الموضوع: كليه تجاره و كليه طب ... المصير واحد في الاخر

انا فاهم قصدك و حال البلد فعلا مش تمام

بس للاسف الكلام ده فعلا مش مشجع او على الاقل بالنسبة لى مش صح انه يتقال .. ليه بقى ؟ دلوقتى واحد طالب قى الثانوى .. طلع عينه عشان يجيب مجموع محترم و واحد صاحبه كان واخد الموضوع هزار و لعب و معملش نص المجهود اللى زميله عمله .. و فى الاخر احنا نطبطب على اللى مذاكرش و معملش اللى عليه و نقوله معلش يا حبيبى انت هتبقى احسن من زميلك اللى بيذاكر و هتبقى افضل منه فى المستقبل .. طيب هو الطالب فى الثانوى مش مطلوب منه يذاكر ؟ و هتقولى نظام فاشل .. هقولك بس الطالب اللى جاب مجموع ده عمل اللى عليه .. هو مش لاقى نظام تعليم محترم و نظام تعليم فاشل و راح اختار الفاشل .. هو نظام تعليم فاشل بس هو عمل اللى عليه و ذاكر و اجتهد و ربنا وفقه و جاب مجموع .. نقوم احنا نقوله لا يا حبيبى كل ده ملهوش لزمة و صاحبك اللى قاعد يلعب طول السنة هيبقى احسن منك .. و محدش يقولى تجارة و تبقى مليونير و الكلام ده .. اه فيه ناس بتنجح من غير شهادة .. بس مش ده الطبيعى .. الطبيعى ان اللى اجتهد و جاب مجموع احسن و دخل كلية اعلى فى التنسيق يبقى انجح من صاحبه اللى قعد يلعب طول السنة .. و فى كل العالم مش مصر بس المهندسين و الدكاترة مرتباتهم و مستواهم الاجتماعى اعلى من الكليات التانية .. الكلام ده كلام على العموم بس طبعا فيه شواذ للقاعدة و فيه ناس مجتهدة بس بتحب التجارة مثلا او اى كلية تانية و بتنجح فيها .. بس مينفعش انا اجى اقول لواحد اجتهد لا انت ملكش لزمة فى الاخر .. انا شايف ان هو عمل اللى عليه و نجح باجتهاده فى نظام فاشل فعلى الاقل يستحق التحية مش ان نقوله ان اللى معملش حاجة احسن منك