هل يوجد مانع لوضع استيكرات على السيارة ام لا !!!

**Terrible_DaRsH** · 22-11-2008 10:57 PM

السلام عليكم جميعا ....
انا قرات قانون المرور والغرامات والعقوبات والكلام ده كله ...
ملاقتش فى العقوبات والغرامات منع لوضع الاستيكرات ...!!!
طب انا عندى صورة للعقوبات والغرامات ومش لاقى فيها مانع للاستيكرات ...

..

--

--
لو حد عنده الباند المخصص للاستيكرات يجيبه لى ..
علشان هتحصل مجزرة فى الكمين بتاع اول صلاح سالم ..

**دموع الثلج** · 22-11-2008 11:20 PM

ده نص القانووووووووووون كامل

قانون المرور

**Terrible_DaRsH** · 22-11-2008 11:57 PM

انا قراته مرة كمان ...
معلش يمكن مخدتش بالى من باند منع وضع استيكرات على السيارة ...
بس اللى لفت نظرى الباندات دى ..

2- استعمال الأنوار العالية المبهرة للبصر والمصابيح الكاشفة علي وجه مخالف للمقرر في شأن استعمالها
(ده الزينون) اوك 100 % ..

مادة 69- لا يجوز تركيب أجهزة تنبيه أو مصابيح بالمركبة بالمخالفة لأحكام هذا القانون أو القرارات المنفذة له، كما لا يجوز تركيب سرينة هوائية أو ما يماثلها من أجهزة وإلا جاز في جميع هذه الأحوال ضبطها والحكم بمصادرتها
دى سارينة البوليس وما شبه ذلك .. اوك 100%

ملاقتش منع وضع الاستيكرات برده ...

____________________
اصل الحكاية كلها .. ان من 3 ايام صاحبي كان مأجر OCTAVIA وخدتها منه وطلعت على صلاح سالم الصبح الساعه 10.30 ولاقيت الكمين اللى مبيتغيرش ده ...
لاقيت الامين بيقولى اركن على جمب ..
قلت اليوم بان من اوله ...
الحوار كان كالتالى ....
انا : فى ايه يا سيدى !!
هو :ملصقات يا باشا !!
انا :فين الملصقات دى !!
هو :اهه يا باشا !!
انا :بصيت وانا مندهش ومش لاقى اى ملصقات !!
هو :الكلمه اللى محطوطه ورا يا باشا والفاميه اللى قدام !!
انا :اولا دى كلمه صغيرة جداااا ومش باينه اصلاو مردتش اقوله ان العربيه متأجرة وكمان مفيش فاميه ولا حاجة !!
هو :لالالا دى تعتبر ملصقات والشماسه اللى على الزجاج دى تعتبر فاميه !!
انا :طب عايز ايه يعنى !!
هو :روح اتكلم مع الباشا فى العربيه !!
رحت للباشا اللى كان مسطول ونايم فى العربية !! وكان الحوار كالتالى ..
انا :صباح الخير ..
هو :اهلا اهلا ( وكانه كان منتظرنى من يومين ولا حاجه )..!!
انا :يا باشا الامين ده بيقول ان فى ملصقات وفاميه ومفيش حاجه من الكلام ده موجود!!
هو :يعنى هو هيكذب !!
انا :قوم عاين بنفسك !!
هو :قعد يضحك وقال كله يا حبيبي 50 جنيه بس !!
انا :مش عارف اقل ادبي ولا اعمل ايه ولا اتصل بحد يشيل له الكمين ده!!
مصلقات 30 جنيه والشمسيه دى ب 20 جنيه !!
انا :مش هدفع حاجة ورحت شايل الكلمه اللى محطوطه ورا ..
هو :انت كده هتعمل قلق وتخلينا ناخد منك الرخصة نهائي !!
قام واحد صاحبي دافع ال 50 جنيه الجباااااان منه لله ..ومشيت من غير ما يشوف الرخصه حتى !!!!!

فعايز اشوف الباند بتاع الاستيكرات ده موجود ولا لا !!
لو موجود هعتبرهم شويه قطاع طرق واقفين فى الشارع والحكومه بتحميهم
ولو مش موجود هعرف اتصرف معاهم ..

**دموع الثلج** · 23-11-2008 12:13 AM

هو كان نازل فى نص القانون قبل ما يتم تعديله ميه مره

لكن موجود ولا مش موجود

لازم تمشى على قانون ساعه الامين

وبعدين بيعملوا مخالفات على اى حاجه علقها فى مرايه الصالون حتى لو سبحه

هتيجى بئه على الشماسه والاستيكرز

فى مصر مفيش قانون
النظام هو القانون

**Samir Elshahawy** · 23-11-2008 01:09 AM

عزيزي the_terrible :

بلدنا المحروسة اللي بقت موكوسة مافيهاش قانون و لا يحزنون و السادة بتوع المرور ماهم الا صورة جديدة من قطاع الطرق و البلطجية اللي بيستغلوا جهل معظم الناس ببنود القانون - وحتي لو عارف القانون هاتدفع يعني هاتدفع لانها بلطجة

صدقني القانون ده معمول علشان جباية الاموال من أصحاب السيارات و اللي مش هايدفع يايتحبس يايتحبس

بجد مش عارف أقول لك أيه و أعمل ايه بجد بقت حاجة تخنق و تقرف و تحرق الدم

**Terrible_DaRsH** · 23-11-2008 01:45 AM

المشاركة الأصلية كتبت بواسطة دموع الثلج

فى مصر مفيش قانون
النظام هو القانون

الفساد = القانون ..

المشاركة الأصلية كتبت بواسطة SE_coralsea

عزيزي the_terrible :

بلدنا المحروسة اللي بقت موكوسة

قصدك بقت كوسة ..

**Mohamed_Ibiza** · 23-11-2008 04:01 AM

يبقى انت كيد اكيد في مصر

مش عارف ليه انتو بتنسو دايما الكلمة دي

لدرجة اني فكرت اعل استيكر مكتوب عليه يبقى انت اكيد في مصر

ووريني بقى حد ييجي يقولي شيله

**Terrible_DaRsH** · 23-11-2008 04:21 AM

المشاركة الأصلية كتبت بواسطة ghalasa

يبقى انت كيد اكيد في مصر
مش عارف ليه انتو بتنسو دايما الكلمة دي
لدرجة اني فكرت اعل استيكر مكتوب عليه يبقى انت اكيد في مصر
ووريني بقى حد ييجي يقولي شيله

والله ما نسيتها بس زهقت من كتر ما بقولها كل يوم ...
ولو عملت الاستيكر ده هيخدو منك مخالفة ركن صف تانى يا باشا !!
علشان يبقي انت اكيد فى مصر فعلا ..