وانا راضي بقضاء الله

امبارح ياشباب عملت حادثه بعربيتي كورولا 2006
ميكروباص قطع عليا طريقي وانا نازل من كوبري على سرعة 140 كبستلو وزمرت
من قبل ما اتوقع انو هيدخل عليا انا عادة بامن طريقي قبل ما ادخل حتى لو من على اليسار ببقى معرف اللي على اليمين ومهدي اني جاي بسرعتي

فجاة ياجماعه والله لاقيتو مرة واحده كسر عليا شمال من غير اشارات لان كان فيه فتحة يو ترن وهوا عاوز يدخل ويلف منها
ومكنش طبعا باستطاعتي على بعد 10 متر منو تقريا وعلى سرعتي 140 ان اكسر الطارة يمين واتفاداه لانو بقا قدامي مباشرة وضرب فرامل

طبعا انا دخلت فيه من الخلف والحمد لله ربنا ستر الايرباج طلعت وطبعا حصلي كدمات كتير في صدري وركبي من قوة الصدمه

مات على نزلت وفتحت الابواب كان الحيوان مشي وطبعا انا في موقف زي ده الساعه 4 الفجر ملحقتش اخد رقمو
نزلت لاقيت العربيه متدمره بمعني الكلمه

باختصار
الرادياتير انتها وبتاعت التكييف اللي طلعت الدخان دي انتهت
طبعا الصدام الامامي بفوانيس الشبورة بالاضافه الى الفوانيس الرئيسبه
بالاضافه اليالرفارف ب الكبوت بالشبكه بالزجاج الامامي للسيارة
وطبعا الايرباج طلعت من الدركسيون وخرمتو والطابلوه من الداخل فيه شروخ كتير ومفارق وفاكك من بعضو
بالنسبه للعفشه والكوتش مفيهمش حاجه
والله اعلم بقا بحال الفتيس ياشباب
لان العربيه كانت على الخامس ومن ساعتها وهيا لسه عالخامس مش بتمور
والدواسات طبعا انتهت تحت رجليك

انا مش عراف اتصرف ازاي لان الموضوع ده لسه امبارح الفجر

رجاء ياشباب تنصحوني اعمل ايه
اصلح العربيه برا سمكرة واوديها التوكيل ميكانيكا ولا كلو برا ولااوديها التوكيل وهما حرين معاها
ولا اعمل ايه بالظبط

انا في ورطه كبيرة لاني مش مـــــــــــــــــــــــأ من عليها
ودي اول حادثه اعملها بعربيتي دي من 3 سنين وانا اول مالك ليها
وبصراحه صعبانه عليا موووت ووحشتني اوي من اول يوم

ورجاء حد يقولي لو وديتها التوكيل هتكلف في حدود كم
المكنه سلينه ان شاء الله بس قواعدها طبعا اتنت اكيد

محتاج ردودكم ياشباب ومحدش يتاخر عليا برايو حتى ولو كان شايفو مش مفيد

وربنا يحفظكم من شر الحوادث ومن شر الطرق
وابقو خلو بالكم من خطا الغير
وربنا يحفظنا ويحفظكم ويديكم خير عربياتكم ويكفيكم شرها

طبعا انا الحمد لله مش زعلان وراضي بقضاء الله طالما الواحد طلع منها سليم
والحمد لله ان الواحد عارف يكتب ويتكلم في المنتدى ههههه

**ToYoTa** · 16-11-2008 12:22 AM

قدر الله وما شاء فعل

واكيد اللي حصل ده بالرغم من حجمه الا انه برده خير لان كل اللي يجيبه ربنا خير

ربنا معاك

اعتقد انه الاوفر ليك طالما انها برة التأمين انك تصلحها برة
الا لو فرق معاك سعر اعادة البيع فطبعا لو متصلحة في التوكيل هتجيبلك سعر اعلي عن ما تكون متصلحة برة
ولكن الرأي الامثل انك تصلحها برة لان النهاردة اللي بيشتري مستعمل ما بيفرقش معاه برة التوكيل ولا جوة التوكيل بيقولك اهي اتخبطت وخلاص لكن لو انت ناوي تخليها معاك يبقي صلحها برة

**MoToRiZeR** · 16-11-2008 12:22 AM

رد خطأ فني رجاء قراءة الرد التالي

**MoToRiZeR** · 16-11-2008 12:24 AM

الحمد لله علي سلامتك قبل كل شئ .. أي حاجة في الحديد بتتصلح المهم إنت بخير فداك مليون عربية .. و الحمد لله سيارتك فيها عوامل أمان أمنتك وقت الخطر .. غالباَ عربيتك هتتشد من أول و جديد في الحرفيين بتكلفة أقل من التوكيل بكتير و الإخوة هيقولولك الناس اللي تروحلهم .. بس أرجو من الناس تتعظ من الموضوع لأن ده تاني حادث يحصل في المنتدي في وقت قليل في وقت الفجر بسبب إن الطريق اما بيبقي فاضي الناس بتجري جامد .. حتي لو الطريق فاضي فأنت لا تتحكم في ظروفه ولا في غباوة مثل هذا السائق يا أخي الكريم .. و لكن الواحد مبيتعلمش ببلاش .

