أنا طرحي للموضوع ده ..من وجهة نظر دينيه إسلاميه فقط ...يعني أي وجهة نظر هتخضع (للعرف) أو (أهو النظام اللي ماشي كله كده) أو (أصل أنا بصراحه مش مقتنع) أي وجهة نظر على هذه الشاكله هتطرح للنقاش هنا هتوقعنا في دائره مغلقه ...ومش هوصل لحاجه

بسمع ناس كتير بتقولك ..جواز الصالونات ..وحط بقى كلمة جواز الصالونات دي في كذا جملة بتظهرها في الآخر بشكل وحش ..زي مثلا

- أنا لا يمكن أتجوز جواز صالونات
- أنا مش عايز أتجوز جواز صالونات
-للأسف إتجوزنا جواز صالونات
- أنا أصلا مش مقتنع بجواز الصالونات

طيب ..أنا لما أحب أئصل لموضوع معين ..لازم أرجعه لأصله ..اللي هو الدين والشرع ..

الدين والشرع بيقول إن الراجل لا يحق له أن يخاطب إمرأه لا تحل له إلا لضروره ..والعلماء حددوا ملامح الضرورة دي في المعاملات العادية الضرورية التي بدونها تختل الحياه اليومية ..زي مثلا ..البيع والشراء ...أو مثلا التعليم أو مثلا التنبيه لشئ وقع من المرأة أثناء سيرها ..يعني الضرورة اللي تستقيم بيها الحياه..وأظن كلنا قادرين نحدد إيه هي الضرورة اللي الواحد يقدر يكلم فيها إمرأة لا تحل له ..كل واحد بينه وبين نفسه كده عارف ..وبرضه أخضعوا المرأة لنفس المعايير

يبقى معنى كده إني أنا لو شفت واحده في الشارع ومعرفهاش وعجبتني شكلا ..من حيث اللبس وطريقة المشي مثلا وعايز أرتبط بيها أقصى شئ ممكن أعمله .. إني أستوقفها ..مثلا يعني ..أستوقفها بأدب وأطلب رقم تليفون ولي أمرها زي مثلا الأب أو العم أو الخال ..وأبدأ من خلال الشخص ده التواصل عشان أقدر أدخل البيت وده طبعا بعد ما أسألها مثلا هل هي متزوجه ..أو مثلا ممكن أمشي وراها بذكاء وبتخفي لغاية ما أعرف البيت ..أنا كل ده تخيلات من دماغي وما بقولش إن لازم كله يعمل كده ..ممكن أي حد يعتمد على شخص ثقه يرشح له بنت كويسه مثلا يعني .... ..وبعدين لما أروح بيتهم أقدر أشوفها تاني قدام أهلها ..وبعدين نحدد فترة الخطوبة ..فترة الخطوبة اللي هي أصلا مفيهاش لا خروج ولا قعاد لوحدنا زي ما في ناس متصوره ..لإنها برضه ما زالت أجنبيه عني ..وفي علماء كمان تشددوا و أخذو بحديث ضعيف ..أنه لا إشهار في الخطبه ..بس دول ملناش دعوه بيهم ..أنا بقول إن في مستويات للتشدد أعلى من اللي أنا بقول عليه كمان بس أنا مش هوصلها أصلا ..وبعد كده أعقد عليها وبعد كده أدخل بها ..وبقيت الخطوات اللي كانت موجوده في يوم من الأيام كأمر طبيعي وبعدين تحولت لشئ من التراث

واللي أنا قايله ده طبعا عشان في الآخر أوصل لمرحلة إني ما أكلمش واحده أجنبيه لا تحل لي إلا بعد وجود صفه شرعية ..زي مثلا الزواج على الأقل

