الموضوع: زيت سوسن

مقاله ممتعه جدا حضرتك ايا كان سببها
ورغم ان امسويل ماركه غير شهيره
لكن واضح ان حاليا الناس في مصر بيحبوا التغيير
للتغيير.وبالمناسبه الناس اللي بتصدر مش بتبعت اي
زباله لمصر لكن اللي بيطلب من مصر بيحدد المواصفه.
وعرفت ناس في مصر كانت بتسافر وتشتري تالف خطوط الانتاج
وعلي الجانب الاخر المستهلك المصري لسه عايش في
ازمان ماضيه وبيتشدد في بلد الصنع تكون اوروبيه
او امريكيه رغم ان الاساس حاليا المركه وريفيوهاتها

مره تانيه مقاله ساخره جميله
تحياتي

المشاركة الأصلية كتبت بواسطة ahmedselaraby

زيت سوسن

بسم الله

شفطة نسكافية بلاك الساعة واحدة بعد نص الليل ,, خير اللهم اجعله خير ,, قررت أكتب المقاله ديه:

شفطة تانيه ,, بااااااااااااس كده ,, كده بقه المكنه القديمة المتهالكه اللى اسمها الدماغ ديه ابتدت تقول اهو ........

النهارده كان يوم عادى خالص بالنسبالى ,, صحيت متأخر كعادتى فى الشتا دايما ,, متأخر على شغلى ,, طبعا ملحقتش أعمل أى حاجه الصبح غير انى اخد دوايا بتاع الضغط ,, البس هدومى ,, و انزل مش شايف قدامى

و أنا نازل فل اسانسير ,, فل حاله المزريه ديه ,, ببقى نفسى فى حاجه واحده ,, الا و هى انى مضطرش اتعامل مع أى بنى ادم على الاقل خلال الربع ساعه من بعد ما بسيب الاسانسير !! ليه بقى ,, شوفوا,, هو الاسانسير مش بيبقى فيه مرايا ,, مش كده ,, فيه مرايا اه فيه مرايا ,, اهو المرايا ديه بقى لما بحاول ابص فيها ,, عنايا مش جايبانى اساسا ,, دماغى و عنايا مشبرين !!

المهم ,, مطولش عليكم ,, كان يوم عادى ,, تركيا ضربت طياره سوخوى روسى ,, عمليه ارهابيه فى العريش ,, زمايلى سابو الشغل و كلام كتير فى بدايه حرب عالميه تالته و داعش و الناتو و بشار و مش عارف مين و فى وسط هذه الاجواء الملبده بالطيارات الروسى ,, جالى تليفون من صحبى و حبيبى البشمهندس محمد غانم ,, مين بقى البشمهندس غانم و ايه حكايه التليفون ده اللى جالى و ايه علاقة ده بعنوان الموضوع "زيت سوسن" ,, ده كله حنعرفه بس لازم الاول اعمل فلاش باك سنتين ورا يعنى سنه 2013

وراكو حاجه ,, انا النسكافيه شعشع معايا و ايه ,, خلصت نصه دلوقتى فل كام كلمه اللى فوق دول ,, يالا المهم

فى البدايه احب اقول ان انا مدين بالفضل لكتير من أعضاء نايل موتورز فى حاجات كتير اوى و اذكر منها النهارده بالتحديد حتة انه ازاى تتعامل مع عربيتك ,, ازاى تحب عربيتك ,, ازاى تخلى بالك منها و تحافظ عليها و تصينها و تصونها ,, ازاى تختارلها احسن حاجه تشغلها بيها ,, و الصراحه انا حبيت ده و تعمقت فى ده ,, مع انى مكنتش كده خالص ,, انا كنت مهمل لعربيتى جدا ,, و كنت بعاملها معامله حقيرة و كنت حارمها من حاجات كتير ,, فهى كمان احتقرتنى و عاملتنى وحش قوى و خزلتنى كتير لحد ما وقعت عل منتدى ده و احلف بالله انى اتغيرت و هى كمان اتغيرت معايا ,, علفكره انا بتكلم عن العربيه ,, محدش دماغوا تسرح بعيد هه ,, ده نايل موتورز مش فتكات ههههههههههه.

و طبعا من أهم الحاجات للعربيه هو موضوع الزيوت ده ,, طيب ,, فى عجاله كده ,, طبعا كلنا بندور على أحسن زيوت ,, و تلاقى مواضيع كتير بعناوين كتير زى ,, ده أحسن و لا ده؟ ,, حد جرب ده؟ ,, و تجربتى مع اللى اسمه ايه ,, و قصتى المأساويه مع مش عاارف زيت ايه ,, و انهون؟ ,, و انهين؟ و هلم جرا ,, و الصراحه فيه ناس هنا فل منتدى اساتذه بإقتدار فى موضوع الزيوت ده و تلاقيه متعمق و دارس و فيه ناس على ادها بس يجى منها و مسيرها تتودك ,,

المهم ان اخر بحثى من زمان على اشد نوع زيت ,, ده اللى هو من الاخر و بعد مقارنات معمليه على اسس علميه و شارتات (رسومات بيانيه) مغرقا النت ,, طبعا البعض منكم عارفينه و خلص لنفس النتيجة الا و هو زيت amsoil الامريكى
طبعا هو اسمه مش عاطفى بس اهو نعمل ايه ,, طلع المدعو امسويل ده هو اشد زيت ينافسه فى ذلك قله قليله زى رويال بيربيل ده اللى انا فاكره دلوقتى بس امسويل اشد

طيب فين امسويل ده يا عم ؟؟ و الكلام ده من سنتين يعنى فى 2013,,,,,,,,,,,, مفيش
مفيش ............
مفيش .............
انا مش (مش عايز اديك) ,, انا مش عارف اديك !! مفيش مفيش !!

