السلام عليكم
عربيتى ماتريكس أوتو 2009
غيرت من موبيل xhp 5000 كم لوولفر الألمانى 7000 كم
بس ماحسيتش بفرق جامد الا فى الأول بس نعومة فى صوت الموتور
.. دلوقتى عايز رأيكم هل أغير ل شل التخليقى 10000 كم والا أعمل ايه ؟؟
عربيتى عاملة 101000 كم
عرض للطباعة
السلام عليكم
عربيتى ماتريكس أوتو 2009
غيرت من موبيل xhp 5000 كم لوولفر الألمانى 7000 كم
بس ماحسيتش بفرق جامد الا فى الأول بس نعومة فى صوت الموتور
.. دلوقتى عايز رأيكم هل أغير ل شل التخليقى 10000 كم والا أعمل ايه ؟؟
عربيتى عاملة 101000 كم
خليك موبيل من رأيي بيخلي صوت الموتور ناعم
موبيل احسن زيت هو والكاسترول بس اهم حاجة هات الموبيل من موزعيه المعتمدين او بنزينات موبيل
طيب أكمل موبيل 5000 كم والا أغير ل 10000 التخليقى
ياجماعة أرجوكم
عايز حد يفيدنى
النهاردة فى محطة موبيل البائع قاللى خلليك فى زيت
ال 5000 كم بلاش ال 10000 علشان عربيتك عدت ال 100 ألف كم
ياترى ده صح والا غلط ؟؟؟؟
؟؟؟؟؟
موبيل أو شل مش هي دي المسألة... المهم الزيت اللي تحطه تكون مواصفاته ماشية مع الكتالوج أو أحسن منه.
بالنسبة لموضوع الـ١٠٠ ألف ده.. فأنا بصراحة مش شايف له أي أساس علمي... خصوصا إن الـ١٠٠ ألف ما تعتبر مسافة كبيرة في عمر السيارات.. وكمان الموضوع يعتمد أساسا على مدى التآكل في الموتور وده في حد ذاته له أسباب كتير غير المسافة المقطوعة.
ارجع للموضوع ده لو عايز تختار زي الكتالوج ما بيقول
http://www.nilemotors.net/Nile/341680-a.html
على فكرة... صانع السيارة عمره ما يقولك حاجة تبوظ العربية أو حتى تخلي صورة منتجه وحشة.. فلو التزمت بالمكتوب فانت كده ضامن افضل أداء وأطول عمر.
...
متشكر جدا أ/ borio1704
الموضوع فعلا وافى وجميل
شكرا جزيلا
ربنا يخلليك يارب
شكرا جزيلا
هجرب موبيل 10000 كم التخليقى وربنا يسهل
ﻻ ما تجربش...
اختار الزيت المناسب حسب الكتالوج..
على فكرة.. موبيل عندها كذا زيت تخليقي.. ومش هي لوحدها.. كل شركات الزيوت عندها تشكيلة كبيرة من الزيوت بمواصفات مختلفة علشان توفي طلبات شركات السيارات..
حضرتك تعرف أنهي فيهم المناسب لعربيتك؟؟
علشان كده دايما بقول... شوف الكتالوج عايز إيه وافهمه كويس.. وبعدين اشتري "أي زيت" تكون مواصفاته زي الكتالوج أو أحسن منها...
ولو لقيت زيتين زي بعض في المواصفات اختار الماركة اللي تثق فيها... ولو كانوا الماركتين كويسين دور على بلد المنشأ.
وعلشان مبقاش قصرت معاك... هاتلنا صفحة الزيت بتاعت الكتالوج عندك ( الكتالوج اللي جاي مع العربية ).. وإن شاء الله أدلك على الزيت المناسب حسب المتاح قدامك.
...
ياسلااااام على معاونة حضرتك
رائع والله
طيب أنا هصورلك الصفحة من الكتالوج وهرفعها وحضرتك تقوللى الصح
الصورة فى المرفقات
أرجوك عايز الرد سريعا أحسن أنا لازم أغير الزيت النهاردة
http://www.nilemotors.net/Nile/attac...p;d=1440853666
معلش سامحني عالتأخير.. يادوب لسه داخل عالمنتدى أول مرة من ساعة الظهر..
هو طبعا الكتالوج مش مجرد الصورة دي... لسه كمان عايزين نعرف توصيات مستوى الأداء.
هي مهمة لإنها بتدينا معلومات عن أدنى مستوى زيوت نقدر نحطه في العربية.
باختصار.. عايزين نعرف إيه أكودا الـAPI المطلوبة.. وإذا كان مطلوب أي أكواد تانية أو مواصفات مخصوصة.
لحد ما تجيبلنا التوصيات دي.. وبناء على الصورة المرفقة.. حضرتك مش مسموح تحط زيت تخليقي خفيف إلا بدرجة 5W-30 أو 5W-20 بس.
