ليه كل ملاك الميجان كده !!!

**ahmedegypt55** · 13-07-2015 04:56 PM

السلام عليكم
انا الحقيقة لسه ممعييش عربيه .. بس بدور اليومين دول .. ودخلت دماغى الميجان والسبب الرئيسي هو المنتدى هنا

الحقيقة الشرح هنا وافي جدا وامين .. بس محتاج قراية كتير للمواضيع القديمة والجديدة وتحليل

وبعد اسبوع كامل من التجول فى مواضيع الرينو والميجان بالاخص .. قررت اروح بقا للعربيات التانية اللى الناس
بتقول عليها اعتادية .. وبرقبة الميجان

وقع اختياري على اللانسر باعتبارها اول اقتراح دايما اسمعه كبديل لوجع القلب بتاع الميجان

وروحت هناك ولاحظت حاجة غريبة جدا

طريقة الناس هناك مختلفة تماما على الطريقة اللى اتعودت عليها من قسم الرينو ميجان
الناس هنا متفاهمة جدا ومقدره وبتتعان بقلب .. اسلوب الكلام بتاع ناس مثقفة انجليزى وكتالوجات وابشن وخطوات .. الخ

قسم اللانسر مع كامل احترامي للساده الافاضل رواده بس الملحوظة لازم تتقال .. حسيت باحساس مختلف تماما اقرب ما يكون للزحمه والاستعجال .. شغل تجاري زي ما بيتقال .. مفيش روح للمعلومه .. مفيش عشق للعربية ... حاجة كدا زي جواز الصالونات .. هههههههههه

هل الميجان عربية بتجمع كل الناس اللى بتقرر تختار الشئ الصح حتى لو كل الناس ضدها , هل ملاكها هما الحالمين اللى بيدوروا على المستقبل والرفاهية حتى لو كل الناس قالتلهم حتتعبوا وحتتبهدلوا فى صيانتها , مع كل الترهيب اللى بشوفه منها الا ان ملاك الميجان لسه بيحاربوا وبيعاندوا وبيحلموا .. بجد تحياتى :)

**hesham fawzy h** · 14-07-2015 04:58 AM

العربيات دى مزاج

**broadband** · 14-07-2015 11:30 AM

اخى الكريم انا من ملاك الميجان حاليا و كنت مالك للانسر بومة سابقا
احساس مختلف و زى كل السيارات الاوروبي علشان تدلعك لازم تدلعها و تراعيها و تكون اصلا بنت ناس اقصد الميجان تكون مش متبهدلة
و الثقافة فى موضوع السيارات فى مصر دى ناتجة عن معلومات عامة الميكانيكية اللى بيستسهلوا ا (اقصد بيعكوا ) فى اللانسر و للاسف بتشتغل و تمشي و بعد كده و الزبون يلبس فى الحيطة
الخوف من الميجان خلى اللى يقتنيها يدرسها كويس جداا علشان ميقعش فريسة للميكانيكية و اللى مدعيين انهم ميكانيكية
و ده راى شخصى بعد 14 سيارة تم اقتناءهم

و اى خدمه

**تامر.محمد** · 14-07-2015 11:56 AM

بغض النظر عن الناس عشان ما نجيبش سيرة حد :)

انا من مشي كل عربية قدامي على الطريق مؤمن ان كل عربية ليها شخصية معينة بتختار بيها اللي بيسوقها , طبعا اغلب و ليس كل

**ahmedegypt55** · 14-07-2015 12:28 PM

المشاركة الأصلية كتبت بواسطة تامر.محمد

بغض النظر عن الناس عشان ما نجيبش سيرة حد :)

انا من مشي كل عربية قدامي على الطريق مؤمن ان كل عربية ليها شخصية معينة بتختار بيها اللي بيسوقها , طبعا اغلب و ليس كل

صح ميه فى الميه .. أكيد كل شخص بيختار العربيه الاقرب لشخصيته ..

**yasser100** · 15-07-2015 12:43 AM

علشان تستريح فى سؤالك . اللى بيركب الميجان او الفرنساوى و الاوروبى عموما . دماغ معينه و مستوى معين مش هاقول احسن او اسوأ و لكن ناس عندها استعداد انها تقرا و تبحث مع المشاكل التكنولوجيه و بالتالى هاتلاقيهم بيعرفوا لغه واحده كمان على الاقل و بتكون نظرتهم انه اى رفاهيه هيه فى الاخر نتاج تكنولوجيا متقدمه و كل تكنولوجيا لها مشاكلها و هو عنده استعداد لتحمل المشاكل التكنولوجيه دى و يتفاهم معاهامقابل الرفاهيه اللى هاياخدها .
مش معنى كلامى انه دول حلوين و دول وحشين .
الميجان كانت عربيه سابقه عصرها بكتير و ما زالت حتى الان فيها كم رفاهيه مش موجود فى موديلات كتيره 2015 و لغاية النهارده لما تمر من قدامى احب ابص لها لغاية ما تختفى لجمال تصميمها .