الموضوع: تقرير مفصل لاستخدام سوزوكى سويفت ديزاير سيدان 3300 كم

السلام عليكم ورحمة الله وبركاته

اخباركم ايه ؟

كنت عملت تقرير استلام للسويفت ديزاير سيدان

وكنت ناوى أعمل تقرير بعد استخدام 3000 كيلو

وهحاول أكون موضوعى جدا

ولاحظت دايما فى أى حد بيشترى أى نوع عربية وأصبح مؤمن بيها جدا .. انه بيخرج عن الحيادية دون أن يشعر أو بعمد أو من غير عمد

وتقوم الدنيا ومتقعدش إذا حد حاول ولو ينتقد العربية .. ويكأن هو اللى صنعها مثلاً

لو دخلنا فى أى قسم من اقسام العربيات هتلاقى أصحابها مش شايفين غيرها وإنها احسن عربية فى الدنيا

المهم مش هطول عليكم ..

1- الإستهلاك .. العربية ما شاء الله موفرة فى البنزين من 15 - 17 كيلو فى اللتر على سرعات متفاوته فى أثناء التسارع فى الزحام وعلى السرعات العالية فى المحاور من 90 - 120 كم/س

2- الثبات .. فى فرق بين الوزن والثبات .. يعنى الثبات يعتمد على العفشة وانظمة التعليق وحتى ولو العربية خفيفة .. فالثبات إذا قارناه بالألمانى فمش حلو بمعنى ان لو فى هوا شديد شوية او عربية منطلقة جنبى ممكن يجبنى يمين وشمال بس خفيف وإذا جريت بالعربية بعد ال 110 العربية بتزداد ثبات .. وكل ده وانا لوحدى فيها اما اذا كنت محملها افراد كتير .. العربية ثابته فى جميع الأحول.

3- الوزن .. خفيفة ولكن أتقل من الأتراج على الطريق

4- التقفيل .. كويس مش بطال .. ولكن لاحظت ضعف فى السلوك اللى موجوده بالكبوت خاماتها مش كويسه اوى .. ربما لأن فى ذهنى الألمانى بردوا.

5 - السحب .. من غير تكييف كويس أما بالتكييف وفى المطالع خصوصاً العربية بتبقى تقيلة فعلاً بحاول أسايسها عشان المطلع .. السرعة بتقل مع المطلع وبعوض ده بالزرار الأوفر درايف وده فى عصاية الفتيس وبيقوم بالغاء النقلة الرابعة وبالتالى بتحرق على الثالث فالسحب بيبقى كويس. يعنى عايز اقول ان الموتور 1600 هيفرق جامد جدا ! غير ال 1200 .

6- التكييف .. كويس الحمد لله وفى ايام الحر اللى فاتت دى كان تأثيرة معتدل لكن مش تلاجه لكن بردوا كويس مش حرانين.

7 - التوكيل .. المعاملة حتى الآن كويسه لكن الخبرة الفنية شوية مش قوى .. يعنى الزيت كان اكتر من الماكس .. وظبط زوايا والتحسن خفيف مش ملحوظ أوى وظبط زوايا بــ 90 ج !!

8 - الوسع الداخلى .. كويس جدا الحمد لله والشنطة الخلفية مش بطالة عريضه ما شاء الله وسقفها عالى.

9 - ارتفاع الكرسى .. ممتاز لكن شايف انه مش مريح أوى.

10 - سعة التانك البنزين .. كان نفسى يبقى أكبر شوية بدل من 43 لتر تقريباً.

11 - الباور الدريكسيون .. مش خفيف زى الهيونداى .. يعنى شوية تقيل لكن حلو ونضيف.

12 - النظام الصوتى .. كويس جدا الحمد لله لكن كان ناقص مكان لوصلة aux

13- الفرامل الحمد لله كويسه بس مش متأكد فيها ebd ولا لاء

14 - العزل الصوتى للموتور .. ممتاز.

15- أماكن التخزين .. مش كتيرة هو درج فى الطابلوه وشنطة العربية بس

16 - العفشة .. ناشفة والإحساس بالمطبات موجود لكن مش بتهبد يعنى لكن الكورى اكحسن فى استقباله للمطبات والعربية مرتفعه عن الأرض ما شاء الله كويسه جدا.

17 - توفرها بالسوق .. عذاب !!

ده اللى انا افتكرته ولو فى اى استفسار انا جاهز للرد .. وربنا يبارك فى العربية وفيكم وفى كل اللى عايز يشتريها ان شاء الله

متفق مع حضرتك فى كل نقاط التقييم - عدا نقطه 11 الباورستيرينج
انا كان معايا هيونداى باور زيت
من راى الشخصى باور السويف الكهربائى انعم و اخف بمراحل + انه بيتقل على السرعة

ونقطة 13 الفرامل فيها abs

خالص تحياتى