لزوجات الـ5W-40 و 5W-50 ما ينفعوش مع حضرتك
بالنسبة للزيوت المعدنية... فعندك مجال اختيار أوسع.. 10W-30 و 15W-40 و 20W-50
...
ربناااا يخلليك يارب
طيب هرفع لحضرتك باقى الصور
لكن عموما ينفع أغير من معدنى لتخليقى كامل ؟؟؟؟
الصورة فى المرفقات
حطيت النهاردة موبيل 1 5w-30
الجركن الأخضر 10000 كم
موش متفق معاك فى درجة اللزوجة دى
لان الدرجة دى للستخدام المثالى للوقود لا اكثر ولا اقل
ولاحظ عبارة ( بغض النظر عن الخيار الاقليمي او اهتزازات المحرك )
فدرجة اللزوجة وان كانت مثالية للوقود فغير مثالية اطلاقا لدرجة حرارة مصر
ولاحظت في قرائتي لبعض منتديات السيارات الخليجية تاثر المحركات التي استخدمت درجة اللزوجة تلك زى منتدى السيارات الكورية على سبيل المثال
وكمان انت كنت بستخدم الزيوت المعدنية
الخلاصة : عينك علي مقياس الزيت بصورة اسبوعية ولاحظ نسبة البخر
ودرجة اللزوجة دى زى المية وبالتالى نسبة الاهتزاز هتكون اعلى واحتكاك الاجزاء الداخلية للمحرك اعلي
يعنى عمر موتور اقل
لان كل ما زادت درجة اللزوجة كل ما حافظ على الموتور وبالتالي عمر اطول
حسب الكتالوج.. فأدنى مستوى خدمة مطلوب يعتبر متواضع (API SJ).. وبالتالي فمعظم الزيوت الموجود في السوق هتكون أحسن منه وتقدر تستخدمها وانت مطمئن.
http://www.nilemotors.net/Nile/attac...2&d=1440886383
تمام... أعتقد إن حضرتك حطيت الجركن اللي في الصورة ده
http://www.mobil1-egypt.com/~/media/...111T1457029095
مواصفات الزيت ده ممتازة جدا حسب كتالوج عربيتك...
بس لازم أنبهك لحاجة...
زيوت موبيل 1 تخليقية فعلا بالكامل .. وأساسها غير معدني... وده ممكن يسببلك تسريب من الأويلسيلات في موتور عربيتك خصوصا إن العربية عمرها أكتر من 5 سنين..
فخلي عينك على الموتور كويس خلال الفترة اللي جاية.. ولاحظ لو فيه أي تسريب من أي مكان في الموتور.
وحاجة تانية...
الزيوت التخليقية الحقيقية زي موبيل 1 بتخلي صوت الموتور عالي شوية... بس ما تقلقش .. ده عادي وما هواش عيب يأثر على أداء التزييت.
غير كده... مفيش عندك أي مشاكل.
...
أخي العزيز...
مفيش حاجة إسمها "الزيت ده غير مناسب لجو مصر"...
إنما فيه حاجة إسمها "الزيت ده في الموتور ده غير مناسب لجو مصر"
ونعرف إزاي؟؟؟
من الكتالوج.
وإذا كان بعض التجارب في بعض المنتديات بيقولوا إن مواتيرهم اتأثرت... فده راجع لأكتر من سبب:
1- إن الزيت ما يكونش مناسب للموتور وما هواش من ضمن اللزوجات الموصى بيها في الكتالوج... بالذات في العربيات القديمة.
2- طريقة سواقة العربية شاقة جدا وأغلبها شد وحرق.. وده أحيانا مش بيكون مناسب خصوصا لو كان الكتالوج كاتب توصيات معينة لاستخدام الموتور مع اللزوجة الخفيفة.
3- ممكن جدا يكون الاختيار من الكتالوج ما يكونش صح... خاصة في حالة إن العربية تكون جاية استعمال من الخارج (والحالة دي موجودة في السعودية كتير).. أو ممكن يكون كتالوج مخصص لبلدان أوروبية (زي الكتالوجات اللي على النت).
ولو حضرتك بتقتنع بالتجارب فقط... فأحب أقوللك تجربتي أنا شخصيا...
أنا معايا سيراتو 2014... أول ما ركبت العربية كان سحبها محترم وبتجري من أقل دوسة بنزين...مع إني كنت لسه بليّن وحريص إني أسوق بالهداوة.
لما غيرت الزيت أول مرة (بعد 5000 كيلو زي ما التوكيل قال).. لقيت العربية تقلت وسحبها ما بقاش زي الأول... بس صوت الموتور بقى أهدى شوية بالذات مع الدوارة الأول الصبح بدري.
