إيه اللي بيحصل ده ..؟؟حد عنده حل طيب ؟؟؟؟

أنا مسجل في المنتدى من سنة 2011 تقريبا ..آه من شهر 6 سنة 2011 ..وبصراحه مكنش ليا إهتمام بالمنتدى أو بعالم السيارات ..بس بدأ إهتمامي بالموضوع ده يزيد من أول ما جبت العربية اللي معايا حاليا ..وخصوصا لما واجهت مشكلة جوان وش السلندر والكعبله اللي كانت حاصله..ربنا ما يعيدها أيام ..وطبعا ما أنساش أبدا تفاعل الأعضاء معايا هنا وقد إيه كان في ناس مهتمه لدرجة إن في ناس حطت أرقام تليفوناتها عشان أتواصل معاها عشان يحلو لي المشكلة في حل المشكلة لغاية ما تم حل المشكلة نهائيا ولله الحمد ..ومن يوميها حسيت إن أنا علي دين تجاه الناس اللي هنا ..سواء اللي أعرفها أو اللي معرفهاش ..والدين ده بحاول أوفيه بإني أدخل أساعد أي حد بمعلومة أو أفيد أي حد بخبرتي في أي حاجه ..مش في العربيات بس ..لأ ..في الحياه عامة سواء مثلا في الكهرباء أو في الكمبيوتر ..اي حاجه أي حاجه أقدر أساعد بيها ما أتأخرش عشان خاطر الشخص اللي أنا بساعده ده دخل المكان ده ...

ولكن ...

اللي لاحظته إن المنتدى بدأ التفاعل يقل فيه ..أو بلغة أكثر فجاجه ..المكان بدأ يتهجر!! ..آه .زي ما بقولها كده ..المنتدى بدأ يتهجر ..مش عارف إيه السبب ..بس في ناس المنتدى خسرها ..وده كان بسبب الإيقاف ..زي مثلا العضو ..صدام ..وأكيد الأعضاء القدامى عارفينه أكتر مني ..وده كان بسبب إنه إتوقف كذا مره إلى أن أخد إيقاف نهائي ..بصراحه أنا تابعت مشاركات العضو صدام ده ملقيتوش غلط في حد أو أساء ليه إساءه شخصية ..مع إن في تجاوزات دلوقتي تفوق تجاوزات العضو ..صدام .. ده ومفيش أي إجراء بيتاخد !!!!!

وفي ناس هي اللي خسرت المنتدى ..زي مثلا الدكتور مصطفى الصعيدي..أنا عرفت إسمه كده من الفيس بوك لكن أنا شفت ليه مشاركات قديمه هنا ومش فاكر بصراحه إسمه اللي كان مسجل بيه هنا إيه بس أنا عرفته هنا من صورته ..أهو ده كان من الأعضاء النشيطين جدا جدا جدا هنا في المنتدى ..وكان نشط جدا في قسم السوزوكي ..على فكره ..ده من ضمن الأعضاء اللي راحو الفيس بوك ..وليهم نشاط جامد جدا على الجروبات بتاعت السوزوكي على الفيس بوك ..برضه معرفش إيه اللي كان يمنعه من التواجد هنا وعلى الفيس بوك

وفي ناس إختفت في ظروف غامضه ..يعني الناس دي لا إتوقفت ولا حد جه جنبها ..ده هي سابت المنتدى و مراحتش حته تانيه ..زي ..الدكتور حازم ..مثلا وده كان في قسم السوزوكي ..وكان في الزميل ..ظريف ..اللي كان كاتب في التوقيع بتاعه إسمي حسن مصطفى ....والغريب إن الزميل ..ظريف .. ده شفتله مشاركه في منتدى تاني يعتبر من المنتديات المشهوره برضه للسيارات ..حتى أنا عملت مشاركه سلمت عليه فيها وقلتله إيه اللي جابك هنا ياراجل؟؟ .محدش شايفك ..قالي والله مشاغل ..والغريب بقى إن المشاركه اللي هو عملها هناك مجاش عملها هنا برضه ..الله ..ده شكله واخد موقف بقى ؟؟

وكان في زميل برضه هنا إسمه ..أبو حبيبه ..وده كان من مشاغبي قسم الشارع السياسي ..وده برضه إتوقف نهائيا ودوره إنتهى تماما بغلق قسم الشارع السياسي ..

