البطاريات انواعها و صيانتها و كيفية اختيار البطارية المناسبة للسيارة
البطاريات انواعها و صيانتها و كيفية اختيار البطارية المناسبة للسيارة
http://media.linkonlineworld.com/img..._31_52_523.jpg
هتكلم عن الموضوع بشكل مبسط جداا ليصل للجميع و هحاول قدر الاماكن ابتعاد عن المصطلحات العلمية
البطارية من اهم الاجزاء في العربية نظرا لوظيفتها في انها تمد المارش بالتيار الكهربي لتشغيل العربية و دائرة الكهربا في العربية تعتبر منظومة متكاملة بتكمل بعضها البطارية بتدي تيار لتشغيل العربية فالعربية تتحرك و البساتم في حركة مستمرة و العربية ماشية و راكب طنبورة بتلف مع حركة العربية و الطنبورة ديه واصل من خلال سير ( سير الدينامو ) بالطنبورة اللي ع الدنيامو فالدينامو بيحول الطاقة الحركية لطاقة كهربية يشحن البطارية و البطارية خارج منها قطبين واحد سالب او الارضي و التاني موجب و ده اللي طالع منه ضفيرة
العربية و متوصل بالموبينة اللي بتاخد التيار توديه لاسبراتير اللي بينظم خروج التيار من خلال اسلاك البوجيهات للبوجيهات اللي داخلة في غرفة الاحتراق في الموتور فيتولد الانفجار جوة غرفة الاحتراق اللي بدوره بيؤدي الي حركة البساتم اللي بتحرك العربية و نفضل في الدائرة ديه زي ما شوفنا منظومة متوصلة ببعضها لو حاجة مش مظبوطة كل ده بيقف و نظرا لاهمية البطارية و مع ذلك وجود فتي بعض الناس فيما يتعلق بها كالعادة
فقررت اتكلم بشكل مختصر عن البطاريات انواعها و كيفية اختيار البطارية المناسبة بعيدا عن الفتي و شحنها و المحافظة عليها و هذكر اشهر الماركات عندنا هنا
- الانواع :
دايما نسمع عن بطارية سائلة و بطارية و معلومات نسبة كبيرة من الناس ان واحد بتتزود و واحدة جافة فاكرينها زي البطاريات الصغيرة
لكن حقيقة الامر ان البطاريتين سائلة لكن فيه واحدة بدائرة مفتوحة او اللي بيطلق عليها سائلة و واحدة بدائرة مغلقة و بيطلق عليها جافة او عديمة الصيانة Maintenance free كما يطلق عليها الاجانب لكن الجافة ديه زي بطاريات الموبايلات و الالعاب
- ملخص مميزات و عيوب كلا منهما :
البطارية السائلة :
مميزات : ارخص سعرا - في حالة قرب ميعاد تغييرها بيكون لها اشارات بتدل ع ذلك - في حالة تلف البطارية تقدر تشغل العربية بنظرية ( زق و ارمي :D )
عيوب : صيانة شهرية - السائل اللي بيفور منها لو نزلت ع الصاج بيؤدي لصدأ و تاكل الصاج
البطارية الجافة او ذات دائرة مغلقة او عديمة الصيانة زي ما بتتقال ما الاجانب بيطلقوا عليها Maintenance free
مميزات : لا تحتاج لصيانة - دائرة مغلقة و بالتالي مفيش سائل يؤدي لتأكل الصاج
العيوب : ارتفاع سعرها عن العادية - عند تلفها بتحتاج تتغير فورا - فيه عاكس موجود في البطارية الناس بتفتكر انها لمبة لكن في حقيقة الامر ديه عدسة بتعكس حالة البطارية لو خضرا تبقي لسه سليمة لو سودا لو صفرا و هكذا لكن في حالة حدوث اي حاجة للعدسة او اتحركت مش هتكون القراءة سليمة
فلا يعتمد عليها بشكل كبيير
- الصيانة :
البطارية ذات دائرة مفتوحة او السائلة بتحتاج لصيانة دائمة في المراكز المعتمدة نظرا لأن السائل في البطارية اللي بيكون مغطي الالواح بحوالي 1-2 بوصه و هو ده القياس الصح بيقل و ده بيؤدي لتلف الالواح لو مفيش صيانة و بقت جافة فتسمع عن مصطلحات ربع ضارب و نص ضارب و هكذا و بالتالي لازم صيانة شهرية للبطارية و دايما يفضل في مراكز الخدمة المعتمدة لماركة البطارية لأن بعض المحلات بتزود سائل غير سليم
اما البطاريات ذات دائرة مغلقة او الجافة فهي لا تحتاج صيانة يعني بتركبها و تنساها سنة او سنتين ع الاقل و في حالة تلفها بتتغير لازم دايما القطبين او القواطيش يعني يكونوا نضاف مفيش اي املاح عليهم او اي حاجة تأثر ع قوة التيار الخارج من البطارية و بيتم وضع شحم او فازلين ع اقطاب البطارية لضمان عزلها عن اي تفاعلات او املاح تتكون تأثر عليها
دايما يفضل قياس الشحن كل 6 شهور مثلا فالوقاية خيرا من العلاج لأن لو التيار عالي او منخفض هيأثر
متنساش اي حاجة متوصلة بالكهربا في العربية شغالة عشان شحن البطارية
في حالة السفر يفضل تسيب البطارية عند مركز معتمد يشحنها كل 15 يوم او حد يشغل البطارية كل يومين تلاتة 10-20 دقيقة خاصة البطارية السائلة مش الجافة
لو تم اتباع التعليمات ديه هتحافظ ع البطارية لاطول فترة ممكنة
طبعا مش هتكلم في تفاصيل الشحن ع التونجر و القياسات و الكثافة عشان محدش يتلخبط مراكز الصيانة عارفين كل الكلام ده و انت يكفي تكون عارف الكلام ده بشكل مبدئي
- كيفية توصيل البطارية ببطارية سيارة اخري في الطريق :
الموضوع ده مهم جدااا جدااا جداااا لأن لو اتعمل بشكل غلط ممكن يؤدي لتلف الضفيرة او الدينامو او كومبيوتر العربية نفسه سواء عربيتك او عربية الشخص اللي بيساعدك
احيانا اي حد ينسي نور او كاسيت شغال فشحن البطارية يفضي
فلازم يكون دايما زي مقولنا قبل كده ادوات مهمة و منها كابل البطارية و هي عبارة عن سلكين بمقابض للموجب و للسالب
...............................................