اكتشفت بعد سنة تقريبا إن الزيت اللي بيحطوه كانت لزوجته 10w-30.. مع مستوى خدمة api sl... مع إن المطلوب في الكتالوج هو api sm... (ممكن تحط sl عند الحاجة).
قررت إني أغير الزيت ده وأحط زيت تخليقي بلزوجة 5w-30 زي ما الكتالوج كاتب.. واخترت الزيت الصح حسب مواصفات الكتالوج بالضبط...
النتيجة كما يلي:
صوت الموتور رجع زي ما كانت فبريكة.. سحب الموتور رجع زي ما كانت فبريكة.. استهلاك بنزين أقل شوية..
أنا ماشي بالزيت حوالي 7000 كيلو لحد دلوقتي... ومستريح عليه جدا... والميزة مش في الزيت في حد ذاته... إنما علشان اخترت صح زي ما الكتالوج عايز.
وللعلم... أن عايش في مدينة جدة في السعودية.. وجوها قريب جدا لجو الغردقة والبحر الأحمر.. بمعنى إن ما عندناش شتا... السنة كلها صيف.
...
أنا فعلا حطيت زيت موبيل 1 اللى فى الصورة ياصديقى
بس انت خوفتنى من حكاية التسريب دى ..
طيب فى الحالة دى أعمل ايه ؟ أغير الأويل سيلز كلها ؟؟؟؟
سؤال تانى ...
أنا كدة كدة بغير الزيت قبل ميعاده
يعنى اللى حطيته ده المفروض انه ل 10000 كم
بس ان شاء الله هغيره على 8000 كم علشان حكاية نسبة البخر دى ...
بس نسبة البخر أتابعها ازاى ؟؟؟
بمقياس الزيت بس ؟؟؟؟؟؟
بصراحة موضوع الـ100 ألف ده مش داخل دماغي ولا عارف أستسيغه خالص.
منين الزيت الثقيل بيدي تزييت أحسن وحماية أكبر ضد التآكل .. ومنين الخلوصات تبقى عالية علشان استخدمنا زيت لزوجته عالية؟؟؟
ماهو الخلوصات هتزيد لما التآكل يزيد.
يعني المفروض إن العربية اللي بتستخدم زيت تقيل يكون موتورها حالته أحسن.
اللي أفهمه إن التآكل ممكن يزيد علشان الزيت التقيل بيبقى أبطأ مع الدوارة الصبح بدري.. أو بمعنى أصح.. الزيت المعدني بطيء في الوصول لجميع أجزاء الموتور في خلال أول 30 ثانية من التدوير.
اللي أفهمه بردو إن ضغط الزيت ممكن يبقى أخف شوية مع الزيت الخفيف.
الكلام ده بيحصل سواء العربية جديدة أو قديمة.
إنما حكاية الـ100 ألف دي بصراحة.... أصلها مش زرار بندوسه فالعربية تتحول إلى حالة تانية بعد الـ100 ألف..
ده غير إن موضوع نقص الزيت أساسا معتمد على حالة الموتور قبل أي شيء تاني.. وتحديدا حالة الشنابر.. ودي ممكن تتقاس بسهولة قوي عند أي ميكانيكي بيعرف يعمل اختبار كبس.
وممكن جدا يكون بلف السايكون (pcv) فيه مشكلة وبيهرب الضغط.. فطبيعي جدا في الحالة دي إن الزيت ينقص.
...
إن شاء الله ما يحصلش حاجة :) ... بس لو فعلا لاحظت تسريب .. يبقى للأسف أيوه.. لازم كل الأويلسيلات تتغير لإنها بقت مشرخة ..
وحتى لو لقيت التسريب من أويلسيل واحد بس.. غير الباقي علشان ما تروحش كل شوية تغير أويلسيل ولا جوان غير اللي غيرته قبل كده.
ما تغيرش على 8000 ولا حاجة...
اشتري علبة زيت (1 لتر) من نفس نوع الزيت اللي حضرتك اشتريته وخليها معاك في العربية.. وكل ما ينقص زود منها.
تاني بأكد... من نفس نوع الزيت .. ماركة ومواصفات.
بالنسبة لمتابعة الاستهلاك (علشان مفيش حاجة إسمها بخر جوه موتور).. فده أكيد عن طريق مقاس الزيت.. وصعب جدا تشوف الزيت خارج من الشكمان.. لإنك لو شفته .. الزيت مش هيفضل في الموتور ألف كيلو على بعض.
لو عايز تعرف أكتر عن موضوع نقص الزيت.. ادخل على الموضوع ده:
http://www.nilemotors.net/Nile/418186-a.html
...
ربنا يباركلك يارب
ومناقشتكم بتفيد جدا الحقيقة
شكرا جزيلاااااااااا