الموضوع: تقرير مميزات وعيوب صنى 2015 الشكل الجديد

المشاركة الأصلية كتبت بواسطة salam100100

بعد امتلاك الصنى الشكل الجديد لمده سنه وعمل 16000 كم, عمل صيانه ال 1000-5000-10000-15000 بالسبع فرع زهراء المعادى
بقدملكوا تحديث لاهم العيوب والمميزات للعربيه:

مميزات النيسانصنى اوتوماتيك ex 2015 الشكل الجديد:

هدوء المحرك ونعمته
الباور ستيرينج ناعم )كهرباء وليس زيت)
الفرامل قوية
الشنطة كبيرة
الكابينة واسعة
ناقل الحركة الاتوماتيك رائع- مريح جدا فالزحمة
وسائل الامان (ABS- BA-2 Air bags)
التكييف جيد جدا وليس ممتاز (مش ساقع زى النوبيرا اواللانوس والفرنا)
استهلاك البنزين داخل المدينه بالتكيف -1210 كم لكل لتر- اما طريق سفر 16 كم لكل لتر – المتوسط 13.5
المرايات الجانبية كبيره
النور الخارجى قوى + فوانيس ضباب
عزل الصوت / الضوضاء جيد جدا
عزل الحرارة جيد جدا
وضعيه القيادة عالى والرؤيه جيدة
الاتزان جيد (افضل من اللانوس والنوبيرا) بالاخص لما تكون العربيه محملة- ناوى اغير الكاوتش 185*65*15 ب 195*60*15 لتحسين الاتزان
العفشة جيدة جدا فى مطبات الهواء
سهولة القيادة والتأقلم على ابعادها
الكاميرا الخلفيه والسنسور عمليين
علو العربية عن الارض
الابواب تفتح بوسع / سهولة الركوب والنزول
وجود 2 حامل اكواب بالخلف فى مسند اليد
اضائه نور الصلون عند فتح الابواب بالريموت وعند غلق الكونتاكت ونزع المفتاح
السماعات الخلفية بالابواب / اريح على الاذن من وجودها خلف الرأس
الزجاج الخلفى للابواب يفتح للاخر
كماليات: الشاشات مسليه جدا لعرض الافلام- ستائر الكبس بتساعد على رفع كفائه التبريد والتكييف- تم تغير نور الصالون والشنطه بليدات ابيض رائعه
التحكم فى ارتفاع الدركسيون
التوكيل معاملتهم مقبولة (نظرا للزحمه اللى عندهم) كل مره بعمل صيانه باستقبل مكالمه منهمبعدها بيوم لتقييم الخدمه
ابشن follow me home
مينفعش اسيب الانوار منوره واسيب العربيه واقفلها . فيها خاصيه تطفى النور عشان تحافظ على البطاريه
اعتقد هتنجح وهتعيش كتير فى الشارع المصرى لانتشارها- هيتوفر قطع غيار خارج التوكيل واكسسوارات
الانذار غير مفعل (يتم تفعيله فى التوكيل مجانا)
خاصية غلق السنتر عند وصول سرعه 15 كم و فتح السنتر عند ايقاف المحرك ونزع المفتاح
هى سيارة عائليه بسيطة هادية وعملية ويعتمد عليها