ادوات يجب ان تكون في كل سيارة
http://www.nilemotors.net/Nile/195073-a.html
...............................................
بنوقف اي عربية نقوله عايزين بس ناخد وصلة الخطوات في التوصل كالآتي و ركزوا فيها و يفضل تكتبوها في ورقة تكون معاكم في العربية
1- اتاكد ان مفيش اي حاجة كهربائية شغالة في العربية
2- البطارية تكون متوصلة كويس بالقواطيش و لو عليها املاح نضفها فورا
3- هتوصل الطرف الموجب بالبطارية الفاضية الأول ثم بالطرف الموجب في البطارية السليمة
4- توصل الطرف السالب في البطارية الفارغة بالبطارية السليمة
5- تدور العربية اللي فيها البطارية السليمة و تدوس دوسة بنزين خفيفة كأنك بتسخن العربية شوية
6- تشغل العربية اللي بطاريتها فضيت
7- اول ما العربية تشتغل تفصل الكابلات عكس ما ركبتها يعني تفك السالب من العربية التانية و بعدين عربيتك و بعدين تفك الموجب من العربية التانية و بعدين عربيتك
و بكده شحنت بطاريتك عشان العربية تدور و حافظت ع عربيتك و عربية اللي بيساعدك
- اختيار البطارية المناسبة :
احنا بنختار البطارية بأمبير زي الستوك اللي نازلة في العربية او حسب دليل العربية اللي جي معاها او حسب قدرة الدينامو
يعني مثلا لو العربية نازلة ببطارية 40 امبير ميجيش حد يقولك ركب 70 امبير مش هيصة هي و اي فتي زي ما بنشوف كتيير لكن مثلا لو العربية نازلة ببطارية 38 امبير ممكن تركب لها 40 او 45 امبير لأنك مش هتلاقي 38 لكن في حدود قدرة الدينامو فلو مثلا الدينامو بيطلع 55 حضرتك متزودش عن كده و لا تقلل جامد عن كده عشان الاتنين يشتغلوا بكفاءة مع بعض لكن هتسمع للفتي يبقي مترجعش تلوم غير نفسك و اللي هيحصلك
و خلو بالكم اقروا الامبير ع البطارية كويس عشان زي ما عارفين اغلب الفنيين او الصنايعية ميعرفوش يقروا انجليزي و اخرهم يبصوا للرقم و ساعات بيلخبطوا بين رقم موديل البطارية و الامبير و الامبير هتلاقي وحدة القياس جنب الرقم
و اخر حاجة تاريخ انتاج البطارية يكون جديد بقدر الاماكن ميعديش عليه سنين يعني و الا هيكون عمرها الافتراضي قصير
( هااااااااااااااام جدااااااااااااااا )
للأسف فيه احيانا صنايعية متخلفين عقليا لازم تاخد بالك لما البطارية تتفك يتفك الطرف السالب الاول مش الموجب و لما تيجي تركب الموجب الاول ثم السالب و تاخد بالك بدل ما يعكس القطبين موجب بسالب و سالب بموجب ساعتها هقولك كل سنة و انت طيب في حاجة من دول ان مكنش كلهم اما ضفيرة العربية او الكومبيوتر او الدينامو لأنك انت الي هتخاف ع عربيتك مش الصنايعي هو اخره هيقولك لا مؤاخذة يا باشا او يشتم في العربية و انها تعبانة بما انك مش فاهم و يحاول يخلع و يبدأ شغل البلطجة بتاعهم اللي عارفينه لما تكلم في حقك و مش هتاخد و لا حق و لا باطل و هتشيل الليلة كلها
- الماركات
اشهر الماركات عندنا وهي اللي ارشحها عن تجربة في الجافة
فارتا الماني ( الأصلي ) - بوش الماني ( الأصلي ) - اي اس ديلكو سعودي - هانكوك كوري - كلورايد
الناس هتستغرب ليه كتبت اصلي جنب دول لأن للاسف بعض المحلات تحت بير السلم بيبعوا مضروب ع انه اصلي فعشان كده انصحكم دايما تجيبوا من الوكيل او مركز معتمد من الوكيل
و محدش يسالني ع اسعار لأن الاسعار مختلفة و بتتغير و من مكان لمكان
و ده كان مختصر سريع عن البطاريات :)