طيب اللي أنا فهمته من ناس كتير ..مش معتقده في جواز الصالونات اللي بيعتبر النهارده درب من دروب التخلف ..وبيعتبر حاجه كده قديمه وبلدي ..إن الشخص ده (اللي هو ما بيعتقدش في جواز الصالونات) عاوز قبل ما يتقدم يكون عرف البنت كويس ..ومعندوش مشكلة إن تكون المعرفه دي بره البيت ..وإنه يكون إتكلم معاها في أمور خاصة خارج النطاق اللي هما بيجتمعوا فيه ..يعني مثلا لو زميلته في الجامعه لازم يكون إتكلم معاها في أمور خارج نطاق الدراسة ..آه طبعا ..ما هو عايز يعرف دماغها وتفكيرها وأسلوبها ومنهجها..وكل ده خارج نطاق البيت ..طيب كون إن البنت تتكلم مع واحد أجنبي ..في أمور خارجه عن الدراسة ..أنا بقول لو المكان اللي بيجمعهم مثلا مكان علم ..أو خارج نطاق العمل ..وده في حالة إن هما زملاء في العمل ..الموضوع ده مش يعتبر خيانة ؟؟؟!!!!...

يعني أنا مثلا ..إتجوزت جواز صالونات ...وكنت مصمم إني أتجوز جواز صالونات ..آه والله ..ده أنا اللي صممت إني أتجوز جواز صالونات ..وزوجتي أول كلام ما بيني وما بينها كان قدام أهلها ..وعشان كده أنا عارف ومتأكد زي ما أنا متأكد من إسمي إن هي في شغلها مستحيييييييييل تتكلم مع حد من زمايلها خارج نطق شغلها وبس ..لإن هي أصلا كده ...وأنا متجوزها كده ...وهي كملت حياتها معايا كده ..إن أي راجل غريب عنها فهو أجنبي لا يحق لها إنه يقولها حتى صباح الخير ..دي حتى كانت لغاية وقت قريب ما بتردش السلام على زمايلها الرجاله في الشغل ولما بدأو يشتكوا لمديرتهم في الشغل وهي جات قالتلي قلتلها ردي السلام وبس ..هل ده يعتبر تخلف ..؟؟...هل ده يعتبر تشدد ؟؟؟.....

طيب اللي مش عايز يتجوز جواز صالونات ..أو أنا مش بقول إن جواز الصالونات هو الشرعي أو هو الصح ..لكن أنا بقول اللي مش عاوز ياخد بالحد الأدنى للطريقة ا لشرعية في الإرتباط ..وهي إنك ما تتكلمش مع البنت اللي هترتبط بيها غير قدام أهلها ..عاوز إيه ؟؟؟؟

عاوز يخرج معاها الأول ؟؟..
عاوز يتكلم معاها على إنفراد عشان يشوف دماغها ماشيه إزاي .؟؟؟

طيب كلامك معاها على إنفراد ده ..مش يعتبر خلوه غير شرعيه ؟؟....

طيب ما هي بسهوله قوي تخدعك ..إيه المشكلة يعني ..ما إنت عملت واعي وشاطر ..

طيب مش الأولى إنك تدعي إن ربنا ييسر لك زوجه صالحه ..وتاخد بالأسباب ..وحتى لو طلعت وحشه ربنا هيفضحها ويكشفها ليك عشان يبعدك عنهم ؟؟؟

أنا حاسس إن الكلمة نفسها (جواز صالونات) بقي مقصود إن هي تقال عشان توصف زواجه فاشله من أول خطوه ..وكأنها دعوه للتغريب عن ديننا وعن مجتمعنا ..عشان كلنا نلجأ للطرق اللي للأسف بقت طرق عاديه جدا النهارده للإرتباط ..أنا مش عايز أنحرف أقصى اليسار وأقول إن في علاقات بين إثنين بتستمر سنين بدون أي صفة رسمية أو شرعية ..ومش عايز أتمادى في الإنحراف وأقول إن في شباب بيتجوزا بعد ما يكونوا عاشروا البنات اللي يعرفوهم معاشرة الأزواج ..زي الأجانب كده وزي ما بنشوف في الأفلام الأجنبي ..لكن أنا بتكلم عن حاجه تم إلصاق كلمة لوصمها بصفة إنها قديمة ومتخلفة