وأكيد في أمثلة تانيه كتير مش حضراني أو فيه أعضاء تانيين كتير أنا مش عارفهم ..وجه شهر رمضان برضه والمتندى فعلا مات خااااااالص ..طيب شهر رمضان وهيعدي وبإذن الله نكون من الرابحين في الشهر ده ..بس برضه ..الناس راحت فين؟؟ ..الناس اللي سابت المنتدى بدون سبب سابته ليه ..؟؟يمكن الظروف ؟؟..يمكن الفيس بوك عامل شغل أكتر وفيه تفاعل أكتر ؟؟..طيب هو مش ممكن إدارة المنتدى تفعل صفحته على الفيس بوك شوية عن كده ؟؟...للأسف في ناس بتدخل بعضويات جديده في المنتدى وبتبقى تقريبا أول مشاركه ليها بتسأل عن مشكلة معينة ..متلاقيش حد رد ..أو اللي يرد يكون برضه عضو جديد ..طيب فين الأعضاء الذهبيين والبلاتينيين والماسيين؟؟ ..طيب فين المشرفين؟؟ ..هتقولي موجودين ..موجودين آه ..بس مفيش متابعه من المشرفين ..في موقف حصل معايا الإسبوع اللي فات هنا في المنتدى وفي قسم الإسكودا بالذات ..واحد داخل بيسال عن نقص في المياه في الفيفوريت بتاعته ..وفي نفس الوقت غليان في القربه ..فدخل أحد الأعضاء الكبار اللي في القسم بدون ذكر إسمه لإن أنا مش في خصومه معاه ..دخل العضو ده وقال إفادة لصاحب المشكلة ..وأنا دخلت علقت على الإفاده دي إن هي ناقصه ومش كامله ..يعني أنا بقول لصاحب الإفادة اللي هو العضو الكبير اللي في القسم إن صاحب المشكلة بيسأل عن غليان في القربه والإفاده بتاعتك مفيهاش رد على جزئية الغليان اللي في القربه ..طبعا رد عليا رد مش حلو ..وكان فيما معنى رده ملكش دعوه إنت أنا شغلتي هنا إني أحل مشاكل الناس وأنا أعرف أكتر منك لإن أنا معايا فيفوريت من سنة 94 وحافظها .طبعا إعتذرت ومعملتش مشاركات تاني في القسم ده ..الغريب بقى ..إن صاحب المشكلة محلش مشكلته ..والسيد العضو الكبير متابعش أصلا مع صاحب المشكلة عشان يعرف إيه اللي حصل ..ده حتى صاحب المشكلة سأل على حاجه محدش رد عليه

أنا بدي مثال لعدم متابعة الأعضاء القدامى أو المشرفين لمشاكل الناس ومتابعتها ..وبرضه معرفش ليه ..يمكن قلة الوقت؟؟ ..يمكن قلة المزاج؟؟ ..عشان الحالة العامة للبلد واللي إحنا فيه ..يمكن قسم الشارع السياسي كان بيعمل تفاعل شوية وبإغلاقه تم القضاء على ما بقى من أي تفاعل؟؟ ..مش عارف ..طيب ما دام الفيس بوك واكل الدنيا كده ما يتم تفعيل الصحفه بطرح مواضيع على صفحة الفيس بوك عشان الناس تدخل وتتفاعل ..بصراحه أنا صعبان عليا الحال قوي ..المنتدى ده كان بيشغي كده بالأعضاء ..ووصلنا دلوقتي لمرحلة إن الأعضاء بيختفوا في ظروف غامضه ...

حد عنده أي فكره أو أي مقترح يخلي المنتدى ده يصحى شويه ..؟؟؟؟

لا تنس ان الفيس ضرب جميع المنتديات
دلوقت الموجود فى منتدى بيكون حابب اسلوب المنتديات
انا كنت فى منتدى من اعلى المنتديات العربية و كان ترتيبه بيوصل الستين الف على الشبكة و كان فيه كتاب و نشطاء و شغب ليل نهار بين اسلاميين و نصارى و علمانيين و شيعة و ملحدين...كان ناقصه يهود و بوذيين
حتى لجان اليكترونية من الجيش كانت فيه
دلوقت معظم اعضائه هجروه ايضا لدرجة ان صاحبه قال متهكما"شكلى هاقلبه فول و طعمية"

اقتباس:

---

المشاركة الأصلية كتبت بواسطة volociximab

لا تنس ان الفيس ضرب جميع المنتديات
دلوقت الموجود فى منتدى بيكون حابب اسلوب المنتديات
انا كنت فى منتدى من اعلى المنتديات العربية و كان ترتيبه بيوصل الستين الف على الشبكة و كان فيه كتاب و نشطاء و شغب ليل نهار بين اسلاميين و نصارى و علمانيين و شيعة و ملحدين...كان ناقصه يهود و بوذيين
حتى لجان اليكترونية من الجيش كانت فيه
دلوقت معظم اعضائه هجروه ايضا لدرجة ان صاحبه قال متهكما"شكلى هاقلبه فول و طعمية"

---

طيب هو إيه ميزة الفيس بوك عن المنتدى ؟؟...طيب ما هو ممكن إدارة المنتدى تنشط الصفحه بتاعة نايل موتورز على الفيس بوك

1- لان مفيش اشراف فعال وده اهم سبب
ممكن تكتب فى موضوع وتلاقى واحد رد بكلام ما يصحش
تبعت تقارير مشاركة وشكوى ومفيش حد يرد او ياخد اجراء
2- مواضيع كتير جديدة ممكن العضو عنها يعمل بحث ويلاقى الرد
زى مثلا موضوع عن غطاء العربية مشمع ولا قماش
انذار ولف ولا سباى .
3- العناوين عينة ساعدونى . سؤال
صاحب الموضوع مش كاتب عنوان واضح
وممكن بعد دخول الموضوع ماكنش عارف حل ليه
فبطلت ادخل المواضيع دى
فكل ده بيخللى التواجد قليل

