Tempra Test Drive

**Klay** · 29-07-2007 04:45 AM

Fiat Tempra

مع أول مشاركة ليا في المنتدى الجميل ده حبيت أعرض تجربتي الخاصة مع العربية المتميزة دي ، وهي فيات تمبرا موديل 91 والموتور 1400 سي سي.
اولا العربية من بره شكلها الصراحة تحفة وجميل جدا وانسيابي لأقصى درجة ، اول ما تفتح الباب لازم تنبهر من المساحة المهولة في الصالون وده الصراحة اجمل حاجة في العربية الصراحة يعني وهي المساحة الداخلية الواسعة ، طبعا التابلوه شكله متميز مع العدادات الديجيتال المتميزة جدا. وطبعا ماننساش الشنطة الواسعة اللي ممكن تط فيها خروفين تلاته.
بالنسبة للموتور طبعا محدش يختلف على موتور التمبرا متميز جدا.
نتكل على الله وندور ، الصراحة والحق يقال المتور بيدور من أول مرة وصوته ناعم جدا ، العربية سحبها مقبول جدا وعلى 155 العربية كانت ثابتة جدا على الطريق ، لكن فيها مشكلة الباور لما تيجي تلف بالعربية بيطع كده صوت غرييب (عععععععع) ورحت لكذا ميكانيكي قاللي عادي خالص .
المهم الصراحة يعني العربية معايا اديلها سنتين والله ما بتعوز حاجة غير البنزين والزيت بس
والله من اكتر العربيات اللي جبتها وريحتني خالص لأني كان معايا ريجاتا كانت مطلعة عنيا لكن مع التمبرا والله ارتحت خالص ، باعتبرها عن تجربة شخصية من اسن العربيات اللي انتجتها شركة فيات.
يارب يكون الموضوع عجبكو
وشكراً

[/img]

**kareem_Ashmawy** · 29-07-2007 04:49 AM

و الله أنا احترت ناس تقول التمبرا عربية زى الزفت و ناس تقول حلوة
بس مدام حضرتك بتقول عن تجربة شخصية يبقى حضرتك أكيد على حق
شكرا لحضرتك

**OsKaR** · 29-07-2007 05:08 AM

شكرا على التقييم

**Klay** · 29-07-2007 08:00 PM

المشاركة الأصلية كتبت بواسطة Kareem

و الله أنا احترت ناس تقول التمبرا عربية زى الزفت و ناس تقول حلوة
بس مدام حضرتك بتقول عن تجربة شخصية يبقى حضرتك أكيد على حق
شكرا لحضرتك

لا والله بجد كل من قال عليها عربية وحشه بجد ظلمها
دي عربية ممتازة الصراحة ومريحاني جدا
والكلام ده طبعا عن تجربة شخصية
وشكرا لردك

**bassam nagy** · 29-07-2007 08:48 PM

بصراحة انا سمعت من ناس كتيير انها عربية حلوة وممتازة وشهد شاهد من اهلها ربنا يباركللك فيها

**hazem_khidr** · 30-07-2007 12:52 AM

التمبرا عربيه ممتازه و محدش يقدر يقول غير كده لكن مشكلتها ان قطع غيارها قليله شويه و غاليه

**Klay** · 30-07-2007 01:55 AM

المشاركة الأصلية كتبت بواسطة hazem_khidr

التمبرا عربيه ممتازه و محدش يقدر يقول غير كده لكن مشكلتها ان قطع غيارها قليله شويه و غاليه

معاك حق في الأجزاء الخارجية فقط
أما بالنسبة للموتور والعفشة والحاجات دي فكل قطع غيار الريجاتا تركب عليها تمام

**hazem_khidr** · 30-07-2007 02:35 AM

ايوه ما انا قصدي الفوانيس او الزجاج و الحاجات الخارجيه انما موتورها قطع غياره متوافره مفيهوش مشاكل

**osha966** · 12-01-2008 11:56 PM

الحقيقة أنى أملك فيات تمبرا 1600 منذ 7 سنوات وهى سيارة عظيمة جدا موديل 1996 وسعرها لايقارن بأمكاناتها وهى أفضل من سيارات كثيرة حديثة يابانى أو كورى وهى متينة جدا وعائلية وموفرة فى البنزين فتستهلك 250 كم\20 لتر رغم أنها 1600 فول أوبشنز