الموضوع: استغبيت وخيشت واحد في الرصيف وضميري بيأنبني

امبارح راجع من اكتوبر انا وزميل لي من طريق الفيوم وقبل بوابة حدائق الاهرام في يو تيرن "غير قانوني" تقريبا يوم بعد يوم بلاقي حادث شنيع من الناس الي بيلفوا غلط ..

كان واحد معاه لانوس واقف عايز يدخل الملف ... اديته نور ووقف مستني اعدي.

كنت ماشي علي 100 يعني مش طاير .. ولما لقيته وقف كملت في اليمين.

قبل 100 متر بالظبط علي الملف لقيته طلع في الطريق. لا وكمان رايح الحارة اليمين. اقصى اليمين. وطبعا لقيت مفيش طريق قدامي. والله انا وقفت علي الفرامل وايدي علي الكلاكس والنور علشان يقف واعرف اعدي منه وهو ولا هنا. لدرجة ان الكاوتش عندي باظ واتحرق من الفرملة.

الحمد لله في الامتار الاخيرة عرفت اخد شمال سنة واتفادى اني اخبط فيه .. لقيت كل العربيات وقفت في الاتجاهين من صوت الفرامل لان مكنش حد متخيل انها حتعدي بسلام. .. اما البيه فماشي عادي علي اليمين ولا كأن حاجة حصلت وكمان بيبص بقرف ومش عاجبه...

طبعا احنا اعصابنا سابت و تصرف لا ارادي مني قررت اني ادخل فيه بالعربية حتي لو ححك الرفرف بتاعه او اكصدامه. والظاهر اني هجمت عليه جامد ... فخاف وكسر بعنف ناحية الرصيف .. ودخل في الحجارة الي علي اليمين وخبط في السور. تقريبا عربيته محتاجة حاجات كتييير.

كملت بدون توقف. الناس الي شافت الموقف كذا واحد جه جنبي وكان آرائهم مختلفة...
في ناس قالت حرام دا راجل كبير. ولما بقولهم دا غبي وكان حيتسبب في موته وموت ناس تانيا كانوا بيقولوا "حقك برضو"
وناس تانيا قالوا 100% الي انت عملتو. يستاهل.

بغض النظر عن الرأيين. بس انا شايف انه لو محصلش كدا كان حيعمل التصرف دا بكره وبعده. والنتيجة انه حيتسبب في احتمال موت عدد من الناس وهو شخصيا. تخيل لو مكاني عربية نقل مثلا؟
متهيألي كان لازم حد يعلمه بالطريقة الي صعب ينساها..