الفيس هو كلمة السر،لسهولة ادراج الصور و الفيديوهات ،انا عضو فى المنتدى من خمس سنين تقريبا والفيس واخد الكل

رأى الشخصى ان المنتدى فقد نقطة التفاعل و اصبح مجرد ارشيف بس الصراحة ارشيف ممتاز
تقدر تقرأ فيه معلومات و تجارب مفيدة جدا لكن للاسف اصحابها مش موجودين عشان تناقشهم فيها

حقيقى المنتدى عايز تجديد جذرى ف نواحى كتير و دى مسئوليه الادارة بنسبة 80%

اللي شاف المنتدي في 2007/2008 يعرف قد ايه

المنتدي كان شغال
اقل موضوع تعبان كان بالخمس صفحات ردور
بعض اﻻيقافات الصعبه كانت سبب في طفشان الناس من المنتدي
باﻻضافه لجروبات الفيس

طيب بالنسبه للجزئيه بتاعة إن العضو ممكن يعمل بحث ..ما هو أكيد تلاقيه ما يعرفش ..لإن اللي داخل بيسأل ما بيبقاش منتداوي قديم ..ده بيبقى داخل رامي إستفسار وماشي ..طيب ما هو ده بقى دور المشرفين والأعضاء القدامى يقولوا إعمل بحث بالطريقه الفلانيه ودور بالطريقه العلانيه ..كده يعني ..بالنسبه بقى للعناوين المختصره فاعتقد إن دي مش مشكله ..لإن سواء السؤال ليه عنوان واضح أو ملوش عنوان واضح ففي كلا الحالتين لو حضرتك عارف هتشارك ..لو حضرتك مش عارف هتكتفي بالمشاهده


طيب السؤال برضه ..ليه إدارة المنتدى ما تهتمش بصفحة المنتدى على الفيس بوك؟؟؟

اقتباس:

---

المشاركة الأصلية كتبت بواسطة monamize4

رأى الشخصى ان المنتدى فقد نقطة التفاعل و اصبح مجرد ارشيف بس الصراحة ارشيف ممتاز
تقدر تقرأ فيه معلومات و تجارب مفيدة جدا لكن للاسف اصحابها مش موجودين عشان تناقشهم فيها

حقيقى المنتدى عايز تجديد جذرى ف نواحى كتير و دى مسئوليه الادارة بنسبة 80%

---

طيب إيه أوجه التجديد المقترحه اللي ممكن الإدارة تعملها ..؟؟؟

اقتباس:

---

المشاركة الأصلية كتبت بواسطة hugan

اللي شاف المنتدي في 2007/2008 يعرف قد ايه

المنتدي كان شغال
اقل موضوع تعبان كان بالخمس صفحات ردور
بعض اﻻيقافات الصعبه كانت سبب في طفشان الناس من المنتدي
باﻻضافه لجروبات الفيس

---

أنا معاك إن الإيقافات فعلا كانت مشكلة ..أنا أعتقد إن أكتر عضو إتظلم في موضوع الإيقافات ده ..كان العضو صدام ..مع إني معرفوش شخصيا والله ..بس لما شفت مشاركاته وردوده عرفت قد إيه كان مجتهد ومواضيعه كلها إفادة للآخرين

اقتباس:

---

المشاركة الأصلية كتبت بواسطة fourseasons

الفيس هو كلمة السر،لسهولة ادراج الصور و الفيديوهات ،انا عضو فى المنتدى من خمس سنين تقريبا والفيس واخد الكل

---

طيب ما هنا برضه إدراج الصور والفيديوهات سهل برضه ..هو ليه شوية خطوات كده بس عادي ..وممكن الإدارة تثبت موضوع عن طريقة إدراج الصور والفيديوهات ..إيه المانع

فى الفيس انت المتحكم فى كل شيء-و ممكن تلغى كلامك او تغيره بعد سنه و كل كلمة بتكتبها بيشوفها كل الجروب و ممكن انت نفسك تعمل جروب و تكون متحكم فى كل شىء
القيود اقل
التفاعل اعلى
حتى السمارت فون بيساعدك
فى المنتدى التحكم اقل و كل شوية تدخل المنتدى تشوف كلامك حصل معاه ايه و القيود اعلى
لكن ميزة المنتديات هى قلة الهلس و المسخرة و طولة اللسان نتيجة القيود
الفيس بحرررررر دولة او ممكن تكون قارة من الناس انت حاسس انك قاعد معاهم و ممكن يشوفوا كلامك

قله تفاعل الاعضاء ليه ؟؟؟ اعتقد بسبب الظروف الحاليه اللي بنعيشها كلها

عدم اهتمام الاداره ليه ؟؟؟ عشان ارباح الاعلانات شغاله بشكل طبيعي سواء عن طريق الاعضاء او الزوار

