الموضوع: شراء نيسان صنى 2016

انا حبيت إنى أشارركم تجربتى منذ شراء السيارة وترخيصها وقيادتها بما فيها من سلبيات وإيجابيات
[overline]أولا : شراء السيارة .....[/overline]
كنت الأول بقارن بين نيسان صنى ورينو ميجان . وبصراحة رينو كانت عجبانى جدا ولكن كام عامل هما اللى جعلونى أفضل نيسان . أولا وسع السيارة من الداخل حيث تعتبر من أوسع السيارات وثانيا ثبات سعرها وإنخفاضة بالنسبة لمثيلاتها .
بعد ذلك جاء الدور على من أى معرض أشترى السيارة . فكلمت معظم المعارض الموجودة فى القاهرة وسألت عن سعر السيارة النيسان صنى الأتوماتيك الفئة الأولى فكان السعر موحد 110 ألف .
بعض الأصدقاء والأقارب نصحونى بسمير ريان . وأعطونى رقم مندوب هناك . حتى أن أحد الأصدقاء قال لى أنه توصل مع هذا المندوب حتى 109250 . ولكن نظرا لأن المصرية للسيارات وللأسف أقرب إلى سكنى من سمير ريان فذهبت إليهم وقابلنى مندوب يدعى محمود خليفة وعملى البحر طحينة وقالى إن شاء الله لما تيجى تتدفع حأعمل معاك واجب صح وكمان فى هدايا مع السيارة وكمان عندنا خدمة بنقدمها لعملائنا ألا وهى تخليص الورق وإعتماده بحيث تذهب للمرور على تركيب اللوحات فقط .
فى الحقيقة أنا صدقته ودفعت 1000 جنيه رسوم حجز لأن السيارة لم تكن موجودة وكانوا لسه حيجيبوا من المصنع .
المهم بعد يوم كلمنى وقالى بالحرف أحلم وأتمنى إيه اللون اللى تحبه فقلتله فضى فقالى خلاص ماشى . قفل وكلمنى بعديها بساعة وقالى للأسف إحنا ما جبناش فضى فيه البلاتينيوم فقلتله ماشى لأنى خايف سعر السيارة يزيد وسط مشكلة الدولار الموجودة فى البلد .
المهم ذهبت اليوم التالى لإستلام السيارة الساعة 7 مساءً وكانت لسه نازلة من الكساحة . المهم تكلمت معه عن الخصم فقالى السيارة زادت 2000 والإدارة عايزانى أضيف المبلغ ده عليك بس أنا رافض وورانى ملف إكسيل مظبطه هو بنفسه وقالى شوف سعر السيارة بقى كام وورانى إيميل مرسل إليه بزيادة فى سعر السيارة السيراتو . المهم لاقيت إن مافيش فايدة وإنه باعلى الترام . فقمت عشان أدفع فلقيت المبلغ 10 ألاف + 65 جنيه فسألت فقالولى دى مصاريف إعتماد الأوراق .
المهم دفعت عشان أخلص بعد ما إكتشفت إنهم كدابين وأخذت السيارة على أن أستلم أوراقى بعد 4 أيام عمل .
[overline]ثانيا : مرحلة الترخيص [/overline]
فى أحد الأيام وأثناء قيادتى للسيارة وقبل الترخيص أوقفنى المرور وسأل على أوراق السيارة ورخصتى فأعطيتهم له فقالى إن المفروض تكون مركب لوحات تجارية حتى تقوم بالترخيص فأخبرته بجهلى بهذا الأمر فأخبرنى بأنه سيتركنى هذه المرة على أن أذهب للشركة وأخبرهم بضرورة إعطائى أرقام تجارية حتى الترخيص . ولكنى فى الحقيقة لم أفعل لأنه كان باقى يوم واحد فقط على موعد إنتهاء الأوراق .
المهم ذهبت للشركة فى اليوم المحدد وإستلمت الأوراق وسألت عن الإجراء التالى فكانت هناك كوظفة تعمل فى إدارة التراخيص بالشركة المصرية للسيارات فسألتنى عايز شخص يروح معاك المرور ويخلصلك الإجراءات فوافقت .
فطلبت لى شخص يدعى حسام حسن يعمل مندوب للشركة فى مرور البساتين . فتواعدت معه على موعد للقاء فى المرور اليوم التالى لتخليص الورق .
فى الصباح ذهبت للمرور وقمت بنفسى بشراء طفاية الحريق (147.5 جنيه) - الشنطة والمثلث (75 جنيه) - أوراق الفحص من الخزينة لمدة 3 سنوات (45 جنيه) . ثم جاء المدعو حسام حسن وسلمته الأوراق فقام هو بكل الإجراءات حتى أنه قام بدفع الضريبة والتأمين من جيبه دون سِؤالى . فلما عرفت ذلك ذهبت للخزينة وسألت عن ضريبة سيارة1600 cc فقالى إنها 245 فى السنة (يعنى 735 فى الثلاث سنوات) وسألت عن التأمين الإجبارى فكان 310 فى الثلاث سنوات .
المهم فى الآخر جابلى الرخصة واللوحات ومعها بيان المصاريف التالى :
1 - ضريبة 860 جنيه ( سلمنى الوصل)
2 - التأمين 320 جنيه (سلمنى الوصل)
3 - إكرميات الفحص 30 جنيه
4 - إكراميات للموظفين 70 جنيه
5 - إستعلام أمنى 30 جنيه
طبعا كما يتضح من المبالغ إنه نصب على فى أكثر من 100 جنيه
المهم سألته عن أتعابه فرفض أن يحددها وقالى اللى تشوفه يا بيه . فأخرجت 100 جنيه فرفضها فأعطيته 30 جنيه أخرى حتى أنتهى من هذا الصداع .
المفاجأة أن فى المرور لا يقومون بتركيب اللوحات كما فى السابق بل عليك بالبحث عن بعض الأشخاص الذين يقفون بالخارج لتركيبها لك وبسعر 25 جنيه للأربع مسامير .

