تقرير اول الف كيلو لسيراتو 2016
الحمد لله ربنا كرمني واستلمت سيراتو 2016 اول فئه وكيل من حوالي اسبوعين
ولسه عاملة صيانة الالف اول امبارح في مركز كيا اللي في روكسي.
اول حاجه بالنسبة للعربية :
الموتور : ممتاز والسحب جيد جدا مع اني كنت بحس ان صوت الموتور عالي شوية ولكن بعد تغيير الزيت قل عن الاول بس يفضل فيه صوت برده.
العفشة : ناشفه بعض الشئ والاحتكاك بالمطبات متكرر لو محمل العربية في الكنبة ورا.
الفرامل : جيدة جدا والحمد لله حتى الان مظهرش عندي الصوت اللي بيشتكي منه اغلب ملاك السيراتو.
ابعاد العربية : كبيرة شوية وطبعا ده مقارنة بإني كان معايا نيو اكسنت 2010 مانيوال قبلها :11:
التابلوه : جميل جدا الخانات المستخدمه فيه الى حد ما نضيفة
الصالون: واسع وقعدة الكراسي مريحة.
الكاسيت : صوته مش قد كده ومش عارف ده من الكاسيت ولا من السماعات.
حاجتين مضايقني في العربية:
اولا: ودي حاجه غريبة جدا جدا ان الصالون مافيهوش اللمبة اللي بتبقى قدام عن كرسي السائق واللي فيها جراب للنضارة ودي حاجه تغيظ جدا:angry06: لأن دي المفروض انها مش كماليات او اوبشنز عشان تنزل في فئة وفئة تانية لأ وبتسبب صعوبة ليا لو عايز ابص على حاجه بالليل جوه العربية لما بتضطر افتح اللمبة اللي ورا مش بتدي اضاءة كويسة لكل الصالون.
ثانيا : نزول الفئة دي من غير جهاز انذار او ريموت شئ غريب ومتعب لحد لما اركب انذار في التوكيل ان شاء الله وارتاح من الهم بتاع فتح وقفل العربية من الباب.
مجملا, العربية جيدة جدا ولكن نصيحتي للي عايز يجيب انه يجيب الفئة الاعلى عشان كم الاوبشنز اللي مش موجود في الفئة دي.