الموضوع: سؤال عن السويفت 94-95

بسال يا ملوك السوزوكى عن العربية دى و عن مميزاتها و عيوبها و خاصة انها اول عربية ليا يعنى مش عايز اتعقد من العربيات و الميكانيكية فيا ترى قطع الغيار موجودة و اعادة البيع و الاعطال نظامهم ايه ؟؟؟؟ و شكررررررررررررا

السوزوكي سويفت عربية حلوة بس بشرط الحالة بمعنى متكونش احلال لان كثير منها حاليا كانت تاكسي
مميزاتها : سيارة ناعمة - كويسة - قطع غيارها متوفرة ورخيصة - ثباتها معقول - اقتصادية في البنزين جدا .
عيوبها : العفشة ضعيفة نسبيا - الموتور ضعيف شوية بحكم انة 1300 سي سي يعني مش عايز حرق غيارات كتير لكن لو طريقة السواقة هادية الموتور هيعيش معاك .
لو السيارة موديل 93-94 دي تبقى تقفيل ياباني لو بعد كدة بيبقى تقفيل مصري
السيارة محافظة على سعر من 25 الى27 الف لو السيارة نظيفة والدواخل كويسة .
ملحوظة هامة في المعاينة : بص كويس على ركب المساعدين وخصوصا الركب الخلفية ميكونش فيها لحامات
وبص على القوايم وخصوصا اللي في النصف بين البابين - بالنسبة للموتور في خرطوم من غطاء التكاهات والعمة لو الخرطوم دة معرق زيت يبقى الموتور خفيف وممكن تدوس على دواسة البنزين دوسة عالية شوية لمدة 10 ثواني واسمع صوت الموتور في الفترة دي لو في صوت نقر في الموتور يبقى الموتور خفيف .