الموضوع: ماله جواز الصالونات ..ولا هو أي أمريكاني وخلاص ؟؟؟

انا مش ضد جواز الصالونات هو مناسب لبعض الناس لكن انا شخصيا مش بقبله ورافضه لكذا سبب زى:

1- بحس انى رايح اشترى عربية واتفرج عليها ولو عجبتنى اشترى ما عجبتنيش خلاص وبتبقا رايح مش لشخص معين .. لأ رايح بهدف انك تتجوز انثى وخلاص.
2- احتمال كبير انه احد الأطراف بس اللى يعجب بالتانى فى اللقاء دا وفى الحالة دى الطرف اللى هيترفض اكيد نفسيته هتتأثر.
3- استحالة البنت هتبان على حقيقتها دى متزوقة مخصوص عشان انت جاى وعارفة هتقول إيه ومش هتقول إيه وبالتالى مش هتعرف عيوبها ولا دماغها إلا لما تبتدى تتعامل بمدة طويلة عن طريق الخطوبة.

وعلى النقيض برضو انا مش مع انى اكلم البنت فى حاجات شخصية لحد ما نتعرف على بعض وبعدين اتقدملها لأنى زى ما كلمتها اكيد غيرى كلمها.

الحل الوحيد اللى كان قدامى وجربته وما نفعش وهو ان واحدة زميلتى عجبتنى فضلت مراقبها فترة واشوف تصرفاتها خصوصا مع زمايلنا الرجالة ولما اتأكد من احترامها روحت صارحتها انى عاوز اتقدم وللأسف ردها كان انا اسفة بس انا معرفكش ولا اعرف عنك حاجة رغم انى معرفها بنفسى :)

المشاركة الأصلية كتبت بواسطة swimmer25

في إعتقادي هو قصده معرفة من موقف عارض غير مخطط لها من قبل
بس هو بردو مردش على سؤالي..ما هو الحب؟ ما تعملنا موضوع يا أبو مازن للسؤال ده عشان يكون منفصل عن موضوع الزواج

حاولت أجاوبك إمبارح بس لقيت إني محتاج أفكر شوية
وبعد تفكير بردو ملقتش إجابة معبرة أو تعريف
شعور عاطفي لا يمكن تفسيره أو وصفه ( ميل غريب )
بس حالتك العامة بتتغير لما تشوف اللي بتحبه
قلبك بيزيد نبضه و بترتبك مش هتقدر تصارحها بشعورك وجهًا لوجه ..
غالبًا أي كلام ( عام ) عايز تقوله مباشرة هيشغلك تقوله إزاي ولو قلته هتوصله بإختصار وبأسرع الطرق الممكنة
لكن كلام خاص وتعبير عن مشاعر مستحيل يبقى مباشر
شعور جميل وفيه لذة .. بس مؤلم مش لطيف .. بيضعفك وخصوصًا لو من طرف واحد
ومستحيل تتخلص من مشاعرك
من ورى الشاشة ممكن تلمح .. فيه مجال أوسع وطرق غير مباشرة لتوصيل مشاعرك
ممكن ناس تانية عندها مشاعر مختلفة أو إجابة اوضح .. كل واحد أسلوبه مختلف

بصراحه ..وبعد ما قريت كل المشاركات ..حاسس إن في مشكلة ..بس المشكلة مش في طريقة الإختيار ...المشكلة في الشخص اللي بيختار ..

يعني مثلا واحد دخل 15 بيت ..مفيش ولا واحده عجبته ..ما يا إما ال 15 بنت اللي شافهم أكيد كان فيهم واحده بتلبي الحد الأدنى اللي الواحد عايزها في زوجه كويسه وهو كان ليه مطلب معين ولا تنازل عنه ...أو إنه مكانش حاطط معايير بناء عليها يبدأ يتحرك ويدخل ال 15 بيت ..أنا آسف في اللفظ ..أنا متهيألي اللي يدخل 15 بيت وجاي في الآخر يقول جواز الصالونات فاشل عامل زي اللي هائم على وجهه في الشوارع مش محدد هدفه ولا محدد هو عايز إيه ..دي حاجه

حاجه تانيه ...أنا رأيي إن المشكلة بقت في الراجل ذات نفسه ...يعني مثلا ..أنا لسه من حوالي سنه كنت ماشي لواحد صاحبي في جوازه ..واحده بنت ناس جيرانا ..أنا شايفها كويسه ..وواحد صاحبي أنا شايفه كويس ...حاولت أوفق بينهم ..قبل صاحبي ده ما يدخل بيت الناس اللي أنا واخده ليهم ...سألته ..قلتله عايز إيه في البنت اللي إنت بتدور عليها ..قالي على شوية حاجات كده لقيتها متوافره ...واللي مكانش متوافر من طلباته أو أنا شايف إنه شئ نسبي (زي موضوع الجمال مثلا..وزي موضوع متفتحه ومثقفه ) قلتله لما تشوفها إنت اللي هتحكم الحاجات دي موجوده ولا لأ ..وقد كان ..الراجل راح ..وقعد ..وإتكلم ..وفي الآخر ..قالي هي مفيهاش مشكلة غير إني مستريحتش نفسيا ..بس خلاص ..الموضوع إنتهى وكأن شيئا لم يكن ..ده غير إنه قبل ما يدخل بيت الناس ..الناس كانوا عارفين ظروفه ..من حيث وظيفته وشقته وإمكانياته ..وحتى كانوا عارفين هو وأهله نظامهم إيه في تجهيز الشقه ...يعني كان في إتفاق على الخطوط العريضه قبل ما الراجل ييجي أساسا

أنا أقصد إيه بكلامي ده ..إن لازم الواحد مننا يكون حاطط معايير قبل ما يروح ...إن لازم يكون الشخص اللي بيتوسط في الموضوع ثقه ..ويكون ثقه كبيره جدا كمان ..مشكلتنا إن إحنا بنشوف أي حد يدلنا على أي حد ونرجع في الآخر نقول أنا رحت بيوت كتير ..أصل أنا لما بروح للناس بيبيعوا ويشتروا فيا ..أصل أنا لما بروح أتفرج على العروسه بحس إني رايح أتفرج على عربيه عشان أشتريها ..

