الموضوع: زجاج امامي كورولا ٢٠١٥

المرايه هي هي بيفكها من القديم ويركبها في الجديد
لانها مرايه لصق في الزجاج

سعر الزجاج اعتقد هيبقى في حدود 1500-2000 في التوكيل

بخصوص الضمان ما اعرفش

اشكرك يا فندم، حضرتك حصل معاك نفس الموقف؟ انا بسأل عشان اعرف التركيب بيكون نظيف ولا في اي مشاكل؟ وهل الزجاج الجديد عليه لوجو التويوتا الاصلي؟ مع الشكر مره ثانيه.

زجاج التوكيل هو هو اللي اتكسر منك . والعربيه مش بتخرج برا الضمان . اللي يخرج العربيه برا الضمان .. قطع غيار ميكانيكا أو لعب في كهربه العربيه . و انصحك بتركيب الزجاج الأصلي . لأن اللي موجود في السوق كله محلي إنتاج شركه د.جريش و ده لو لقدر الله اتكسر هيتفرتك في وش الناس اللي راكبه في الامام لأنه مفيهوش طبقه حمايه زي الأصلي . الأصلي لما بيتكسر بيفضل مكانه و مش بيفرط جوا العربيه .
أما موضوع الضمان برده حضرتك ممكن تتصل بالتوكيل و تتأكد الأول قبل ما تعمل اي حاجه .

اشكرك ا/ أحمد، تعرف ثمنه كام؟ بكلمهم من الصبح ولا حد بيرد.

المشاركة الأصلية كتبت بواسطة osamafayez

الزجاج الامامي للعربيه (كورولا ٢٠١٥) اتكسر بسبب طوبه وانا ماشي علي الدائري ولا يمكن علاجه. فسؤال لاهل الخبره: سعره كام في التوكيل؟ وهل مراية الصالون بتكون موجوده في الزجاج الجديد ولا بيفكوا المرايا القديمه ويلزقوها مره اخري في الجديد؟ اخر سؤال: لو تم تغير الزجاج بره التوكيل، العربيه بتطلع من الضمان؟ ارجو الرد سريعا من قبل من تعرض لنفس الموقف لسوء حالة الزجاج. مع الشكر.

انا حرامي ابن .... كسرلي الزجاج بتاع الباب الامامي يمين و غيرته في التوكيل و كان ب 1550 بس التأمين دفع القيمة بالكامل. و الزجاج الي ركب زي الي اتكسر بالضبط بكل المكتوب عليه و اللون الاخضر الفاتح الجميل بتاعه
أنا حصلي الي حصل لحضرتك و طوبة كبيرة علي طريق السويس طارت من عربية نقل و رزعت الازاز الامامي بس هي خبطت الكبوت الاول قرب الازاز كده و بعدين نطت علي الازاز فهيا ماكسرتوش بي كحتته كحته جامدة حفرت فيه لون احمر (كانت طوبة بنا حمرا كبيرة)
و انا في التوكيل بركب ازاز الباب الي كسره الحرامي (الله يخرب بيته) سألت علي الازاز الامامي قالولي ب 4500 (في الحدود دي علي ما اتذكر) و هما عندهم الجهاز الي بيفك القديم و يركب الجديد و المهندس قلي ان ده زي الجهاز الي بيركب الازاز في المصنع بالضبط فا مش حيأثر علي العربية خالص وبالنسبة للمراية هي بتتفك من المشأبية بتاعتها و الازاز الجديد بيجي بالمشأبية بتاعته لازقة فيه من المصنع و المراية بتركب عليها
أنا الصراحة بفكر اغيره قبل التأمين ما يخلص في أخر نوفمبر بس الازاز مش مشروخ فامتردد علشان ده بتاع الفبريكة مع ان المهندس في التوكيل اكدلي انه هو هو الفبريكة و حيركب زي المصنع بالضبط
أرجو أكون افدت حضرتك
و لو تنصحوني اغيره و لا لا؟
و لكم جزيل الشكر
بالمناسبة ان عملت الكلام ده في توكيل أبو رواش و مش كل المراكز فيها سمكرة و تركيب ازاز

