الموضوع: سعر الدولار المتوقع علي ديسمبر 2015 و يناير 2016

المشاركة الأصلية كتبت بواسطة ahmed_eng2001

ربنا يقدرك على فعل الخير و يجزيك عنها

مشكلتى الشخصية ان مش كل بدائل الادوية بتنفعنى ... فيه بدائل زى قلتها معايا ... يلا .. ربنا يكرمنا من عنده


و احب اطمأن حضرتك ..... الثقافة العامة ماشية فى طريق زيادة الاستهلاك ... و زيادة الطلب على الرفاهية بيزيد
و انا عن نفسى معنديش اى امل ان الثقافة دى تتغير ... و ان الناس تكون مقتنعة بالكلام ده مش نتيجة ضيق ذات اليد

من موضوع نيكسون ده ... بالفعل انا مشفتش حد بيشكر فيه ... الناس بتتكلم من بداية ان النظام ده تم الاعداد له فى ليلة واحدة ... لغاية الذكرى الغير سعيدة لفترة حكمه

الممارسات الاحتكارية ليها قوانين و رقابة زى ما حضرتك ذكرت .... و من فترة ليست بالبعيدة ... شرشحوا بيل جيتس يا عينى علشان مايكروسوفت بدأت تسيطر على السوق و ميكونش فيه شركة غيرها ... طاب هو ماله ؟؟!

ال ايه .... شركته بنجاحها خلت بقية الشركاoت تقفل و بكدة اصبحت هى الوحيدة فى السوق ... و ده ضد قانون الاحتكار ... ساعات كتير فيه حاجات اجدها منطقية بالرغم من انها مش عجبانى و مش مقتنع بيها

كتاب الدكتور زكى نجيب محمود .. مجتمع جديد او الكارثة جيد على غير المتوقع ... هو اسلوبه قديم شوية ... بس ماشى الحال .. و بيعكس طبعا علمه .. انا لازلت اقرأه

الكتاب الى بيتكلم عن الصين مش لاقيه

اى ادوية تخص الجهاز التنفسى العبد لله ممكن يفيدك فيها اكتر من احسن دكتور انف و اذن/حساسية وصدر. . . بروح اقعد مع واحد قريبى فى صيدليته احيانا. . . بقعد كده كأنى فى سوبر ماركت قدام ركن ادوية البرد و الحساسية خاصة فى السيزون زى دلوقت . . . انقى و اقارن بين كل formula و النانية و اخد اللى يناسبنى. . . بحكم خبرة 15 سنة حساسية. . . و دراسة كاملة لكل المواد الفعالة بها و اثارها الجانبية مقابل فوائدها الخ . . . عافانا الله و اياك

ثقافة الاستهلاك يا عزيزى فى ازدياد مضطرد بسبب ازمة اعمق هى ازمة التطلعات. . . خلاص الدنيا اتفتحت على بعضها و محدود الامكانيات اصبح يرى كيف يعيش غيره و كله تطلع لكى يحقق و يمتلك اشياء مما يراها. . . و يكفى مثلا انه فى اخر عشر سنين اتضاعف عدد العربيات فى مصر مرتين تلاتة بسبب التوسع فى القروض الشخصية و التطلع للرفاهية اللى من اهم رموزها امتلاك سيارة قبل ان تتحول الى ضرورة بسبب الزحام و التكدس و عدم وجود بديل عام محترم. . .

