الموضوع: داخل 3 ثانوي وهموت من القلق :(

المشاركة الأصلية كتبت بواسطة mostafa bedo

علمي رياضة

طيب خد نصيحة بقى من معلم أول رياضيات

الرياضيات اللى انت درستها طول حياتك كوم
ورياضيات 2 كوم تانى خالص
الرياضيات لحد تانيه ثانوى بسيطه ولو انت مخك نظيف بتفهما بسهوله
والامتحانات فى السنوات السابقة بتيجى هايفه وتلاقى نفسك جايب درجات نهائية بدون مذاكره وتقول على نفسك انا زى الفل وعبقرى رياضيات وده مش حقيقى بسبب سهولة الامتحانات فى النقل وسياسه نجح وخلاص فى التربية والتعليم

فى تالته ثانوى المنهج كبير جدا والفروع كثيرة كل ما بتذاكر فرع هتنسى التانى

فى ثالته ثانوى محتاج استدعاء كل المعلومات اللى درستها فى الرياضيات من أول نظريات الهندسة فى أولى اعدادى لحد المتتابعات فى تانيه ثانوى طبعا بمساعده معلمك

أنا مش بعقدك بس بظهرلك الحقيقة ...... أعرف طلبه عباقره بس ملهومش خلق فى القعده والمذاكر بيعانوا دلوقتى فى الامتحانات وحالتهم النفسيه زى الزفت هما واهاليهم بسبب عدم تقديرهم الصح للأمور وبسبب تضيعهم للوقت طول السنة والغرور بعقلهم وعبقريتهم فقط والجرى ورا الدروس وخلاص بدون اى جهد فردى يذكر

امتحانات رياضيات 2 غالبا بيجى فيها افكار وبيحبوا يخترعوا علشان يظهروا الطالب المتميز
ده فيه أسئلة بتثير الجدل والخلاف بين المدرسين نفسهم هههههههههه وبصراحة انا شايف ان ده الصح

لازم تكون يتعشق الرياضيات وتحافظ على الثانية من وقتك وتستثمرها فى ما هو مفيد وتنسى الكافيها والبلاى ستيشن والحاجات اللى بتضيع الوقت وبتستمتع بمذاكرتها وعندك استعداد تقعد تذاكرها بالساعات وبلاش الهبل اللى بيحصل وتاخد اكتر من درس فى المادة واحد بتاع مسائل وواحد بتاع شرح والكلام الفارغ ده اللى بيضيع الوقت والفلوس

لازم تحل مسائل كثير جدا فيها لوحدك ومن نفسك مش مجرد واجب درس عاوز تخلص منه وخلاص

فى الحالة ديه فقط هتلاقى رياضيات 2 بقت متعة بالنسبة لك وحل المسائل هيبقى عندك اكثر متعه من القعده على الكافيهات والبلاستيشن
وهتبقى جاهز للامتحانات ديه وهتستمتع بيها وسنتك هتعدى على خير بإذن الله
وفرصتك هتبقى ممتازة ومضمونه بإذن الله تعالى فى دخول الكلية اللى تحبها

وبالتوفيق ان شاء الله