فمش مهم اوي التفاعل نفسه طول ما الاعضاء بيخشوا علي المنتدي و الزوار كمان

انا عن نفسي لو مدير المنتدي هفكر كده :)))

للأسف .. الإدارة التقنية للمنتدى سيئة للغاية
بداية من طريقة التسجيل بالمنتدى وعدم السماح للزوار بالتفاعل
وحتى طريقة عرض الموضوعات المميزة بالمنتدى
العديد من التفاصيل يجب أن يتم تطويرها بشكل جاد
المنتدى يستخدم نسخة قديمة من نسخة vbulletin
توجد العديد من الاضافات التي يحب إضافتها واخرى يحب تنقيحها
لماذا يوجد زرين للإعجاب والشكر تحت كل مشاركة
زر واحد يكفى لإظهار الاهتمام بالمشاركة
لماذا لا يسمح بتسجيل العضوية او تسجيل الدخول من خلال حساب الفيس بوك
وتوفير الوقت اللازم لملأ البيانات
القسم السياسي لماذا لا يكون مخفى للزوار وللاعضاء الجدد
ويظل ساحة للنقاش الهادف بين الأعضاء
توجد العديد من الوسائل لتقليد الفيس بوك والاستفادة من اليه عرضه للموضوعات القيمة
يجب فتح باب للاقتراحات مع وجود اهتمام من الإدارة بتنفيذ المقترحات

المنتدى زمان كان فى منتهى الجمال انما دلوقتى بقى زيه زى حال كل حاجة

انا افتكر ايام العز ايام كان القسم الأجتماعي ده اسمه احوال شارعنا تقريبا
trend حاليا كله تقريبا لل social media و bloggers
في منتديات كتير اتقفلت واتهجرت والأسوء ان في منتديات اتدمر محتواها ابرزها Yahoo maktoob ضربه كبيره للمحتوى العربي ال ملوش وجود اساسا
لكن انا شايف المنتديات المتخصصه واقسامها زي منتدانا صعب انها تتهجر
المنتديات تتفوق في الارشفه والبحث وفي فراغ اتخلق في غيابها
ممكن trend يرجع للمنتديات تاني لما نحس بالفجوه ال تخلقت
او تتطور social media و bloggers وتقضي على عيوبها ونتحول كلنا ليها
او يطلعولنا بحاجه جديده
على العموم معتقدش ان المنتدى يتقفل

المفروض ان يكون اسفل كل مشاركة زرين
زر (like) وآخر (unlike) بدلا من الاعجاب والشكر لان الاثنين واحد

اقتباس:

---

المشاركة الأصلية كتبت بواسطة مُصْطٓفٓى

للأسف .. الإدارة التقنية للمنتدى سيئة للغاية
بداية من طريقة التسجيل بالمنتدى وعدم السماح للزوار بالتفاعل
وحتى طريقة عرض الموضوعات المميزة بالمنتدى
العديد من التفاصيل يجب أن يتم تطويرها بشكل جاد
المنتدى يستخدم نسخة قديمة من نسخة vbulletin
توجد العديد من الاضافات التي يحب إضافتها واخرى يحب تنقيحها
لماذا يوجد زرين للإعجاب والشكر تحت كل مشاركة
زر واحد يكفى لإظهار الاهتمام بالمشاركة
لماذا لا يسمح بتسجيل العضوية او تسجيل الدخول من خلال حساب الفيس بوك
وتوفير الوقت اللازم لملأ البيانات
القسم السياسي لماذا لا يكون مخفى للزوار وللاعضاء الجدد
ويظل ساحة للنقاش الهادف بين الأعضاء
توجد العديد من الوسائل لتقليد الفيس بوك والاستفادة من اليه عرضه للموضوعات القيمة
يجب فتح باب للاقتراحات مع وجود اهتمام من الإدارة بتنفيذ المقترحات

---

شوية ملحوظات مهمة بصراحه ..وياريت بقى الموضوع يكمل الموضوع بإهتمام الإدارة بدارسة الإقتراحات دي وإمكانية تنفيذها

اقتباس:

---

المشاركة الأصلية كتبت بواسطة hilal

المفروض ان يكون اسفل كل مشاركة زرين
زر (like) وآخر (unlike) بدلا من الاعجاب والشكر لان الاثنين واحد

---

ماهو تنفيذ الإقتراح ده يعتبر برضه من ضمن الحاجات الصغيره اللي هتطور في أداء وشكل المنتدى

اقتباس:

---

المشاركة الأصلية كتبت بواسطة hilal

المفروض ان يكون اسفل كل مشاركة زرين
زر (like) وآخر (unlike) بدلا من الاعجاب والشكر لان الاثنين واحد

---

كان فيه فعلا زر like و dislike ايام ما انشئ منتدى أحوال الشارع المصرى - السبب الرئيسى فى انخفاض الاقبال على المنتدى عامة

واذكر ايامها ان زر dislike تحول الى سلاح يستخدمه فريق ضد من يخالفه فى فريق آخر

وده كان أول شرخ اصاب المنتدى الذى كان اهم مايميزه الترابط الانسانى بين الاعضاء وتم الغاء زر dislike تجنبا للمشاكل

