الموضوع: استلمت رينو سانديرو ستيب واى 2016 اتوماتيك

المشاركة الأصلية كتبت بواسطة darkscorpion

السلام عليكم ورحمة الله وبركاته اعضاء الجروب الكريم :)
استلمت بفضل الله يوم 28-7-2015 عربيتى الجديدة رينو سانديرو ستيب واى و حابب اشارككم تجربتى لعلها تساعد اعضاء الجروب و غيرهم فى اختيار العربية المناسبة ليهم

مبدئياً انا كنت بفكر فى عربية فى نفس الفئة السعرية ( 110 الى 125 الف جنية) و فى الغئة دى كانت الاختيارات كالآتي:
شيفروليه اوبترا، و دى استبعدتها عشان موتورها 1500 رغم انها 109 حصان و عشان الشكل الداخلى و الخامات معجبتنيش، و بحمد ربنا انى مجبتهاش بعد معرفتى بموضوع انها صينى و عليها علامة شيفورلية اللى بتمتلك 40% من المصنع الصينى، فى رأيى دا غش تجارى لكن دا مش موضوعنا
السوزوكى السياز، و دى تتميز ان خامات صالونها احسن من جوه و فيها مفتاح start/stop و صالونها اوسع و جنطها سبور مش طاسة .. بس موتورها 1400 8 صباب 90 حصان، و انا كان معايا فيرنا 104 حصان 1600 16 صباب، صعب اجيب عربية موتورها اضعف بكتير كده، و كمان مفيهاش ال navigation ولا الشاشة الكبيرة و دى فارقة كتير
رينو، الستيب واى و اللوجان شكلهم اتحسن كتير، نزل منهم اتوماتيك و الموتور بقى من 110 حصان 16 صباب .. انا اخترت الستيب واى عن اللوجان رغم الشنطة الأصغر و الصالون اضيق سنة ورا و جنطها حديد و مفيهاش باركينج سنسور و اغلى 4 آﻻف لانها اعلى 4 سم، شكلها احلى و بالنسبة لفئة mini suv اختيار افضل من اللوجان فى فئة السيدان ، يا رب اكون قدرت اوضح وجهة نظرى

العربية حجزتها من التوكيل لون اسود شهر 5 استلام بعد 6 شهور ( آخر أكتوبر) بسعر 115900 مع بند يتيح للوكيل زيادة السعر، و قد كان .. فى شهر 6 زادت العربية 3000 لتصل الى 118900 و انا قبلت، لان الاوفر برايس تسليم فورى ب 128 الف و لسة صديق ليا جايبها بالسعر ده

الوكيل اتصل بيا من 10 ايام و قالولى فيه عربية زرقاء استلام فورى، استشرت زوجتى و توكلت على الله و استلمتها بدل السوداء .. الحاجة الوحيدة اللى اكتشفت انها مش شغالة بعد الاستلام هو نور الفوج الخلفى يمين

مبدئياً العربية سحبها ما شاء الله كويس لان حجمها صغير على موتورها، انا لسة بلين مزودتش عن 3000 دورة فى الدقيقة .. الفتيس 4 سرعات بس فبتحس بالنقلة بس اللى اشتراها قبلى قال لى ابموضوع ده بيخف جدا بعد صيانة الألف و سحب العربية بيزيد كمان

انا فولت التانك ب 65 لتر!! غالباً التانك كان فاضى تماماً لما استلمتها،المفروض بعد ما اللمبة تنور بتفول ب 50 لتر فقط .. كومبيوتر الرحلات فيه رقمين ممكن تعملهم reset ، الكيلومترات للرحلة و استهلاك الوقود .. انا استهلكت 57 لتر عملت بيهم 537 كم تكهيف شغال مع الكونتاكت .. أعتقد دا استهلاك كويس بالنسبة لعربية لسة زيرو و بتلين ( حوالى 9.5 كم/لتر) .. انا عملت reset لعداد الكيلومترات و البنزين عشان اقيس استهلاك التفويلة التانية و هقولكم ان شاء الله

