الموضوع: محتار بين FIAT Punto و Proton Gen2 و Brilliance FRV

المشاركة الأصلية كتبت بواسطة dodi2

هوا كل مواقع اللى عليها أراء المستخدمين شكرت فى موتور الجين 2 بس , بس الباقى قالو انها فى خلال كام سنة بتبتدى تنهار ,بس البونتو مستخدمينها لسنوات طويلة( و فى الغالب شباب ) بتعيش , و زى الشباب لو تجيب جراند بونتو تبقى تمام وهى 1400 معقولة برده.

بتبتدي تنهار ؟؟؟؟؟ ليه هي عمارة

يا باشا ده كلام غلط في غلط اللي حضرتك سمعته
ياريت روابط للمواقع اللي الناس بتقول ان موتور العربية بينهار بعد كام سنة ( يعني ملهاش دعوة بعدد الكيولومترات ؟؟؟ مجرد تسأول )


العربية شغالة زي الفل و عاملة مع ناس فوق 100 الف كم و لسة شغالة و ما انهارتش

فاكرين كان نفس الكلام بيتقال على هيونداي و الكوري عموما اول ما طلعت !!!!!!!
و اهي لسة الأكسل شغالة زي الفل و ما انهارتش و

على العموم دي صورة للجين 2 و هي عاملة فوق 100 الف كم و العربية تقريبا موديل 2006 يعني بقلها 3 سنين شغالة و عاملة فوق 100 و منهارتش



و أنا سوقت عربية بقالها مع صاحبي 3 سنين دلوقتي و ساعة ما سوقتها كانت عامل تقريبا حاجة و ثمانين ألف كم و كانت زي الفل و الموتور كانت حالته ممتازة

يا باشا هات الجين 2 دي غربية زي الفل

المشاركة الأصلية كتبت بواسطة dodi2

بص يا عمنا اه هيا شكلها حلو اوى وكل حاجة وموتورها قوى بس بجد انا كنت بفكر فيها و نزلنا و سالنا و فعلا بتبتدى تتخلع (حلوة بتتخلع دى قول هوا باب)من بعضعا بعد كام سنة و دا اللى انا سمعته من ناس كتير و طبعا كل واحد حر دا راى .

يا دودي با شا معلش .... ده مش رأي
الرأي يكون أن العربية شكلها حلو أو وحش
ما أستريحتلهاش لما سقتها
ده يبقى رأي

إنما تقول كلام على أنه حقائق .... ما يبقاش رأي
لأنك هنا بتقول كلام مش حقيقي و بتلبسه جلباب الحقيقة و ده مش في صالح الناس اللي عايزة تشتري العربية
لما تقول العربية مش عاجباك و حاسس أنها تعبانة و البلد اللي صنعتها مش عاجباك ...يبقى كلام زي الفل

إنما تقول دي بتنهار و بتخلع من بعضها .... يبقى أنت كدا خرجت من دائرة أبداء الرأي لدائرة قول حقائق

لذلك .... هات صور كام عربية مخلعة من بعضها ..... و بايظة أو روابط لمواضيع لناس بتقول أن العربية مخلعة من بعضها علشان كلنا نستفيد
يمكن صحيح بتخلع من بعضها و أحنا مش داريانين ..... ياريت الكلام يكون بإثبات علشان الكل يستفيد يا باشا

و كل سنة و أنت طيب

المشاركة الأصلية كتبت بواسطة dodi2

شوف بأه يا عم توت أنا مش بقول كده من دماغى و هيا مش جلباب و لا تى شيرت و لا حاجة و بدون تريقة, وبعدين يا عم ادخل على اى موقع بياخد أراء بتاعت الملزيين نفسهم عن العربية و هم اللى بيقولو سيبك منا كلنا أدخل على اى موقع اوروبى و اعمل مقارنة بين الاتنين بعدين أنا مغلطش فى القوة بس الخامات مش حلوة زى الايطالى على العموم اللى حيشترى يقارن وكل واحد يشوف محتاج ايه و يجيب و بعدين انت شايف ان الجين احسن من الجراند بونتو ؟؟

أولا السلام عليكم
ثانيا حاشى لله إن أتريق على حد ......أنا آسف إذا كنت فهمت كدا
و لكن أنا جاد جدا في كلامي و لم أسخر من أحد نهائي و أتناقش معاك مناقشة موضوعية بحتة
ثالثا أنا مقلتش أن الجين 2 أحسن من الجراند بونتو أو الجراند بونتو أحسن من الجين 2 و مقارنتهاش بالأيطالي خالص

كل الكلام على تعليقك أنت أن العربية بتنهار و بتخلع من بعضها بعد كام سنة

فحضرتك رديت و قلت مواقع أجنبية

طيب المواقع دي في العموم بتتكلم عن تقييم العربية مش أنها بتنهار و بتخلع من بعضها
معلش يعني ده حتى الصيني مش بينهار و يخلع من بعضه

هاتلي رابط واحد ..... فيه ناس بتقول العربية مخلعة من بعضها ؟؟؟ أو منهارة ؟؟؟

ده كل اللي أنا عايزه من حضرتك .... أنت قلت أن العربية بتخلع من بعضها و بتنهار و بنيت كلامك على أساس المواقع الأجنبية اللي فيها الكلام ده

و أنا ببساطة بدافع عن حاجة معينة و بنحاول نفند الرأي علشان أحنا في منتدى سيارات و ناس كتير بتدخل علشان تأخد معلومة من أصحاب السيارات و ذوي الخبرة

و لما أنا أقول مثلا على سيارة أنها بتنهار و بتخلع من بعضها ... يبقى لازم الكلام يكون بدليل لأن الكلام ده كبير قوي
لأن معنى أن السيارة تنهار ........ أنها مصنوعة من خامات رديئة جدا جدا جدا
مش رديئة بس !!!

عموما أنا عارف ناس معاها العربية و عاملة معاها أكتر من 100 ألف و أنا أتكلمت عن الموضوع ده في مداخلة سابقة ردا على كلام حضرتك

نهاية حديثي أحب أقول شوية ملاحظات
أنا مش زعلان من الكلام اللي حضرتك بتقوله خالص و أدينا بنتعلم من بعض و بنتناقش يمكن نوصل لمعومة جديدة
أنا مش بتريق على حد و حاشى لله و أعوذ بالله من همسات الشيطان الرجيم و أنا أحترم كل الأعضاء مهما كان رأيهم
النقاش لازم يكون مبني على تجربة أو تجربة الغير بإثباتات حتى تعم الفائدة على الجميع و يكون الكل على بينة من أمرهم
و تحياتي لحضرتك و كل الأعضاء
و كل عام و الجميع بخير

بالنسبة للجين 2 و الجراند بونتو
أنا بعشق العربيتين دول بالذات
بس ثمن الجراند بونتو ...... قصاد الجين 2 بامكانيتها و قوة موتورها يخليني أفضل الجين 2 على الجراند بونتو مع أني من عشاق الفيات و من مالكين البونتو

الموضوع مش مين أحسن و مين أوحش
ليها زوايا كتير في المقارنة و انهاء الصفقة كعامل أساسي في قرار الشراء
يعني عربية أمام عربية و امكانيات و سعر = صفقة

أرجوا أن حضرتك تكون فهمت قصدي