قبل كده كان كلام الناس عن السيارات فقط
انما الان الوضع يختلف

الموضوع له أكثر من اتجاه كلها اتحدت وتسببت في الموضوع ده والإخوة اللي ردوا هنا ذكروا كل الأسباب تقريبا وممكن ألخصها أنا في النقاط اللي شايفها هي السبب الرئيسي من وجهة نظري
التطوير التقني للمنتدى ضعيف فعلا يستخدم نسخة قديمة وتوجد هاكات كتير جدا بتسهل أمور كتيرة وتخلي التفاعل أفضل وأسرع بس للأسف الإدارة التقنية مش متابعة ويكفي بصة لمنتدى كبير زي فتكات مثلا وانت تعرف الموضوع ده أو أي منتدى تاني بيتطور باستمرار حتى إن في بعض المشاكل التقنية البسيطة ممكن تقعد فترة طويلة على ما حد يحلها زي مثلا تعطل زر الاقتباس المتعدد وده ليه فترة ومحدش صلحه وحاجات كتير من العينة دي
برده موضوع القوانين الصارمة زيادة عن اللزوم طفشت ناس كتير ومنها الوقف الجماعي والوقف أقل حاجة أسبوع وأحيانا تلاقي نفسك معملتش مخالفة جامدة أوي تستاهل الوقف العنيف ده وتلاقي واحد تاني مبهدل الدنيا وبرده هو الأسبوع فتحس انك اتظلمت وكمان الأسبوع بعد ما بيعدي بتحس بوحشة بينك وبين المنتدى مش وحشة انه بيوحشك ! لأ قصدي غربة يعني كل يوم بيعدي بيبعدك عن المنتدى فتلاقي نفسك بعد الأسبوع اتعودت على البعاد فممكن تقعد فترة طويلة على ما تفكر ترجع
موضوع الفيس بوك برده عامل مهم جدا ولاشك لأنه أسرع في التواصل بلا جدال وموضوع الإشعارات اللي بتيجي على الموبايل لو حد رد عليك أو بعتلك رسالة خاصة لكن المنتدى بتضطر تفتح متصفح الإنترنت الأول وبعدين تفتح المنتدى وبعدين تشوف حد رد عليك ولا لأ فحوار طويل مش مناسب للرتم السريع اللي بنعيشه دلوقتي
حتى برده مفيش تطبيق موبايل يملى العين يغنيك عن فتح متصفح الإنترنت
كمان أنا سألت شخصيا أكتر من عضو من الأعضاء المخضرمين القدامى عن سبب عزوفهم عن المنتدى وقلة مشاركاتهم فبرروا ده بسببين أولهم موضوع الفيس بوك وإنه أسرع زي ما قلت والحاجة التانية دخول بعض الشخصيات الغريبة والغير سوية والخناقات اللي سببتها السياسة واختلاف الآراء واللي طبعا بتقلب غالبا لشتيمة واتهامات متبادلة كما هو الوضع العام يعني .. هتقولي طب ما الفيس كده وأمر ! هقولك الفيس سهل مثلا تعمل بلوك لواحد تماما أو تحذف رده من البوست بتاعك وسهل تنقي الصفحات اللي عايز تدخلها وتبقى ضامن ان مفيهاش وجع دماغ غير المنتدى اللي بتجبر انك تقرأ تعليقات ناس متعرفهاش ومش على هواك ومتعرفش تحذفها طبعا اللهم إلا إذا عملت تقرير مشاركة سيئة ويا عالم هتتشال برده ولا لأ أو صاحبها هيتوقف أو انت اللي هتتوقف ! لكن الفيس مثلا أنا مش بضيف حد غير لما بكون أعرفه معرفة شخصية وبالتالي ضامن إنه حتى لو مش موافق لآرائي ولكنه هيكون محترم ومش هيقل أدبه لا عليا ولا على حد أعرفه ولو عمل كده هيكون مصيره البلوك فبقدر أتحكم في العالم الافتراضي بتاعي
من ضمن التقييدات برده والقوانين الصارمة في المنتدى عدم إمكانية تعديل المشاركة بعد مرور 10 دقائق !! وبعد محاولات مني شخصيا وتحايلات برده الإشراف وافق على تعديلها إلى 20 دقيقة !! ودي مشكلة كبيرة .. ليه ؟ لأن ممكن في لحظة غضب تكتب رد لو بصيت عليه بعد نص ساعة مثلا أو ساعة تقول ازاي أنا كتبت الكلام ده ! وتبقى عايز تحذفه أو تعدله ولكن للأسف بعد فوات الأوان ! لكن الفيس في أي لحظة ولو بعد 10 سنين ممكن تعدله أو تحذفه براحتك
آخر حاجة وأهم حاجة موضوع اختلاف الآراء السياسية وعدم وجود احترام متبادل بين كثير من الأعضاء خلى ناس كتيرة دماغها ورم من الحوارات دي انها تروح للعالم الافتراضي بتاعها اللي بتقدر تتحكم فيه براحتها وأنا شخصيا بحاول أعمل كده لأن صفحتي على الفيس شبه معليهاش حاجة غير لصفحات تقنية وبرمجية أو خدمية وما شابه إلا أني مش بقدر أبعد عن المنتدى برده لأن فيه روح صعب تلاقيها في الفيس وما يزال فيه قدر من الاحترام والعقول الناضجة الواعية مش هتلاقيه في الفيس وده برده يمكن يكون بسبب القوانين الصارمة اللي هي سلاح ذو حدين
والمنتدى على سلبياته إلا أني شايف إن إيجابياته أكتر والفائدة اللي بتعود علي منه شخصيا بتبقى غالبا أكتر من الفيس حتى لو أبطأ إلا أني حجم الإفادة بيكون أكبر وأكثر دقة على عكس الفيس اللي بيبقى عامل زي التيك أواي لكن المنتدى بيبقى فيه مكان خاص بالعائلات :)
وعلى فكرة أنا نصف اللي عندي على الفيس أساسا من المنتدى :)
آسف على الرغي الكتير لكن الموضوع شدني وحبيت أدلي بدلوي