امسويل مكنش موجود فى بداية هوجة استيراد الزيوت من بره (الليكوى مولى و الفالفولين و الزادو و البيزول و الميجوين و الولف و الولفيرين (ايه ده ,, هو الولفيرين ده مش اللى فى فيلم x-men ,, ايه اللى جابو هنا !!!! مش ده الواد اللى زرعولو اسياخ كفته لامؤاخذه فى ايده ,, ايه اللى جابك هنا ؟؟) مش عارف ليه افتكرت مشاهد زينهم بيه السلحدار فى مسرحية الواد سيد الشغال و عادل امام بيضربه و يقولو "ايه اللى جابك هنا" ههههههههه ,, ما علينا

ساعتها تفتقت فى ذهنى فكره ,, شركة شحن ,, شراء عنوان بريدى فى امريكا تبع شركة الشحن برده ,, فيزا انترنت ,, طبعا و الباقى عارفينه ,, و لو كنت عملت كده كنت ساعتها حكون اول واحد يستخدم زيت امسويل فى مصر و طبعا كنت حصيت الدنيا هنا على نايل موتورز و كنت حغيظ كل اللى نفسهم في الزيت ده لعربياتهم ,, بس ده محصلش ,, ممكن كسل ,, ممكن إلتزامات تانيه ليها أولويه ,, مش فارقه ,,

المهم و انا فل شغل من سنتين و بتعامل مع زمايلى عادى جدا فل شغل ,, لقيت واحد فيهم على مكتبه نوت بوك كده صغيره عليها شعار زيت وولف كدعايه و انا كنت ساعتها لسه مغير للزيت ده ,, فدردشنا مع بعض طلع عنده محل تغيير و بيع زيوت قرب سوق السيارات اللى فى مدينة نصر (مش حقول العنوان بالضبط عشان قوانين المنتدى بخصوص الدعاية و كده) و وعدته ساعتها ان التغييره اللى جايه حتكون عنده و كده و بعدين فى وسط الكلام كده جبت سيرة زيت امسويل و قلتله يا ريت الزيت ده يكون موجود فى مصر ,, قال لى اشمعنى الزيت ده ,, قلتله بص ,, الزيت ده مش محتاج دعايه و لا تصييت ,, مجرد بس أى حد مجتهد كده و شطور يكتب اسمه بالعنجليزى على جوجل و يا سلام بقه لو جوجل صور ,, حيتأكد من ان الزيت ده ملوش حل ,, فعلا حاجه نمره واحد ,, لا تقولى ولفيرين و لا مجنيتو و لا اسبوسيد ,, و يشاق القدر ان زميلى ده ( و هو بالمناسبه هو المهندس محمد غانم اللى جبت سيرته فل اول) ,, انه يكتشف ان فيه مستورد مصرى ناوى يجيب الزيت ده مصر و بيجمع شبكة موزعين له ,, و راح قابله و قعد معاه و اتفقوا ,, بس الصراحه ,, الزيت اتأخر و عدت الشهور و غانم راح شغل تانى و انقطعت الاتصالات بنا لفتره.

لحد ما كلمنى المكالمه التليفونيه اللى برده جبت سيرتها فى اول الموضوع و بشرنى ان الزيت وصل و هو عنده دلوقتى فل محل و بعتلى صوره و انواعه و اسعاره اللى كانت مفاجأه بجد لأنها تنافسيه جدا ,, تكاد تكون هى هى اسعار بقية الزيوت ,, بجد و الله فرحت ,, لأنه منتج كويس جه مصر ,, و طبعا اللى شغالين فى الاستيراد عارفين يعنى ايه منتج كويس للأسف و بقول للأسف لأنه معظم اللى بيتصدرلنا للأسف زبالة بره ,, سواء قطع غيار أو اى حاجه تانيه ,, فالحمد لله على كده ,, منتج امريكى ,, وارد امريكا ,, يعنى مش متعبى فى (جبل على) و لا الكلام ده ,, متبرشم (على حد قوله لسه ماشوفتش) و ان شاء الله حغير لأمسويل

طيب ايه بقى عنوان الموضوع (زيت سوسن) ده ,, هو الحقيقه اقصد بيه انه الزيت ده بنزوله مصر و ان شاء الله بعد تجربه الناس له ,, انا اتوقع انه حيخلى بقيت الزيوت فى نظر الجمهور "زيت سوسن".

الرابط

https://www.amsoil.com/shop/by-product/motor-oil/



https://www.youtube.com/watch?v=AVjPyp3hIaw

ماتعرفش مكان اجيب منه زيت حار يكون صح الصح مش مضروب

mido_ghanem