شكرا لحضرتك جدا، ومعلومات حضرتك صحيحه، انا روحت التوكيل امبارح، قلت اعرف الموضوع بالظبط عشان الاعضاء هنا كمان يستفيدوا: سعر الزجاج الامامي للكورولا ٢٠١٤ و ٢٠١٥ هو: ٤٠٥٥ جنيه بدون المرايا ولا التركيب، التركيب لوحده: حوالي ٣٠٠ او ٤٠٠ جنيه (حسب كلام الفني) فالمجموع: ٤٤٥٥ جنيه. بالنسبه للمرايا الداخليه بيفك القديمه ويركبها علي الزجاج الجديد. المشكله الان ان الزجاج غير متوافر في ولا فرع غير فرع قباء جسر السويس، ولا في التجمع ولا العباسيه ولا ابو رواش، والتركيب هناك بردوا. المشكله الاكبر ان العربيه لازم تبات عندهم يوم في فرع قباء. سألت علي فرع قباء فين بالضبط طبعا ماحدش كان عارف يرد غير لما سواق في التوكيل هو اللي وصفلي، وماعدهمش رقم تليفون لان الفرع لسه جديد حسب كلامهم. بعد كل ده قررت اسأل في جريش، لقيت الزجاج عنده ب ٥٠٠ جنيه فقط والفني طلعه وانا فليته حته حته، زي الاصلي تماما تماما وثلاث طبقات زي الاصلي بردوا وفي مكان محدد في الزجاج للصق المرايا الداخليه، الفرق الوحيد لوجو تويوتا اللي علي الشمال من اسفل. مشيت من عنده وانا في حيره، ادفع ٤٥٠٠ج في الزجاج الاصلي اللي اعتقد انه غالي بسبب الشحن من تركيا، ولا اجرب زجاج جريش؟ مع ملاحظه تعرض عربيتنا الدائم لزلط النقل الجميل.

لا طبعاً أدفع 500 جنية وبعد فترة لا قدر الله هيتكسر تاني
ساعاتها مندمش إني دفعت 500 جنية بدلاً ما يكون الندم على 4500 جنية

المشاركة الأصلية كتبت بواسطة osamafayez

شكرا لحضرتك جدا، ومعلومات حضرتك صحيحه، انا روحت التوكيل امبارح، قلت اعرف الموضوع بالظبط عشان الاعضاء هنا كمان يستفيدوا: سعر الزجاج الامامي للكورولا ٢٠١٤ و ٢٠١٥ هو: ٤٠٥٥ جنيه بدون المرايا ولا التركيب، التركيب لوحده: حوالي ٣٠٠ او ٤٠٠ جنيه (حسب كلام الفني) فالمجموع: ٤٤٥٥ جنيه. بالنسبه للمرايا الداخليه بيفك القديمه ويركبها علي الزجاج الجديد. المشكله الان ان الزجاج غير متوافر في ولا فرع غير فرع قباء جسر السويس، ولا في التجمع ولا العباسيه ولا ابو رواش، والتركيب هناك بردوا. المشكله الاكبر ان العربيه لازم تبات عندهم يوم في فرع قباء. سألت علي فرع قباء فين بالضبط طبعا ماحدش كان عارف يرد غير لما سواق في التوكيل هو اللي وصفلي، وماعدهمش رقم تليفون لان الفرع لسه جديد حسب كلامهم. بعد كل ده قررت اسأل في جريش، لقيت الزجاج عنده ب ٥٠٠ جنيه فقط والفني طلعه وانا فليته حته حته، زي الاصلي تماما تماما وثلاث طبقات زي الاصلي بردوا وفي مكان محدد في الزجاج للصق المرايا الداخليه، الفرق الوحيد لوجو تويوتا اللي علي الشمال من اسفل. مشيت من عنده وانا في حيره، ادفع ٤٥٠٠ج في الزجاج الاصلي اللي اعتقد انه غالي بسبب الشحن من تركيا، ولا اجرب زجاج جريش؟ مع ملاحظه تعرض عربيتنا الدائم لزلط النقل الجميل.

أنا رأي الشخصي انك لو مش مأمن و حتدفع من جيبك يبقي هات جريش و لو اتكسر مش حتخسر كتير و هات بعد كده الاصلي، هي المشكلة الوحيدة المراية لو بتاع جريش جاي من غير المشأبية بتاعتها، سوف تضطر انك تفكها من القديم و تركبها في الجديد او تجيب واحدة جديدة، بس اعتقد مش متوفرة لانها بتيجي جزء من الازاز الاصلي
بالنسبة لموضوع بيات العربية فده لازم علشان السيليكون ينشف و الازاز يثبت كويس.
بالنسبة لموضوع انه مش موجود غير في جسر السويس،ممكن ابو رواش او العباسية يجيبه من هناك و يركبهولك، فرع التجمع مافيهوش سمكرة ولا تركيب ازاز
و ياريت تقولنا عملت ايه علشان نستفيد من تجربة حضرتك