الموضوع: تغيير الزيت

المشاركة الأصلية كتبت بواسطة dr wael ghanem

هو حضرتك موبيل اللى بستعمله بنفس المواصفات دى وبجيبه من محلت التوكيلات بس الكلام عن الغش بيخوفنى
والحمد لله الزيت مش بينقص ولنزله على 2500 فى الصيف و 3000 فى الشتاء هل ده مناسب ام لا
؟؟؟

أتفق معاك في خوفك من الغش... بس متهيألي لو حضرتك اشتريت من أماكن مضمونة هتكون حليت المشكلة بنسبة 95%.

بالنسبة للمدة اللي الزيت يقعدها في الموتور... فيفترض إنها ما تقلش عن 5000 كم... حتى ولو بتجيب أقل نوع موجود في الكتالوج.

ليه بقول كده؟؟؟

لإن الصانع لا يمكن ينصحك بحاجة ويكون فيها ضرر على العربية... والزيت فعليا ممكن يقعد أكتر من المسافة دي بكتير... بس الصانع واخد Factor of Safety عالي... علشان ممكن جدا تكون مسافر بالعربية مثلا وما تلاقيش زيت مناسب.. أو حتى تنسى تغير الزيت!!!

فتلاقي الكتالوج مكتوب فيه 5000 كم في حالات القيادة الشاقة... ما قالش 3000.

ال3000 دي بتبقى في أمريكا علشان هناك بيقيسوا المسافات بالميل.. وفعليا 3000 ميل = 5000 كيلومتر.

وفر فلوسك وحافظ على موتورك وغير الزيت كل 5000 كيلومتر.


...

المشاركة الأصلية كتبت بواسطة dr wael ghanem

استفسار اخير من حضرتك اخويا الفاضل
الزيت اللى بستعمله موبيل انتاج مصرى بياناته كالاتى
mobile super 1000
20w-50
متوافق مع API SL
مستوى الجوده API CF
لتل بجيبه من محل كبير هو توكيل لموبيل بفرض انه مضبوط
هل الواصفات دى جيده وتنزل على 5000 كم زى ما حضرتك تفضلت وذكرت
ولو هينزل على 5000 كم اغير الفلتر كل غيار زيت ولا كل 1000كم
وشكرا لحضرتك اسف على الاطاله

مفيش أي إطالة يا فندم .. واحنا هنا علشان نفيد بعض..

بالنسبة للزيت اللي حضرتك بتستخدمه.. فحسب المكتوب في الكتالوج .. الزيت ده مناسب طبعا... ويعتبر كمان أعلى من المطلوب من ناحية مستوى الجودة (الكتالوج طالب API SH)

وبالنسبة للزوجة.. فدي أعلى لزوجة مسموح بيها في الكتالوج... وده له مميزات وعيوب..

المميزات إنه اللزوجة دي هتديك أعلى طبقة حماية ممكنة... وبالتالي ده بيطول عمر الموتور...

العيوب إنه هيزود استهلاك البنزين.. لإن الزيت اللزج بيعمل إعاقة لحركة الأجزاء الميكانيكية جوه الموتور.. وبالتالي الموتور بيبذل مجهود علشان يدور نفسه... والمجهود ده بيترجم لاستهلاك بنزين.

حاجة تانية لازم تاخدها في الاعتبار.. إن الزيت ده معدني.. وبالتالي له عيبين ( مالهومش علاقة باللزوجة أو مستوى الجودة ):

1- انتشار الزيت في بداية تشغيل الموتور على البارد ( بعد ركنة طويلة 3 ساعات على الأقل ) بيقى أبطأ من الزيت التخليقي.. وبالتالي بيحصل تآكل في أول 20-30 ثانية من بعد تدوير العربية بمعدل عالي نسبيا.

2- ما تقدرش تسيب الزيت في الموتور فترة طويلة ( أكتر من 15 آلاف كم ) ﻹنه بيتأكسد ويكون ترسبات طينية Sludge.. ودي بتعمل مشاكل كبيرة على المدى المتوسط ( 3-5 سنوات ).

العيبين الاتنين دول هما اللي خلوا شركات السيارات تنصح بالزيوت التخليقية


بالنسبة للفلتر... فزي ماهو مكتوب في الكتالوج بردو... لازم تغير الفلتر مع كل غيار زيت ( 5000 أو 10000 ).

آه.. على فكرة..

لو حضرتك مشيك بالعربية قليل (حسب كتالوج اللانوس: أقل من 20 ألف كم في السنة )... فانسى كل اللي قلناه عن المسافات... واشتغل بالمدة..


حسب الكتالوج.. التغيير بالمدة بيكون كل 3 شهور في حالات القيادة الشاقة ( اللي بتحصل معانا كلنا ).. أو كل 6 شهور في حالات القيادة العادية ( اللي ما بتحصلش مع أي حد فينا ).



لو حضرتك لقيت أي صعوبة في فهم الأكواد أو تصنيفات الزيوت.. أنصحك تقرا الموضوع ده

http://www.nilemotors.net/Nile/341680-a.html


...