ال navigation system ممتاز، و ال bluetooth pairing رائع مع الموبايل و الرادية تحفة و السماعات ممتازة .. ال sub بيطلع صوت مجشم و عالى .. ال volume من 1 ل 31 و الآخر بتاعه عالى جدا .. اعتقد ان نظام lg بالشاشة التاتش و الملاحة و التحكم فى الراديو و الميديا دا اميز حاجة فى العربية .. انا عملت update لل firmware و خريطة مصر مجانا من على الانترنت بس دا ممكن اخصص له موضوع لوحده لان خطواته كتير

القعده عالية طبعاً عن السيدان و دا يزعج شوية فى الأول خصوصاً لو جاى من عربية واطية بس بعد كده بتحس انه ميزة

الكلاكس صوته بيطلع جوة العربية و مزعج، و مكانه سخيف، زرار فى دراع النور .. بس انا محستش بالمشكلة دى اوى عشان انا قلما بستخدم الكلاكس، ممكن اقعد ايام مجيش جنبه

الدريكسيون تقيل، اتقل من الفيرنا، و اكيد اتقل بكتير من عربيات تانية .. دا عيب جامد لو حد جاى من عربية الباور بتاعها كهرباو خفيف زى الاسترا مثلاً .. بالنسبالى مش مزعج اوى و بحسسنى بشوية تحكم زيادة .. بس طبعاً لو كان اخف كان بقى احسن لى

العزل: ممتاز .. دا تقييم شخصى من واحد كان راكب عربية مفيهاش عزل اصلا ( الفيرنا) بس أعتقد ان العزل كويس اوى حتى بالنسبة للعربيات الحديثة، انا راضى تماماً عن عزل المقصورة

التوكيل 16202 على طول مشغول و انا بتلطع بابنص ساعة لحد ما يردوا .. بس هما عارفين الأزمة و شغالين على حلها على حد قول ال agent اللى رد

ابو رواش: مركز الخدمة زحمة جدا و لما طلبت احجز صيانة الالف ادونى ميعاد بعد اسبوعين
انا اخدت نمرة وكيل معتمد و هعمل عنده الصيانة .. هيغير زيت و فلتر و الفاتورة هتكون 560 جنيه زى ما بلغونى فى التليفون

فى المجمل، افضل قيمة للفلوس فى السوق .. موتور ممتاز و اوبشنز عالية و عربية محترمة و توكيل نضيف بسعر منافس جدا

لو فيه اى استفسار انا تحت امركم ..
و دعواتكم بالستر :)

م/احمد عبد العظيم

ياريت تقولنا يا بشمهندس اخبار العربيه معاك ايه علشان انا على وشك انى اشتريها
بالنسبه للعفشه و صوت الموتور و السحب والمكونات بتاعت الفرش و مقابض الأبواب يعني المكونات المصنوعه منها السيارة و مدى جودتها و هل فعلا تستاهل اللي يدفع فيها ولا اجيب حاجه تانيه ياريت تعرفنا بعد اذنك

االف مبروك وربنا ييكفيك شرها

بس انامحتارة بين رينو لوجن رينو سانديرو ستيب وأى 2016 أتوماتيك رايكم الأفضل ايه وياريت حد يقولى على المعرض اللى الأسعار عندة أقل

الف مبروك ربنا يباركلك فيها ويكفيك شرها كنت عايزه اسال حضرتك علي حساسات الركن امامية وخلفيه هل موجودة في الهاي لاين وكمان الكاميرا الخلفية ؟ وسعر العاي لاين كام ؟

ربنا يعطيك خيرها ويكفيك شرها
أخبار المطبات ايه ارتفاعها عن الارض

انا عندى سؤالين بعد اذن حضرتك 1 هى مساحة الشنطة كم لتر بالظبط ؟ 2 هو ارتفاع الاستيب واى من تحت هو نفسة ارتفاع الداستر وشكرا