اخى العزيز ، حتى لو راكب بى ام دبليو ممكن فى يوم من الايام تلاقى اللى بيقولك ايه التابوت المتحرك اللى انت راكبه ده
وبعدين فيه ناس كتير جدا تقييمهم للحاجة بيكون قائم على شئ واحد هو ان شكلها من برة مش عاجبه وبناء على كدة يبقى كلها سيئات، مع ان ممكن شكلها ده يكون فى عين ناس تانية حلو جدا ، وممكن برضه يكون شكلها وحش فى عين الناس كلها بس عربية اداءها لا غبار عليه، يعنى انا فضلت الناس تكرهنى فى العربيةالشاهين وكل اللى يعرفوه عنها ان شكلها مش عاجبهم، يبقى اوتوماتيكيا كدة هى عربية كل ما فيها تعبان وزبالة، لكن انا فضلت حاببها والسبب الوحيد اللى خلانى بعتها هو الرباط الصليبى الله يسامحه اللى اجبرنى على قيادة الأوتوماتيك لفترة علشان يخف لأنه مكانش عايز يخف بسبب الدبرياج، وبقولها بكل اطمئنان ان برغم ميزة الاوتوماتيك فى سيارتى الحالية، وبرغم ان هى اعلى فى معاملات الأمان وبرغم انها فى نظر الناس اشيك ، وايضا واثبت على الأرض واسهل فى القيادة، لكن الشاهين كانت بلا جدال اكثر مرونة فى الطرق الوعرة وكثر قابلية للتعامل معها فى الطرق الضيقة، ومفتقد جدا صوت محركها ذو النغمة الناعمة الموسيقية مقارنة بصوت سيارتى الحالية اللى رغم انه منخفض لكن نغمته مدية على نغمة متور ديزل، يعنى من الآخر لا الشاهين كلها عيوب ولا اليابانى كله مزايا، برضه نفس الكلام ينطبق على ال128 اللى انا امتلكت تلاتة منها ، والحمد لله انا ركبت وسقت عدد لا يحصى من موديلات العربيات واقدر احكم كويس واقول ان فيما عدا مسألة زاوية دوران العربية ال128 الواسعة شوية بالنسبة لحجمها، العربية دى ممتازة الى اقصى الحدود بالمقارنة بفئتها الحجمية، وبعدين لما حد يعيب على عربية ان الانتاج القديم منها اللى شغال بقى له 30 سنة ابتدا يبوظ ويمشى بجنبه، متهيألى يكون الرد عليه هو: طب باقى الموديلات اللى كانت موجودة من 30 سنة فين هى اصلا ديلوقتى،
اوعى تخلى كلمة من حد تنزل قيمة ممتلكاتك فى نظرك، خلى قناعتك تكون جاية من جواك انت، عربيتك هى اختيارك وطالما انت مبسوط بيها يبقى اللى يقول يقول، وزى ما قلت لك، لو راكب بى ام دبليو هتلاقى برضه اللى يتريق عليها