هم مش بس بهدلوا بيل جيتس كانت بقت هينة. . . لأ دول الزموه يقسم الشركة اتنين. . . و قد كان. . . و جوجل نفس الكلام. . . يا باشا هناك الرقابة بتجيب اتخن تخين الارض. . . شركة VW راحت 50% من قيمتها فى البورصات بسبب ازمة الانبعاثات الاخيرة. . . و لسه باقى التوابع

زى ما قلتلك قبل كده. . . زكى نجيب محمود اسلوبه مقعر زى العقاد. . . لكن مع التركيز تستطيع الوصول لافكاره بسهولة. . . هحاول ادورلك تانى على الكتاب اللى عن الصين

المهم احنا مش عايزين الحوار يتحول لنقاش جانبى بيننا. . . اتمنى الاخ sha2e يدخل يشاركنا و يعلن صفاء الجو مرة اخرى لانه عارف اننا هنا- بالذات الناس القديمة- بمثابة رابطة اصدقاء و لن ابالغ ان قلت اسرة. . . و كل سنة و جميعكم بخير

المشاركة الأصلية كتبت بواسطة eslamrace

تمام متفق معاك بس الحلزونه دى اللى حيكسرها هو احتياج التاجر للسيوله علشان يستغل فرص تجاريه تحققله ارباح اكتر من اللى حيعملها لو فضلت البضاعه جنبه
بمعنى ان التجار دلوقتى فى مجالات كتير حجم مبيعاتها بيغطى تكاليفها بالعافيه وبالتالى هو مفيش معاه سيوله يدخل بضاعه جديده وبالتالى المستورد مش لاقى حد يشيل من عنده البضاعه
وفى ظل فرصه زى انخفاض قيمه اليوان فأى مستورد عايز سيوله كبيره علشان على الاقل يحقق ربح اعلى والحاله الوحيده اللى تخللى المستورد مش فارق معاه انه يكون عنده كم دولار كسيوله تخليه يعرف يستفيد فى الحالتين ولكن ده مش بيحصل والحلزونه مبتتكسرش وزى مقولت حضرتك واضح انها مش حتتكسر

الفكره دلوقتى ان الحل الوحيد "غير سلوك المستهلك اللى غالبا تأثيره مش كبير" هو التدخل الحكومى ولكن ده مش حيحصل وبما ان مفيش حل تالت منطقى يبقى اى تغيير خارجى فى العملات سواء زياده او نقص حيكون بلا تأثير حقيقي علينا سوى للاسوأ
لو فى حل ثالث ممكن تقترحه اتمنى تشاركنا بيه لأن بصراحه الموضوع اقتصاديا واجتماعيا واضح انه ملهوش حل قابل للتنفيذ
تحياتى.

