فرع العامرية عايز يحسب مصنعية السيور من غير مايركبها!

**mabdelaziz** · 02-09-2015 12:09 PM

كنت حاجز صيانة 60 ألف النهارده فى فرع العامرية, وأنا كنت مغير السيور على 50 ألف بس اشترتها من التوكيل وغيرتها بره عند ميكانيكى معرفة, المهم بقول للمهندسة هبة أنا عايز أعمل صيانة 60 ألف بس أنا مغير السيور قبل كده فامش هغيرها, قالت لى مادام مغيرها بره يبقى لازم تدفع المصنعية عشان أدخلك العربية صيانة 60 ألف ويبقى لك صيانة 65 ألف المجانية!

قلت لها لا طبعاً ماينفعش الكلام ده, أدفع مصنعية حاجة راكبة ليه؟ وانتم ليه تاخدوا فلوس حاجة ماعملتوهاش؟

قالت لى هو السيستم كده ودى سياسة الشركة, وشوف اللى حضرتك عايز تعمله إيه؟
قلت لها طب إيه الحل غير إنى أدفع مصنعية السيور؟
قالت ممكن أدخلك العربية تغير زيت وفيلتر وفيلتر هواء وبوجيهات وزيت فرامل وأشيك على العفشة, كبنود منفصلة ودى هتكلف 1400 جنيه, وبرضه مش هتبقى صيانة ومش هيبقى لك صيانة 65 ألف المجانية!

قلت لها طب وأنا كده مستفيد إيه؟
نفس الرد برضه ده سيستم الشركة مش هقدر أغيره, مع إنها قبل كده فى صيانة ال 40 ألف قالت لى السيور محتاجة تتغير عشان العربية قعدت 3 سنين, قلت لها بس المانيوال بيقول 4 سنين أو 60 ألف, فأنا مش هغير دلوقتى, وكتبت كده فى التقرير بتاع الاستلام.

طلبت أتكلم مع المدير, جالى مهندس تانى اسمه محمد شوشة تقريباً, برضه نفس الكلام لازم أدفع مصنعية السيور عشان تتحسب لى صيانة, وقال لى أنا ماينفعش أديلك شهادة بالصيانة وانت مغير السيور بره, وأنا ماشفتهاش حتى متركبة إزاى!
قلت له يعنى أنا أدفع المصنعية عشان تدينى شهادة وإنت برضه ماركبتهاش؟ رغم إنى شارى السيور من التوكيل ومعايا فاتورة ومعايا الكراتين بتاعتها!

المهم برضه نفس الرد, دى سياسة الشركة واحنا موظفين ماينفعش نعمل غير كده.

بصراحة اتخنقت وقلت لهم خلاص أنا عايز ألغى الحجز وأخدت العربية ومشيت, واتصلت ب 16202 أشتكى, بعد عرض التفاصيل قالولى كلمنا مديرة فرع الشكاوى فى فرع العامرية وأخدت رقم تليفونك وهتكلمك عشان تشوف الموضوع ده.

حد حصل معاه حاجة شبه دى قبل كده؟

وهل من حقهم فعلاً ياخدوا فلوس مامعملوش بيها حاجة عشان يعملوا الصيانة؟
إيه المشكلة لما أعمل الصيانة ويبقى مكتوب برضه إنى مغير السيور بره فامش داخلة فى الصيانة؟

**corsair** · 02-09-2015 01:40 PM

سرقة ونصب كل ده علشان يخلوك متفكرش تغير اي حاجه بره تاني بس انتا غلطان لو قالولك غير السيور قولهم هيه محتاجه تتغير واقلبلهم الدنيا وكنت تقولهم انا لسه مشيك علي العربية بنفسي انا مهندس ميكانيكا والسيور بحالتها قدامكم

**mabdelaziz** · 02-09-2015 02:03 PM

المشاركة الأصلية كتبت بواسطة corsair

سرقة ونصب كل ده علشان يخلوك متفكرش تغير اي حاجه بره تاني بس انتا غلطان لو قالولك غير السيور قولهم هيه محتاجه تتغير واقلبلهم الدنيا وكنت تقولهم انا لسه مشيك علي العربية بنفسي انا مهندس ميكانيكا والسيور بحالتها قدامكم

ياريتهم بيقولوا غير السيور, دول عاوزين ياخدوا مصنعيتها من غير مايعملوا أى حاجة, عشان بس تتحسب لى صيانة دورية!

أنا شايف إنه نصب فعلاً لأن السيستم مرن لدرجة إنهم ممكن يغيروا السيور على 3 سنين و40 ألف, مش على 4 سنين ولا 60 ألف.

الحكاية كلها إنهم عايزين فعلاً يخلونى مافكرش أعمل أى حاجة برة.