عيوب النيسان:
لا يوجد مثبت سرعه
تنك البنزين صغير (41 لتر فقط)
الكنبة الخلفية لا تفتح /تطوى لذيادة مساحة الشنطة
ضعف الصاج
ثلاث اشخاص بالغين بيكونو مزنوئين بالخلف (العرض الداخلى)
نصف قطر الدوران كبير بالمقارنه بالنوبيرا
لا يوجد مسند يد للسائق (جبت مسند اسفنج ب40 جنيه شكله ردئ بس بيأدى الغرض)
لا يوجد ديفندر خلفى خلف الاكصدام (يوجد فوم فقط)
يوجد مكان لفيلتر التكيف لكن مش راكب (جبت فيلتر بتاع كاشكاى صينى ب60جنيه وقصيته على القد وشغال تمام)
لا يوجد مؤشر حرارة فى ال ex
صوت السياره من الخارج عالى (يمكن لعدم وجود فرش بالكبوت)
الشنطه والكبوت لا يوجد بها فرش
لا يوجد اماكن تخزين غير التابلوه
المروحة الخلفية (ليس تكييف خلفى) صوتها عالى لما تكون على 2
فالعربية ولاعة سجائر لكن مفيش طفاية
الشماسة بتاعت السائق فيها مرايا لكن الراكب اللى جمبه معندوش
كرسى الراكب الامامى بيه جيب لكن كرسى السائق لا يوجد به جيب
لا يوجد شماعات بالخلف
وجود كالون واحد فقط بباب السائق/ لا يوجد كالون بباب الراكب الامامى او الشنطة
مساحات الزجاج لما تكون مرفوعه, لازم تنزلهم بترتيب, اليمين ثم الشمال
لا يوجد لمبة بالتابلوه تنبه ان شنطه العربيه مفتوحة
مكان زراع تعديل ظهر الكرسى مزنوء بين الكرسى والقائم
لا يوجد دلايات للعجل
لا يوجد تحكم فى ارتفاع حزام الامان
درج التابلوة بدون مفتاح
نفسى كان يبقا فيها شبكه زى بتاعت الكارينز والماتريكس اللى هي بطول العربيه

قطع الغيار ؟؟؟؟؟ مش عارف لسه متلسعتش منها لكن لما بقارنها بالشارك اعتقد الصنى تكسب
بالنسبه لمشكله الفرامل, لو ظهرت عندى وانا فالضمان هصلحا فالتوكيل, ولما اطلع بره الضمان هجيب تيل وطنابير من بره
فى موضوع هنا بيتكلم على دا


كمجمل: عربيه انا مقتنع بيها جدا
النيسان صنى عربيه ناجحه فالمابيعات جدا, ومنافس شرس جدا لعربيات كتير الى الان
منتشره جدا ودا فى مصلحتها

شكرآ ليك
ياريت لو تعرف مكان تركيب جهاز الفصل نيسان صنى 2016
او رقم تليفون

المشاركة الأصلية كتبت بواسطة ibrahim 35206

شكرآ ليك
ياريت لو تعرف مكان تركيب جهاز الفصل نيسان صنى 2016
او رقم تليفون

لو العربيه فالضمان, خلى التوكيل يركبه
انا شفتهم وهم بيركبوه فالسبع فرع المعادى (واحد اسمه محمد كان معايا نمرته وضاعت)
المهم شفته وهو بيجربه مع العميل, بيقدر من الموبيل انه يفصل طرمبه البنزين

وأخبار البلية بتاعت العجلة الخلفية ايه معاك؟؟؟

المشاركة الأصلية كتبت بواسطة مهندس محمد

وأخبار البلية بتاعت العجلة الخلفية ايه معاك؟؟؟

لسه كويسه بعد 22000 كم
لو ابتدا تطلع صوت هغيرها فالضمان
ولما اطلع بره الضمان هجبها من التوكيل باعتقد 180 جنيه

المشاركة الأصلية كتبت بواسطة esam722

نقطة الثبات من اكبر العيوب فى العربية دى انا سوقتها على طريق الكريمات وكان معايا 3 اشخاص يعنى المفروض العربية ثابتة مفيش كلام بجانب ان العربية هاى لاين ومعملتش 800 كيلو واول ما اوصل لسرعة 130 /140 الاقى العربية بتعوم وعلشان تثبت لازم تنزل السرعة ........ طب لو العربية مفيهاش الا انا كان ايه اللى هيحصل مع السرعة دى

مساء الفل عليكم انا لسه جديد فى الموقع ..
بس كده اظن ان حضرتك عندك مشكله فى العربيه طالما بتعوم منك ..
لان انا معايا عربيه نيسان صنى 2002 .1300cc ..
والجنط مقاسة 14 مش 15.. ومع ذلك ثبات رائع حتى 140 مفيش اى مشكله
.. بس انا العربيه بتعتى كانت بتعوم منى
.. اتضح ان المساعدين خفاف .. ومحتاج ظبط زوايا فقط .. شكرا