[overline]ثالثا : قيادة السيارة .....[/overline]

السيارة بشكل عام جيدة ومناسبة لسعرها . السيارة ناعمة جدا على الطريق .
تسارع السيارة فى البداية بطىء ولكن على الطرق السريعة جيد حتى أن عداد الـ rpm لا يتجاوز ال 3 عند سرعة 100 .
أماكن التخزين داخل السيارة ليست جيدة حيث لا يوجد إلا مكان واحد فقط . حتى أنها لا يوجد بها طفاية سجائر ( أنا لا أدخن)
التكييف جيد حيث تشعر بالبرودة بعد 3 أو 4 دقائق من تشغيله .

[overline]رابعا : النصائح النهائية .....[/overline]
1 - السيارة مناسبة بالنسبة لسعرها وتعتبر من أرخص السيارات فى مصر .
2 - لا تصدق مندوب .
3 - إذهب للمرور وقم أنت بالإجراءات بنفسك وبكده حتوفر حوالى 300 جنيه فى المصاريف
4 - لا تنسى عند ذهابك للمرور أن تأخذ معك 4 مسامير بورمة ومفك صليبه حتى تقوم بنفسك بتركيب اللوحات . وماتخافش المسامير بتدخل فى الصاج عادى عند الضغط عليها . فقد قام الشخص الذى ركبهم لى بتركيبهم بيديه وبالمفك فقط .
5 - الهدايا التى يقومون بتسليمها مع السيارة طقم دواسات قطيفة ستقوم برميه من أول أسبوع وشراء طقم دواسات بلاستيك . لأن القطيفة يتسخ سريعا .
وأيضا غطاء للسيارة ووتر بروف . برضه حترمية وتشترى غيرة لأنه زى الشنطة البلاستيك اللى بتشترى فيها الخضار يعنى حيتقطع منك من أول أسبوع .
الخلاصة ما تخليش موضوع الهدايا ده يغريك لأنهم موش حيدوك حاجة عدله .

وبهذا تكون إنتهت تجربتى مع شراء النيسان صنى . وشكرا لكم

المشاركة الأصلية كتبت بواسطة hani hegazi

انا كمان سمعت كده وسمعت ان فلتر التكييف انت اللي بتجيه حتي مع ان العربية زيرو بس مكانه موجود
انا عايز اجيب العربية دي لانها علي اد فلوسي وزيرو صراحة دي ميزة رهيبة بس خايف منها لاني 80% بسافر بالعربية

انا عربيتى ex وفعلا جبتلها الفيلتر على حسابى
اعتقد ان الفيلتر بينزل فالسوبر صالون

بالنسبه لحضرتك, السفر هتكون حلوه جدا فى استهلاك البنزين ومساحه الشنطه

يمكن هتلاقى عيب ان تنك البنزين صغير على السفريات الكبيره (41 لتر) يعنى مثلا القاهره الغردقه لازم تمون فالسكه