اقتباس:

---

المشاركة الأصلية كتبت بواسطة أبو آسر

الموضوع له أكثر من اتجاه كلها اتحدت وتسببت في الموضوع ده والإخوة اللي ردوا هنا ذكروا كل الأسباب تقريبا وممكن ألخصها أنا في النقاط اللي شايفها هي السبب الرئيسي من وجهة نظري
التطوير التقني للمنتدى ضعيف فعلا يستخدم نسخة قديمة وتوجد هاكات كتير جدا بتسهل أمور كتيرة وتخلي التفاعل أفضل وأسرع بس للأسف الإدارة التقنية مش متابعة ويكفي بصة لمنتدى كبير زي فتكات مثلا وانت تعرف الموضوع ده أو أي منتدى تاني بيتطور باستمرار حتى إن في بعض المشاكل التقنية البسيطة ممكن تقعد فترة طويلة على ما حد يحلها زي مثلا تعطل زر الاقتباس المتعدد وده ليه فترة ومحدش صلحه وحاجات كتير من العينة دي
برده موضوع القوانين الصارمة زيادة عن اللزوم طفشت ناس كتير ومنها الوقف الجماعي والوقف أقل حاجة أسبوع وأحيانا تلاقي نفسك معملتش مخالفة جامدة أوي تستاهل الوقف العنيف ده وتلاقي واحد تاني مبهدل الدنيا وبرده هو الأسبوع فتحس انك اتظلمت وكمان الأسبوع بعد ما بيعدي بتحس بوحشة بينك وبين المنتدى مش وحشة انه بيوحشك ! لأ قصدي غربة يعني كل يوم بيعدي بيبعدك عن المنتدى فتلاقي نفسك بعد الأسبوع اتعودت على البعاد فممكن تقعد فترة طويلة على ما تفكر ترجع
موضوع الفيس بوك برده عامل مهم جدا ولاشك لأنه أسرع في التواصل بلا جدال وموضوع الإشعارات اللي بتيجي على الموبايل لو حد رد عليك أو بعتلك رسالة خاصة لكن المنتدى بتضطر تفتح متصفح الإنترنت الأول وبعدين تفتح المنتدى وبعدين تشوف حد رد عليك ولا لأ فحوار طويل مش مناسب للرتم السريع اللي بنعيشه دلوقتي
حتى برده مفيش تطبيق موبايل يملى العين يغنيك عن فتح متصفح الإنترنت
كمان أنا سألت شخصيا أكتر من عضو من الأعضاء المخضرمين القدامى عن سبب عزوفهم عن المنتدى وقلة مشاركاتهم فبرروا ده بسببين أولهم موضوع الفيس بوك وإنه أسرع زي ما قلت والحاجة التانية دخول بعض الشخصيات الغريبة والغير سوية والخناقات اللي سببتها السياسة واختلاف الآراء واللي طبعا بتقلب غالبا لشتيمة واتهامات متبادلة كما هو الوضع العام يعني .. هتقولي طب ما الفيس كده وأمر ! هقولك الفيس سهل مثلا تعمل بلوك لواحد تماما أو تحذف رده من البوست بتاعك وسهل تنقي الصفحات اللي عايز تدخلها وتبقى ضامن ان مفيهاش وجع دماغ غير المنتدى اللي بتجبر انك تقرأ تعليقات ناس متعرفهاش ومش على هواك ومتعرفش تحذفها طبعا اللهم إلا إذا عملت تقرير مشاركة سيئة ويا عالم هتتشال برده ولا لأ أو صاحبها هيتوقف أو انت اللي هتتوقف ! لكن الفيس مثلا أنا مش بضيف حد غير لما بكون أعرفه معرفة شخصية وبالتالي ضامن إنه حتى لو مش موافق لآرائي ولكنه هيكون محترم ومش هيقل أدبه لا عليا ولا على حد أعرفه ولو عمل كده هيكون مصيره البلوك فبقدر أتحكم في العالم الافتراضي بتاعي
من ضمن التقييدات برده والقوانين الصارمة في المنتدى عدم إمكانية تعديل المشاركة بعد مرور 10 دقائق !! وبعد محاولات مني شخصيا وتحايلات برده الإشراف وافق على تعديلها إلى 20 دقيقة !! ودي مشكلة كبيرة .. ليه ؟ لأن ممكن في لحظة غضب تكتب رد لو بصيت عليه بعد نص ساعة مثلا أو ساعة تقول ازاي أنا كتبت الكلام ده ! وتبقى عايز تحذفه أو تعدله ولكن للأسف بعد فوات الأوان ! لكن الفيس في أي لحظة ولو بعد 10 سنين ممكن تعدله أو تحذفه براحتك
آخر حاجة وأهم حاجة موضوع اختلاف الآراء السياسية وعدم وجود احترام متبادل بين كثير من الأعضاء خلى ناس كتيرة دماغها ورم من الحوارات دي انها تروح للعالم الافتراضي بتاعها اللي بتقدر تتحكم فيه براحتها وأنا شخصيا بحاول أعمل كده لأن صفحتي على الفيس شبه معليهاش حاجة غير لصفحات تقنية وبرمجية أو خدمية وما شابه إلا أني مش بقدر أبعد عن المنتدى برده لأن فيه روح صعب تلاقيها في الفيس وما يزال فيه قدر من الاحترام والعقول الناضجة الواعية مش هتلاقيه في الفيس وده برده يمكن يكون بسبب القوانين الصارمة اللي هي سلاح ذو حدين
والمنتدى على سلبياته إلا أني شايف إن إيجابياته أكتر والفائدة اللي بتعود علي منه شخصيا بتبقى غالبا أكتر من الفيس حتى لو أبطأ إلا أني حجم الإفادة بيكون أكبر وأكثر دقة على عكس الفيس اللي بيبقى عامل زي التيك أواي لكن المنتدى بيبقى فيه مكان خاص بالعائلات :)
وعلى فكرة أنا نصف اللي عندي على الفيس أساسا من المنتدى :)
آسف على الرغي الكتير لكن الموضوع شدني وحبيت أدلي بدلوي

