الارباح الرأسمالية وقيمه العمل

**tkamal** · 18-08-2015 11:10 AM

العمل شى جميل ويمكن يكون احلى حاجه بيعملها الانسان فى حياته انه بيحب شغله او مهنته عموما بغض النظر عن المكان
لكن لاسف الشديد قيمه العمل فى تدنى ومنحنى هبوط شديد منذ فتره فى المجتمع المصرى
استطيع ان اتفهم هذا الهبوط فى مجتمعات اخرى مثل الخليج او مجتمعات الوفره الماليه

اما ان تسيطر على مجتمع مثل المجتمع المصرى فهى مصيبه
الكثير من اصدقائى حاليا لا يبحثون عن مهنه او قيمه مضافه للعمل ولكن عن ارباح راسماليه سريعه لتدوير راس المال اكثر من مره فى العام مثل العقارات والبورصه الاستيراد من الصين

انا لا الوم اصحاب هذه الاعمال ولكن الوم اصحاب القرار ده لو فى اصلا قرار
ان يصبح قيمه السمسار فى العقارات اعلى من قيمه الدكتور والمهندس او حتى الصنايعى
تجعل اصحاب المهن نفسهم يتحولون الى اعمال راسماليه بحته ويضيع من الانسان حس الابداع والابتكار فى مهنته

انا عارف انى مثالى زياده فى افكارى بس الحقيقه عمر الارباح الرسماليه ما هتقوم بلد

**AlphaCharlie** · 18-08-2015 11:26 AM

ما هو دا إلي مخلي الجنيه عمال يغرق يغرق مع إن في سيولة ضخمة في البلد.
المشكلة مش في حجم السيولة بل في دوران رأس المال من أكثر من جهة.
وللأسف صاحب القرار بحس إنه بيتصرف 180 درجة عكس الإقتصاد الصحيح.

**hilal** · 18-08-2015 11:40 AM

أؤيد ما ذكرته سيادتك
وهو يعود بدرجة كبيرة إلى أن القوانين الضريبية يضعها مجموعة مستفيدة من هذا الوضع
تخيل أن الضريبة على المرتبات والاجور (كسب العمل) تصل في المتوسط إلى 20% ، بينما عندما فكرت الدولة (مجرد تفكير) في فرض ضريبة على أرباح المضاربة في البورصة (10% فقط) قامت الدنيا ولم تقعد وأوشكت البورصة على الانهيار بضغوط كبار المضاربين حتى تراجعت الدولة عن هذا التفكير.

هذا مجرد مثال:
لي صديق يتاجر في السيارات المستعملة ، سألته لماذا لا تقم بتسجيل السيارة التي تشتريها في الشهر العقاري ، فنظر لي مستنكرا وقال: هل تعتقد أنني عبيط عشان أدفع ضريبة عن كل سيارة؟ أنا أشتري بتوكيل من البائع ، وأبيع بتوكيل إلى المشتري ، وعلى البائع الاصلي والمشتري النهائي تسجيل العملية ودفع الضريبة؟

**hesham fawzy h** · 18-08-2015 01:43 PM

هيقوم البلد بالضرايب طبعا

**tkamal** · 19-08-2015 12:19 PM

التوكتوك فى مصر بعتبره نشاط راسمالى بحت
عمل على ايقاف الكثير من الايدى العامله فى مصر وتخليهم عن مهنتهم نظرا لارتفاع الدخل الشهرى من العمل على التوكتوك عن مهنته الاصيله والنتيجه بعد سنوات من العمل مش هتلاقى صنايعى محترف
وهو هيفضل طول عمرة سواق

**Elawany13** · 19-08-2015 01:48 PM

فعلا صنايعية كتير جدا اتجهوا الى التوكتوك اللعين وبقوا عربجيه
وشباب كتير جدا كل احلامهم انهم يضاربوا فى الفوركس والبورصات ويبقوا مليونير فى يومين تلاته
وكل كام يوم تسمع عن نصاب محترف لم كذا مليون من الناس بحجه استثمارهم ويخلع

**ehabpopo** · 19-08-2015 04:35 PM

المشاركة الأصلية كتبت بواسطة tkamal

التوكتوك فى مصر بعتبره نشاط راسمالى بحت
عمل على ايقاف الكثير من الايدى العامله فى مصر وتخليهم عن مهنتهم نظرا لارتفاع الدخل الشهرى من العمل على التوكتوك عن مهنته الاصيله والنتيجه بعد سنوات من العمل مش هتلاقى صنايعى محترف
وهو هيفضل طول عمرة سواق

كلام حضرتك صحيح بنسبة 100 % وانا متعايش مع المشكلة دى كل يوم ... وده لانى بتعامل في مهنة تصنيع الموبيليا والانترية والدهان ( ده مش اعلان يا جماعة والله ... ههههههههههههههههه )
لاكن بلاحظ ان الصنايعية فعلا بتسيب الصنعة وبتشترى توكتك ... والمشكلة الكبرى ان مافيش اصطف صنايعية هايطلع جديد بسبب ان اللى شغالين على التكاتك كلهم اعمارهم بين ال 11 سنة وال 18 سنة ... وهو ده السن اللى كان زمان الولد اللى مالهوش في التعليم كان بيروح ورشة يتعلم فيها صانعة *
صدقونى دى مشكلة كبيرة ... الورش بيقل عددها ... والورش اللى شغالة مش لاقية صنايعية او مساعدين او صبيان ...
وفى نفس الوقت نلاقى المانيا بتحتفل بانهم استطاعوا ان يوجهة افكار الشباب في التعليم الثانوى بنسبة 75 % الى التعليم الفنى ....

**hilal** · 19-08-2015 05:10 PM

لو سمحتولي هناك بعض الخلط في مفهوم الربح الرأسمالي
معروف أن الربح قد ينتج عن رأس المال فقط ، مثل أرباح المضاربة في البورصة أو العقارات أو فوائد البنوك

وقد ينتج عن العمل فقط ، مثل أجور ومرتبات معظم العاملين في الدولة ، وأجرة سائق التوكتوك التي يتقاضاها من صاحب التوكتوك إذا كان مملوكا للغير.

وقد ينتج الربح عن خليط من رأس المال والعمل معا ، مثل عمل سائق التوكتوك على توكتوك يمتلكه أو السيارة الملوكة له.

ولعل ما تقصدونه الاعمال الخدمية بالمقارنة مع الاعمال الإنتاجية الملموسة.