خلينا بس نوضح ايه المقصوحد بالركود التضخمى. . . الركود على مستوى الاقتصاد الكلى هو انخفاض مستمر فى الناتج القومى المحلى. . . يترجم لايه. . . يترجم الى انه فى تباطؤ فى الانتاج و الدورة الاقتصادية عموما. . . يعنى بطالة اعلى و اجور اقل . . . و ده اللى فى النهاية بيترجمه الشارع بأن الحال واقف. . .
اما التضخم فمعروف. . . فلوس كتير فى ايدين الناس بتتصارع على نفس العدد من السلع و الخدمات. . . و الفلوس عمالة تزيد و السلع و الخدمات هى هى. . . و النتيجة الحتمية ارتفاع الاسعار
طيب ايه اللى حصل فى اخر اربع سنين خلانا نوصل لكده. . . الركود ضرب معدلات النمو الاقتصادى و خلاها فى النازل بأستمرار بسبب عدم الاستقرار السياسى اللى خلى الاستثمار الاجنبى يقف و السياحة شرحه. . . بس طبعا الاستثمار الاجنبى المباشر اثره اكبر. . . اما التضخم فسببه ببساطة ان الفلوس كترت فى ايدين الناس لانه على مدار الاربع سنين اللى فاتوا يكفى اقولك ان بند الاجور فى الموازنة العامة زاد من 80 مليار الى 210 مليار. . . و النتيجة على ذلك بالتبعية. . . ان حجم النقد المتداول فى البلد زاد من 150 مليار جنيه الى 300 مليار. . . يعنى اتضاعف. . . طب الفلوس دى هتقعد ساكتة كدة. . . لأ طبعا . . . عايزة تشترى. . . فطبعا لازم اسعار السلع و الخدمات لازم يرتفع. . . و ده طبعا مش محتاج شرح لان كلنا عايشينه. . . طب و الحل. . . جه متأخر بس جزء منه اتعمل . . . اللى هو ايه. . . ان اصلا البلاعة المفتوحة على البحرى اللى اسمها الاستيراد لكل شئ و اى شئ لازم نحاول نحجمها. . . قبل ما ال inflation يقلب رسمى ل hyperinflation و ساعتها كلنا هنروح فى داهية. . . كان لازم ده يحصل لاننا مجتمع غير منتج. . . كان لازم ده يحصل لانه اذا كان الركود هو تباطؤ فى الانتاج. . . طيب هو اصلا احنا بننتج ايه اصلا. . . اما حنفية الفلوس المفتوحة على مصاريعها فى القطاع العام و الدولة ففى محاولات جادة لهيكلتها متمثلة فى قانون الخدمة المدنية اللى مش عاجب الناس المستفيدة من الحنفية اللى باظت من زمان و عايزة تتسد. . .
طيب النتائج الايجابية المباشرة ايه. . . اهمها تثبيت الوضع على ما هو عليه و منعه من التدهور اكثر. . . بالذات من ناحية ال money supply اللى على البحرى فى ايدين شعب استهلاكى زينا. . . طيب النتائج السلبية المباشرة. . . للاسف زيادة الركود و هو الحاصل حاليا و زيادة التفليسات مع الوقت من التجار الصغيرين و خروجهم من السوق فى حين الباشا المستورد الكبير عملهم من زمان على قفاهم بسبب انه مثبت الاسعار و مانعها تنزل و ده نظام الكارتلات فى كافة السلع و معاه اللى يكفيه عدة اعمار و مش محتاج السوق و لا الشغل اصلا و هو ده التاجر المصرى الاصيل. . . وقت الجد يخلع و يقولك انا عندى اللى يكفينى و لما السوق ينصلح حاله ابقى ارجع . . . و ده اللى ذكرته انت من ملاحظاتك فى شغلك. . . و برضه كان حد عامل قريب موضوع بيقولك ان العقارات فيها نفس الركود بل و اكبر و الدليل زيادة مدى التقسيط . . . طيب و على المدى المتوسط. . . لسه كام سنة عقبال ما البنك المركزى يعرف يلم الكاش المتداول الزيادة من السوق عن طريق رفع الفايدة. . . و على المدى الطويل لو متعلمناش النظام و الانضباط فى الاستهلاك من اليابانيين اللى الكاتشب عندهم لسه زايد تمنه اول مرة من خمسة و عشرين سنة. . . لو متعلمناش ده يبقى و لا حاجة هتتغير. . . و يبقى الوضع على ما هو عليه لانها دايرة جهنمية صنعناها بأيدينا جميعا بوعى او بغير وعى. . . و لا خروج منها الا بأيدينا ايضا. . . فاكر حملة خلوها تصدى و موديلها يعدى اللى معرفتش تنزل جنيه من تمن عربية. . . اهى بقت اجبارى على الكل تجار و مستهلكين . . . و نشوف مين اللى هيصوصو الاول. . . و عشان تفهم قصدى هديك مثل بسيط. . . الفترة اللى اليورو وقع فيها بسبب ازمة اليونان. . . تجار العربيات بتوعنا الناصحين عملوا ايه. . . اشتروا عربيات فى شهرين. . . قد اللى بيشتروه طول السنة. . . طبعا على امل انهم يبيعوا بنفس الاسعار بل و اعلى و يضربوا فرق سعر العملة فى كروشهم. . . هل حد شاف عربية اوروبى سعرها نزل جنيه. . . طبعا لأ. . . خليهم بقى يشبعوا بيها و يشوفوها قدامهم و هى بتصدى لغاية ما يبقوا مجبرين يعملوا تخفيضات حقيقية و الا مش هتتباع. . . مش بقولك التاجر المصرى اغلبه يستاهل الولعة و يستاهل اللى يجراله- الا من رحم ربى