الموضوع له أكثر من اتجاه كلها اتحدت وتسببت في الموضوع ده والإخوة اللي ردوا هنا ذكروا كل الأسباب تقريبا وممكن ألخصها أنا في النقاط اللي شايفها هي السبب الرئيسي من وجهة نظري
التطوير التقني للمنتدى ضعيف فعلا يستخدم نسخة قديمة وتوجد هاكات كتير جدا بتسهل أمور كتيرة وتخلي التفاعل أفضل وأسرع بس للأسف الإدارة التقنية مش متابعة ويكفي بصة لمنتدى كبير زي فتكات مثلا وانت تعرف الموضوع ده أو أي منتدى تاني بيتطور باستمرار حتى إن في بعض المشاكل التقنية البسيطة ممكن تقعد فترة طويلة على ما حد يحلها زي مثلا تعطل زر الاقتباس المتعدد وده ليه فترة ومحدش صلحه وحاجات كتير من العينة دي
برده موضوع القوانين الصارمة زيادة عن اللزوم طفشت ناس كتير ومنها الوقف الجماعي والوقف أقل حاجة أسبوع وأحيانا تلاقي نفسك معملتش مخالفة جامدة أوي تستاهل الوقف العنيف ده وتلاقي واحد تاني مبهدل الدنيا وبرده هو الأسبوع فتحس انك اتظلمت وكمان الأسبوع بعد ما بيعدي بتحس بوحشة بينك وبين المنتدى مش وحشة انه بيوحشك ! لأ قصدي غربة يعني كل يوم بيعدي بيبعدك عن المنتدى فتلاقي نفسك بعد الأسبوع اتعودت على البعاد فممكن تقعد فترة طويلة على ما تفكر ترجع
موضوع الفيس بوك برده عامل مهم جدا ولاشك لأنه أسرع في التواصل بلا جدال وموضوع الإشعارات اللي بتيجي على الموبايل لو حد رد عليك أو بعتلك رسالة خاصة لكن المنتدى بتضطر تفتح متصفح الإنترنت الأول وبعدين تفتح المنتدى وبعدين تشوف حد رد عليك ولا لأ فحوار طويل مش مناسب للرتم السريع اللي بنعيشه دلوقتي
حتى برده مفيش تطبيق موبايل يملى العين يغنيك عن فتح متصفح الإنترنت
كمان أنا سألت شخصيا أكتر من عضو من الأعضاء المخضرمين القدامى عن سبب عزوفهم عن المنتدى وقلة مشاركاتهم فبرروا ده بسببين أولهم موضوع الفيس بوك وإنه أسرع زي ما قلت والحاجة التانية دخول بعض الشخصيات الغريبة والغير سوية والخناقات اللي سببتها السياسة واختلاف الآراء واللي طبعا بتقلب غالبا لشتيمة واتهامات متبادلة كما هو الوضع العام يعني .. هتقولي طب ما الفيس كده وأمر ! هقولك الفيس سهل مثلا تعمل بلوك لواحد تماما أو تحذف رده من البوست بتاعك وسهل تنقي الصفحات اللي عايز تدخلها وتبقى ضامن ان مفيهاش وجع دماغ غير المنتدى اللي بتجبر انك تقرأ تعليقات ناس متعرفهاش ومش على هواك ومتعرفش تحذفها طبعا اللهم إلا إذا عملت تقرير مشاركة سيئة ويا عالم هتتشال برده ولا لأ أو صاحبها هيتوقف أو انت اللي هتتوقف ! لكن الفيس مثلا أنا مش بضيف حد غير لما بكون أعرفه معرفة شخصية وبالتالي ضامن إنه حتى لو مش موافق لآرائي ولكنه هيكون محترم ومش هيقل أدبه لا عليا ولا على حد أعرفه ولو عمل كده هيكون مصيره البلوك فبقدر أتحكم في العالم الافتراضي بتاعي
من ضمن التقييدات برده والقوانين الصارمة في المنتدى عدم إمكانية تعديل المشاركة بعد مرور 10 دقائق !! وبعد محاولات مني شخصيا وتحايلات برده الإشراف وافق على تعديلها إلى 20 دقيقة !! ودي مشكلة كبيرة .. ليه ؟ لأن ممكن في لحظة غضب تكتب رد لو بصيت عليه بعد نص ساعة مثلا أو ساعة تقول ازاي أنا كتبت الكلام ده ! وتبقى عايز تحذفه أو تعدله ولكن للأسف بعد فوات الأوان ! لكن الفيس في أي لحظة ولو بعد 10 سنين ممكن تعدله أو تحذفه براحتك
آخر حاجة وأهم حاجة موضوع اختلاف الآراء السياسية وعدم وجود احترام متبادل بين كثير من الأعضاء خلى ناس كتيرة دماغها ورم من الحوارات دي انها تروح للعالم الافتراضي بتاعها اللي بتقدر تتحكم فيه براحتها وأنا شخصيا بحاول أعمل كده لأن صفحتي على الفيس شبه معليهاش حاجة غير لصفحات تقنية وبرمجية أو خدمية وما شابه إلا أني مش بقدر أبعد عن المنتدى برده لأن فيه روح صعب تلاقيها في الفيس وما يزال فيه قدر من الاحترام والعقول الناضجة الواعية مش هتلاقيه في الفيس وده برده يمكن يكون بسبب القوانين الصارمة اللي هي سلاح ذو حدين
والمنتدى على سلبياته إلا أني شايف إن إيجابياته أكتر والفائدة اللي بتعود علي منه شخصيا بتبقى غالبا أكتر من الفيس حتى لو أبطأ إلا أني حجم الإفادة بيكون أكبر وأكثر دقة على عكس الفيس اللي بيبقى عامل زي التيك أواي لكن المنتدى بيبقى فيه مكان خاص بالعائلات :)
وعلى فكرة أنا نصف اللي عندي على الفيس أساسا من المنتدى :)
آسف على الرغي الكتير لكن الموضوع شدني وحبيت أدلي بدلوي