ماهو اللوك Differential Lock
ماهو اللوك Differential Lock
كلنا بنسمع عن اللوك أو اللوكات إللى بتبقى موجودة فى بعض عربيات الدفع الرباعى - ده موضوع مختصر ومبسط عن معنى اللوك وفايدته وبدائله فى عربيات الدفع الرباعى :
١- فى بداية إختراع السيارات كان فيه مشكلة عويصة بتقابلهم وهى لما العربية بتاخد ملف فالعجلات الخارجية بتلف بسرعه أكبر من العجلات الداخلية وده كان بيسبب مشاكل فى تاكل العجل باستمرار وكمان كان التحكم فى العربية بيبقى صعب - وعلشان كده إخترعوا الكورونة أو الـ differential وهو عبارة عن حاجه عاملة زى الكورة جواها شوية تروس عالجت المشكلة دى وخلت العجلتين إللى على نفس الأكس يلفوا بسرعات مختلفة بدون أى مشاكل - ده فيديو بيوضح ببساطة فكرة عمل الكورونة
https://www.youtube.com/watch?v=SOgoejxzF8c
ونلاحظ فى الفيديو ده إن الترسين إللى باللون الأصفر مش بيلفوا حول محورهم لما السرعة بتاعة العجلة اليمين تبقى مساوية للسرعة بتاعة العجلة الشمال - ولما يحصل إن العربية تدخل ملف حنلاقى الترسين إللى باللون الأصفر حايلفوا حول محورهم علشان سرعة العجلة الشمال بقت أكبر من العجلة اليمين فالترسين دول لفوا علشان يسمحوا بالفرق فى السرعتين بين الاكس اليمين والأكس الشمال.
٢- لو فيه عجلة من العجلتين إللى على نفس الأكس عدت على مياه أو رمل او طين يعنى اتزحلقت او غرست حتلف على الفاضى ولما الكورونة تلاقى عجلة بتلف على الفاضى حتحول العزم عليها اتوماتيك من نفسها لأن إيه اللى يخليها توجع دماغها وتودى العزم على عجلة ليها مقاومة فالعجلة التانية حتقف ومش حاتلف مع انها مش غارسة ولو الدفع ثنائى يبقى العربية حاتقف وماهياش طالعة من الغرز ولا بالطبل البلدى .
٣- طبعاً هنا ظهرت الحاجه لأنهم يعملوا الدفع الرباعى يعنى عندك اكسين بيلفوا كل اكس عليه عجلتين فلما عجلة تلف على الفاضى يبقى العجلة التانية اللى معاها حاتقف بس لو الاكس التانى العجلتين بتوعه فى السالك حيطلع العربية من الغرز لأن هنا العزم متوزع ٥٠٪ على الاكس الأمامى و ٥٠٪ على الأكس الخلفى - لغاية هنا والكلام ده جميل - إفرض بقى عندك عجلة على كل اكس اتزحلقت او غرست طبعاً العجلة اللى معاها على نفس الاكس حاتقف يبقى عندك عجلتين بيلفوا على الفاضى وعجلتين واقفين بيتفرجوا :)
نشوف فى الفيديو ده من أول الثانية ٥٥ لغاية الدقيقة ١,١٥ وبلاش نكمل علشان منتلخبطش
https://www.youtube.com/watch?v=RcRBYpccP6g
حنلاقى إن العجلتين اليمين بيلفوا على الفاضى والعجلتين الشمال واقفين يتفرجوا - بقت العربية لاهى دفع رباعى ولا خماسى ولا الهوا !!!!! نعمل إيه بقى فى المشكلة دى - نخترع اللوك - اللوك ده بيخلى العجلتين اللى على نفس الأكس بيلفوا بنفس السرعة سواء غرسوا او ماغرسوش - يبقى لما عجلة تلف على الفاضى التانية حتلف برضه مش حاتقف علشان هنا العزم اللى على الاكس ٥٠٪ من اجمالى العزم بيتوزع ٢٥٪ للعجلة اليمين و ٢٥٪ للعجلة الشمال فلو العجلة اليمين اتزحلقت او لفت على الفاضى العجلة الشمال حاتلف عالمليان وحاتطلع العربية من المحنة اللى هى فيها - وبالمثل لو عجلة على كل اكس لفت على الفاضى العجلة التانية من كل اكس حاتلف على المليان وحتى لو فيه ٣ عجلات بيلفوا على الفاضى فالعجلة الوحيدة السالكة حاتنقذ الموقف وتستر العربية :)
٤- الفيديو ده فيه عربيتين الحمرا من غير لوكات والسودا فيها لوكات
https://www.youtube.com/watch?v=ERf6MqwYyBE
العربية الحمرا اللى من غير لوكات فشلت تماماً فى الطينة - والعربية السودا كانت فى الاول باللوك الخلفى فقط ومعرفش يكمل وبعدين لما شغل اللو الأمامى كمان نجح فى المحاولة بتاعته
٥- طيب لو رجعنا تانى للنقطة رقم ٢ بتاعة لو فيه عجلة من الإتنين لفت على الفاضى بسبب مياه أو طينة أو اتزحلقت على رمل أو غرست بالطبع العجلة اللى معاها على نفس الأكس حاتقف زى ما إتفقنا- طيب لو العجلة إللى بتتزحلق دى أو بتلف على الفاضى عرفت أكلبشها أو أخليها تقف أو أفرملها لوحدها يبقى كده أنا حاودى العزم للعجلة التانية إللى معاها على نفس الأكس وإللى مش متكلبشة وحاضطرها إنها تلف وبكده حاخليها تحرك العربية وده الإختراع التانى البديل للوك وهو إسمه الـ traction control أو Brake Lock (لوك الفرامل) وده بيبقى عن طريق فرملة العجلة إللى بتلف على الفاضى عن طريق إستخدام الـ ABS وبرنامج فى كمبيوتر العربية بيخلى العجلة تفرمل لوحدها لو عدد لفاتها زاد عن ١٠٠ لفة بالنسبة للعجلة التانية اللى معاها على نفس الاكس وبالتالى العزم حايروح للعجلة التانية اللى مش مفرملة ومش غارسة وحاتطلع العربية من الغرز.
٦- وفعلاً عربيات كتير دلوقتى بتطلع بنظام الـ traction control لأنه مش حايكلف كتير نظراً لأن العربيات فيها ABS من الأساس وفيها حساسات لسرعة لكل عجلة وفيها كمبيوتر يبقى مافيش أى خامات حاتتزود على العربية غير البرنامج بس.
وده فيديو بشرح موضوع الـ traction control أو brake Lock (لوك الفرامل)
https://www.youtube.com/watch?v=yxHQeO-Y7GU
٧- فيه كمان بعض العربيات بيدمجوا اللوكات العادية مع لوك الفرامل علشان يحسن الأداء بتاع الأوفرود.
أتمنى أكون قدرت بصورة مبسطة أشرح موضوع اللوكات وأهلاً وسهلاً بأى إضافة أو إستفسار من الأعضاء