هل السفر مسافة طويلة اول ما استلم العربية غلط؟؟

**ROLAND** · 22-08-2015 06:53 PM

لو سمحتم محتاج نصيحة ضرورى جدااا من خبراء المنتدى ,, ان شاء الله هاشترى عربية كمان اسبوعين على الأكثر وهابقى مضطر اسافر بيها بعد ما استلمها ب أسبوع مرسى مطروح للمصيف بأسرتى ومش عارف ده صح او غلط على الموتور يعنى محتار اسافر بيها مثلا وابقى عامل حاسبى اغير سرعتى كل ربع ساعة مثلا علشان اتجنب عدم الثبات على سرعة واحدة واريح شوية كل ساعة مثلا ولا اصلا غلط اسافر بيها المسافة دى كلها ولا عادى فى العربيات الجديدة ده مش مشكلة ولا اعمل ايه بالظبط ومضطر فعلا اسافر بيها - فيه رأى تانى حد قالى احاول اعمل 1000 كيلو بأى شكل قبل السفر والحق اعمل صيانة ال 1000 قبل ما اسافر وبعد كده اسافر عادى وانا مطمن ؟؟ ايه رايكم ايه الصح علشان احافظ على العربية والموتور

**م أحمد** · 24-08-2015 11:44 AM

سفر مسافة طويلة....زائد تحميل العربية....يبقى دا اكبر حمل على الموتور....و دا مش صح فى التليين

المطلوب فى التليين تطبيع للاجزاء المعدنية برفق بعضها على بعض دون اعوجاج

و حتى بعد ما تعدى الالف كيلو تجنب القيادة العنيفة و ارتفاع عدد اللفات لغاية ما تحس ان العربية بتسحب معاك بسهولة

**borio1704** · 24-08-2015 12:35 PM

أول 1000 كيلو بتحدد حاجات كتير في العربية بعد كده..

وزي ما قاللك م أحمد... اول 1000 كيلو لازم تكون الحمولة خفيفة على العربية والموتور..

ده غير إنك محتاج تستخدم كل غيارات الفتيس لإنه هو كمان بيلين.. فلو انت سافرت يبقى حضرتك لينت الغيار الأخير بس.. والباقيين ما خدوش حقهم في التليين.

رأيي تأجل السفر أو تأجل استلام العربية :d... أو تسافر بالمواصلات لو كنت مسافر لوحدك.