حمد الله علي سلامتك .

**muhmado_furp** · 16-11-2008 12:24 AM

محتاج ردودكم ياشباب ومحدش يتاخر عليا برايو حتى ولو كان شايفو مش مفيد

وربنا يحفظكم من شر الحوادث ومن شر الطرق
وابقو خلو بالكم من خطا الغير
وربنا يحفظنا ويحفظكم ويديكم خير عربياتكم ويكفيكم شرها

طبعا انا الحمد لله مش زعلان وراضي بقضاء الله طالما الواحد طلع منها سليم
والحمد لله ان الواحد عارف يكتب ويتكلم في المنتدى ههههه[/quote]

بجد بجد
الف مليون سلامه عليك والحمدلله انك قمت منها بالسلامه
وربنا يكفيك شرها
وان شاء الله هترجع كويسه والحمدلله علي كل شئ

طيب بالنسبه لموضوع انك تصلحها في التوكيل ولا بره
لا طبعا انا شايف ان كله بره
لان لو هتصلحها بره ب10 في التوكيل هيبقي ب30 او 40 وده علي سبيل المثال
وده لو موضوع الفلوس هيفرق معاك
لو مش هتفرق معاك يبقي التوكيل بس برضك النتيجه مش هتكون فارقه قوي

انا من رأئي بره احسن وده لاسباب
الاول انك تختار الصنايعيه علي كيفك عكس التوكيل
كمان عندك حريه في الفصال وانك توقف علي ايديهم
هيبقي عندك فرصه انك تتابع الموقف بالكامل

طيب انت محتاج معاك اصدقاء خبره في موضوع الصنايعيه وخصوصا بتوع الحوادث
ورائي كمان انك تتعرف علي ناس من المنتدي هنا من السنبلاوين او المنصورة او كفر الزيات
لانهم بصراحه اساتذه في شغل الحوادث ومصنعيه اقل بكتير من القاهره

وانا عربيتي دلوقتي بتتصلح في كفر الزيات لاني عملت بيها حادثه بس اخف منك شويه
وسيبها مع قرايبي هناك وهما بيتابعوا الموقف

فانت بجد فكر في كلامي وان شاء الله تلاقهيا موفقه

والف سلامه مره تانيه

**zeyad1810** · 16-11-2008 12:26 AM

حمد الله ع السلامة والمهم انك بخير

**boing** · 16-11-2008 12:34 AM

شكر ليكم كلكم

بس والله يا جماعه انا حاسس اني لو عملتها برا التوكيل يبقا بظلمها معايا وبظلم نفسي ولو الفرق على 5 الاف مثلا او 8 الاف يبقا التوكيل احسن مليون مره

غير كده الصنايعهه زي ماقلتم سككهم كتير ومابتخلصش وهيبقا الحوار متعب
روح هات قطع غيار تعالى بص
لكن التوكيل بتدخل بتطلع وانت مريح دماغك ومطن
وبالنسبه هل فلعلا التوكيل لو عملها مشهترجع مظبوطه تاني وهيبقا زيو زي الصنايعيه براا؟؟

مش عارف اعمل ايه بجد
ياريت بردو لو حديعرف يقولي بالشكل اللي وصفتهولكم ده هتتكلف كم تقريبا في التوكيل وبرا التوكيل مثلا

وشكر لكل اللي ردو عليا ومستني روددكم ووجودكم جنبي

**delpo** · 16-11-2008 12:39 AM

الحمد لله قدر الله وما شاء فعل دي اول مرة اكتب في المنتدى اي رد بس موضوعك فكرني بحادثة واحد صاحبي ربنا يغفرلو ويرحمو مات في حادث مشابه جدا للي بتقولو وكان سايق كورولا 2004 فا انا مش هقولك متزعلش وكلو يهون وكده لا انا هقولك احمد ربنا انها جت على قد كده وللاسف انا من المنصورة فا معرفش اقولك على حد معين في القاهرة بس نصيحتي اي حاجة في الصاج والحديد اعملها بره التوكيل بس الميكانيكة روح التوكيل اضمن