---

رغي إيه يا راجل ..ده إنت جبت المفيد و قلت اللي فيها في كلمتين وبس :plusone2:

لازم حد يعمل منشن لكريم منير يرد علينا هنا :E_braces[1]:

انا بالنسبالى هجرت المنتدى لبطئ الرد فى الايام الاخيرة ولجأت للفيس لسرعة الرد وأكثر من شخص
السنين اللى فااتت كانت أحلى بكتير من دلوقتى
ونا واحد من الناس كنت بكره اسلوب المنتديات بس سبحان الله المنتىدى الوحيد اللى كنت عامل فى اكونت

المنتدي معدش مشوق فعلا زي زمان ...ا
زمان مكنش يعدي يوم من غير متلاقي مواضيع تشدك وتفضل متابعها بالأيام ..

اعضاء محترمين كتير كانت ممكن تقعد ساعات تـ search عشان تكتب رد يفيد الناس .
وعشان عارفيين إن في هنا ناس كتير فاهمين .. ماينفعش يتقالهم كلام مش مقنع .

حتي مشاكسات الأوروبي والكوري كانت ممتعه زمان ..
كانت أيام حلوة.

باختصار شديد قوي عايزين تقارنو نظام زي ال vb باقوى وسيله تواصل اجتماعي في العالم
مش شايفين انكم بتظلمو المنتدي بشده
التطوير لل vb بطئ والهاكات ليها ثغرات امنيه كتير جدا
المنتدي كان غني بمحتوى اعضائها
دلوقتي اعضائه ضافو بعض عالفيسبوك والجروبات واكتفو بيه
مطلوب من الاداره ايه بقي
احنا في مرحله تطوير شامل للمنتدي وتجهيز ابلكيشن محترم للموبايل


لكن فيه قاعده لازم كلنا نتفق عليها
بعد ٢٠١١ حصل انقسامات كتير بين المصريين
وطلعت اسوء ما في النفس البشريه
وده نتيجته اللي شفناه كلنا علي الصفحات
وقفلنا الجزء السياسي نهائي


لكن اي عضو مش عايز يدخل المنتدي مش هاتحايل عليه
ومحدش يقارن نايل موتوز بفتكات
لان الستات مبتميلش للفيسبوك عاده ولاقيين نفسهم هناك
لكن بصو علي كل المنتديات التقنيه سواء موبايلات او كمبيوتر
الكمبيوتر الكفي وعرب هارد وير وغيرهم كتير
تراجعو بنسبه كبيره وبرضه بسبب الفيسبوك

اقتباس:

---

المشاركة الأصلية كتبت بواسطة karim_monir

باختصار شديد قوي عايزين تقارنو نظام زي ال vb باقوى وسيله تواصل اجتماعي في العالم
مش شايفين انكم بتظلمو المنتدي بشده
التطوير لل vb بطئ والهاكات ليها ثغرات امنيه كتير جدا
المنتدي كان غني بمحتوى اعضائها
دلوقتي اعضائه ضافو بعض عالفيسبوك والجروبات واكتفو بيه
مطلوب من الاداره ايه بقي
احنا في مرحله تطوير شامل للمنتدي وتجهيز ابلكيشن محترم للموبايل


