الموضوع: اكسسوارات و تعديلات تم تركيبها لعربيتى A7 elegance 2015

السلام عليكم ورحمه الله وبركاته

البوست طويل حبتين .. بس بيتهيألى هيبقى فيه افاده للمهتمين بموضوع بعض الاكسسوارات المتاحه لﻷوكتافيا ال A7

تم تسليم السياره لباسم ( من محل تراست بمحطه الرمل بالاسكندريه ) بمجرد وصولى من القاهره عندما استلمت السياره وقبل الترخيص و تعليق النمر ( النمر اللى عامله زى اللى طالعه من تحت كلب جربان و مبوظه شكل العربيه زى ما باينه فى الصور .. منهم لله بتوع المرور بقى ))

ونبدأ فى سرد التعديلات بالصور :

1- تم تغيير الاكصدام الامامى باخر RS أصلى ... و كان قدامى خيارين .. واحد اسود بالشبكه و الحساسات و علامه VRS بتاعتها متركبين مع بعض بس طبعا هيحتاج رش ... او اكصدام ابيض بدون حساسات ولا شبكه فيحتاج تخريم فى الاكصدام لتركيب الحساسات بس مش هيحتاج رش .. و اخترت الحل الاولانى و بدلت الاكصدام الاصلى بحساساته بشبكته و دفعت عليه فرق ... بالمناسبه بسم الله ما شاء الله كل الحساسات و رشاشات الفوانيس تعمل بكفاءه

2- سبويلر لاصق سكودا أصلى .. وكان نفسي فى الخاص بالفئه RS الاصلى (صورته مرفقه ).. بس كان هيحتاج تخريم فى صاج الشنطه .. ففضلت الاول و اترش ابيض

3- حليه الجانب و الشنطه سكودا اصلى .. وهو طقم من 5 اجزاء للجانبين و الشنطه وهو عباره عن ستيكر بارز شويه

4- بطانه الكبوت .. وبصراحه مش هقدر احكم على فرق الصوت ﻷنى ملحقتش اتعود على صوت الموتور قبل ما أركبها .. بس بصراحه بسم الله ما شاء الله معنديش شكوى من علو صوت الموتور الا بس صوت التكتكه الخفيفه اللى بسمعه مع البنزين فى الشوارع الضيقه الهاديه

5- علامات RS .. الاماميه أصليه جايه مع الاكصدام .. و الخلفيه ركبنا بتاعه الفانتازيا ﻷن كانت هيا المتاحه و قتها .. وانا كنت عاوز اعمل حاجتى كلها مره واحده فمكونتش هستنى الخاصه بال A7

6- عتب ابواب أصلى بعلامه اوكتافيا النوع الاسود .. واخترته بدلا من المعدنى .. ﻷن العربيه بيضاء .. وﻷن كان فيه فرق سعر بين الاتنين ( مرفق صور للنوعين )

7- فرش الشنطه .. وده كان فيه منه كذا نوع بس ده كان افضلهم و اكثرهم عمليه من وجهه نظرى علشان الاجناب المرتفعه لو فيه حاجه فيها سوائل ولا حاجه متبهدلش موكيت الشنطه

8- طقم لوك للجنوط ضد السرقه .. وفيه مكان للقمه فى الفبره اللى فيها عده العربيه فى الشنطه

9- طقم دواسات كاوتش اصلى و فيه مكان لكلبسات التثبيت

10- طقم بدالات نيكل رياضيه اصليه للبنزين و الفرامل فقط

11- طقم دلايات اماميه اصليه خلف العجل الامامى .. بالمناسبه الخلفيه بتيجى متركبه فى العربيه

12- باسكت اصلى بيتركب فى جراب الباب الداخلى

13- لصق استيكر بانوراما لتكمله السقف بالكامل باللون الاسود و تم اثباته على الرخصه ( بيضاء سقف اسود )
14- رش كفوف المرايات بلون اسود لامع

15- دهان كليبرات الفرامل الاماميه و الخلفيه باللون الاحمر .. هو فيه كفرات للكليبرات حمرا او صفرا مكتوب عليها Brembo بس باسم مشجعنيش عليها ﻷنها بتتركب بسيليكون فخوفنا منها

16- دهان الجنوط بدهان خاص اسود مط و دهان مثبت عليه .. وكان بصراحه عند تراست جانط راائع اصلى
بس كان الموضوع هيفتح معايا فى تمن الكاوتش الجديد .. غير انى خايف من ال 17 اساسا من موضوع البلالين و نشوفيه العفشه .. فصرفت نظر عنه وانا قلبى بيتقطع عليه .. صورته موجوده
(كل ما سبق تم تركيبه فى تراست محطه الرمل تحت اشراف باسم)

17- تركيب مساعدين الكبوت اللى اشتريتهم من الدكتور احمد اللى كان عمل اعلان عليهم فى الجروب الخاص بمالكى ال A7 على الفيس بوك .. و تعقيبى عليهم انهم كويسين جدا بالنسبه لسعرهم .. وشغالين كويس بنسبه كبيره .. بس لازم لما يتركبوا يكون اتجاههم زى ما فى الصوره المرفقه .. الجزء التخين فى الكبوت و الرفيع فى البودى

18- كفر سيليكون للمفاتيح من محل مانهاتن ( ايمن ) فى عزبه سعد بعشرين جنيه للواحد

دى الحاجات اللى ركبتها الحمد لله .. و لسه بيلعب فى نافوخى الطاره و دراع الفتيس ال RS .. وكمان حليات جكمان لﻷكصدام الخلفى .. و ان شاء الله ناوى أكسي الارضيه جلد للحفاظ على الموكيت فى الارضيه .. وبفكر اعمل فريم الشبكه الاماميه النيكل و فريم الشبابيك الجانبيه النيكل أسود لامع

ده لينك ل 25 صوره لكل التعديلات .. بس بما انى فاشل فى رفع الصور على الموقع .. ارجو من المشرفين رفع هذا الحرج عنى .. واكون شاكرا لهم

المشاركة الأصلية كتبت بواسطة ahmedjuddy

ربنا يبارلك فيها

ربنا يخليك و يباركلك .. متشكر جدا