طيب وإنت عليك بإيه ؟؟؟...يوم ما تدخل بيت وتحس إن هي بيعه وشروه ..إخلع ..
يوم ما تدخل بيت وتحس إنك رايح تتفرج على عروسه بلاستيك ..متزوقه ومتروقه عشان العريس جاي ..إخلع
يوم ما تدخل بيت وتلاقي ريحة البيت وحشه ..آسف في الكلمة ..أصل في ناس معفنه ..يوم ما تلاقي في ريحة في البيت مش مريحه ..إخلع ..
وبعدين إيه المشكلة إني أدخل بيت وإثنين وتلاتة ويكون الدخول عن طريق حد ثقه جدا ..وقبل ما أروح أكون عارف إيه معاييري في الإختيار ..والناس اللي أنا رايحلهم دول إيه نظامهم في الجوازه وفي الطلبات ..يعني بياخدوا مهر كام ؟؟..عندهم مانع إن بنتهم تسكن في إيجار جديد ولا قديم ولا لازم تمليك ..طيب أنا معاييش شبكه ..عندكم مانع إني أجيب حاجه كده على قدي ..كل ده الوسيط اللي ما بينكم هو اللي بينقله وهو اللي بيبلغ عشان تبقى عارف كل حاجه قبل ما تروح حتى ...عشان يبقى أنا رايح أتعرف على الناس والخطوط العريضه في الإتفاق شبه متفق عليها ...عشان يبقى باقي خطوة القبول فقط

ليه الموضوع ما يبقاش منظم من ناحيتنا؟ ..ليه الموضوع فيه عشوائيه كده ؟..إني أول ما أعرف إن في عروسه آخد بعضي وأجري أروح أشوفها وبعدين أتفاجئ إن أبوها شغال شغلانه مش مناسبه ليها إجتماعيا أو إن أهلها طلباتهم مبالغ فيها جدا ...طيب ما نحاول ننظم خطواتنا في الموضوع ده ...

طيب ما أنا ممكن أعكس الموقف ..إني شفت البنت ..وكلمتها ..وكلمتني ..وده طبعا من ورا أهلها ..وإتكلمنا في أمور خاصه ..من ورا أهلها ..أنا أصلا مش عارف هثق فيها إزاي بعد كده لما هي بتكلمني من ورا أهلها ..وخصوصا بقى ..إن هي متعرفش إني ناوي أتقدملها ورغم كده بتكلمني عن بيتها وعن أهلها وعن ظروفها وإحنا أصلا مفيش حاجه رسمية بينا ..بس ماشي ..حصل كل ده ...وفي الآخر رحت البيت عشان أتقدم ..لقيت الأب بيطلب طلبات غريبه ..أو لقيت الأب طالع يقابلني بالفانلة الداخلية ...أو لقيت الأم صوتها عالي ..يعني أبقى أنا قاعد في الصالون مثلا مع الراجل وأبقى سامع صوت الأم جوه بتتكلم من المانوار مع الجيران أو عماله تنده لبتاع الخضار وبتاع السوبر ماركت وصوتها مسرسع ومالي الشارع كله من البلكونه ...إزاي الحال بقى ..؟؟؟..يا ترى حضرتك هتعمل إيه وقتها ؟؟...هتخلع برضه ...ولا هتقول البنت كويسه ..طيب ويا ترى هتقعد كام سنه تتكلم مع بنات عشان تختار واحده مناسبه ليك وبعد ما تروح البيت تلاقي كمان أهلها مناسبين ليك ...؟؟؟؟..

متهيألي المشكلة مش مشكلة جواز صالونات ..المشكلة مشكلة تنظيم ووضع معايير مش أكتر

المشاركة الأصلية كتبت بواسطة فتوك حائر

مشاركه في الجون بحييك ياباشا
انا زيك لفيت علي بيوت كتير لحد.ما بدات اشك في نفسي بقول كل الناس بتتجوز بسلاسه اشمعني انا العيب فيا بقي
بس بلوم نفسي لو كنت عرفت بنت من ايام الدراسه كنت وفرت كرامتي وراحتي من قرف اللف عالناس
ومن كتر البيوت الي دخلتها بجواز الصالونات دي الي وصلتله
بحس اني عويل حد بيختارلي وراح يقعدني مع بنت
كلهم بيبقوا بنات اي كلام وش القفص بيتاخد بدري بدري وبيفضل.دول للصالونات
فعلا شكل مش مقبول وتيجي تتكلم يقلك انت فاكر نفسك براد بيت والمخم الاخلاق والعشره زي ما يكون القبح والاخلاق دي باكدج لاتنفصل زي باكدج الجمال والصياعه
بتلاقي تمثيل واشتغالات والبنت تلاقيها حبت ومقضياها واهلها يرفضوا حبيبها فتيجي انت زي المقطف تنجوزها وخلاص وعادي تكلمك وهيا مع حبيبها عادي ودي كتير جدا وحصلت معايا ومع اصحابي
يعني البنات اصلا بتكره الجواز دي وبتوافق لما اهلها بيجبروها
مجرد احساس اتجوز واحده بتمثل عليا ومتعلقه بواحد تاني مرفوض من اهلها يبقي بناقص الجواز كله

على فكره ..بنات الناس كتير ..بس ربنا ما بيرزقش بيهم أي حد