لكن فيه قاعده لازم كلنا نتفق عليها
بعد ٢٠١١ حصل انقسامات كتير بين المصريين
وطلعت اسوء ما في النفس البشريه
وده نتيجته اللي شفناه كلنا علي الصفحات
وقفلنا الجزء السياسي نهائي


لكن اي عضو مش عايز يدخل المنتدي مش هاتحايل عليه
ومحدش يقارن نايل موتوز بفتكات
لان الستات مبتميلش للفيسبوك عاده ولاقيين نفسهم هناك
لكن بصو علي كل المنتديات التقنيه سواء موبايلات او كمبيوتر
الكمبيوتر الكفي وعرب هارد وير وغيرهم كتير
تراجعو بنسبه كبيره وبرضه بسبب الفيسبوك

---

طيب مش المنتدى ليه صفحه على الفيس بوك ؟؟....

ليه ما يتمش تفعيل الصفحه دي ؟؟..وتكون أحد وسائل جذب الناس للمنتدى ..والله في ناس ما تعرفش يعني إيه منتديات ولا تعرف تتعامل معاها ..ولما بيدخلوها ويشوفوا النظام بتاعها بتعجبهم المنتديات وبيستمروا فيها

هاها
يبقي انت مش متابع بقي
صفحة الفيسبوك بينزل عليها يوميا مش اقل من 10 موضوعات من المنتدي للفيسبوك
بس هو داميا بيكون في تراجع في الترافيك في رمضان عشان العباده والميديا بتاخد الناس اكتر سواء برامج او مسلسلات وكدة

اقتباس:

---

المشاركة الأصلية كتبت بواسطة karim_monir

هاها
يبقي انت مش متابع بقي
صفحة الفيسبوك بينزل عليها يوميا مش اقل من 10 موضوعات من المنتدي للفيسبوك
بس هو داميا بيكون في تراجع في الترافيك في رمضان عشان العباده والميديا بتاخد الناس اكتر سواء برامج او مسلسلات وكدة

---

يابيه أنا ببص على الصفحه اللي على الفيس بوك ..فعلا مش هو ده عدد ا لمشاركات اللي انا بلاقيه في صفحات تانيه ..أنا بصراحه من قبل رمضان ما دخلتهاش من زهقي من قلة التفاعل عليها

هو انا مش عارف انت بتبص في انهي صفحه علي الفيسبوك ممكن تديني اللينك بتاعها
وبعدين مش انت بتقول بننشط المنتدي مالها بقي صفحه الفيسبوك :-)

ده لينك الصفحه

https://www.facebook.com/groups/Offi...otors/?fref=ts


وبعدين أنا لما لقيت الآراء أو أغلبها يعني بيقول إن الفيس بوك هو اللي واكل الليلة ..قلت خلاص ..وكان من ضمن آرائي إن يتم الإهتمام بالفيس بوك شوية

انا واحد من الناس اللى عضو دائم فى المنتديات من أكثر من 10 سنين و باحب طريقة المنتديات و ياما عملت مواضيع بالصفحات عن حاجات تقنية كتيير و بعد كل السنين دى اقدر اقول ان الطلب على المنتديات أصبح اقل بكتير و ده راجع فعلا" لسهولة عرض المواضيع على الفيسبوك و خصوصا" ان بقى فيه تقريبا" جروب لكل عربية ده غير سهولة عمل المواضيع و متابعة مواضيعك عن طريق المينشن اللى بتجيلك.
لكن يظل المنتدى هو عملية أرشيفية كبيرة و متاحة للجميع و مع ان فيه منتديات تم محوها تماما" زى Yahoo Maktoob

انا عضو من ٧ سنوات تقريبا.. بجد المنتدي مليان كنوز وكنت بتابع بشغف جدا المواضيع وكل معلوماتي وخبرتي عن السيارات من هنا ...حقيقي زعلان جداااااا من قلة المشاركة وقلة المواضيع القوية والمبتكرة كما اعتدنا...حتي اختفاء معظم الاعضاء النشيطة الماسية والبلاتينية...

كمثال قسم تويوتا... ظلام دامس بسبب ان الاعضاء النشيطة فيها عملوا جروب عالفيس وده لسهولة استخدامه اكيد... وغالبا كل الاقسام كده...

أتمني المنتدي يرجع زي ماكان ...

انا بقالى 3 سنوات منضم للمنتدى
انضم بصوتى ليكم المنتدى أصبح ظلام دامس
ياريت الكل فعلاً يرجعله تانى
الفيس بوك أسهل ولكن تلاقى السؤال بيتكرر أكتر من مرة وصعب البحث عنه مرة تانية

ادارة تقليدية زي اي كوادر ادارية في المحروسة وكل واحد ماسك منصب اداري او تقني كلامة نازل من السموات العلي