ايهما افضل ادفعلى ام شوب اند شيب ؟

**Ahmed_selmy** · 27-11-2015 06:45 PM

السلام عليكم
انا بقالى فترة بستخدم خدمة الشراء من الخارج عن طريق ادفعلى, وكل شويه اسمع انها غاليه عن الباقين و فى نفس الوقت سامع عن شوب اند شيب بس مستخدمتهاش.
فهل حد جرب الطرقتين و لقى واحده احسن من التانيه وارخص؟
المشكله انى كل اما اقارن الاقى ان ادفعلى احسن
يعنى مثلا الشحن للنص كيلو فى ادفعلى 7.5 دولار ولكن زى ما قريت فى شوب اند شيب ب 12 دولار لاول نص كيلو وبعد كدا ب 9 دولار لكل نص كيلو اضافى
ادفعلى ليها 5% مصاريف فى حين شوب اند شيب ملهاش
فانا اما قارينت الشحن بالنسبه لمصاريف الخدمه وجدت انى ادفع 5% افضل من شعر الشحن بتاع شوب اند شيب
فهل حد عنده رأى مختلف او مقدم خدمه غير الاتنين دول بيقدم اسعار احسن؟

**unl0veable** · 27-11-2015 07:46 PM

جرب borderlinx

**dede_dodo88** · 27-11-2015 07:47 PM

أنا مجربتش shop n ship قبل كده, بس بتعامل مع أدفعلي من أيام ما كانوا مجرد صفحة فيسبوك و الصراحة مبسوط من التعامل معاهم و مش حاسس أنهم غاليين ولا حاجة..
و الميزة عندهم أنهم على طول بيعملوا عروض تخفيضات سواء على الجمارك أو الشحن.

**egyption2012** · 27-11-2015 09:06 PM

ادفعلي ممتازين وشغلهم احترافي بمعنى الكلمة بالرغم من وجود بعض الشكاوى على صفحتهم
وفيه موقع ديل جامد كويس جدا وارخص قليلا من ادفعلي لكن الشحنة بتغيب على ما توصل
لكنهم احترافيين جدا وبيقدروا العميل بشكل مميز ويعتبروا خيار جيد للشحنات اللي اسعارها بسيطة

شوب اند شيب
أسوأ خدمة ممكن تشوفها في حياتك وحتحس انها شركة بير سلم بجد
وعشان اكون صادق كانت لي تجربة عادية معهم والشحنة وصلت في موعدها
لكن لي تجربة اخرى سيئة للغاية
لن تستطيع التواصل معهم بشكل جاد إطلاقا مع انهم موجودين على الشات والتليفون
لكن ابسط كلمة يقولوها حنقدملك طلب والفريق المختص حيتواصل معاك
ومفيش حد بيتواصل ولو بعتولك ايميل بيكون بالانجليزي ومليان الغاز وكلمات مطاطة وصياغة informal
ولو رديت عليهم فلا تنتظر منهم أي رد على رسالتك

فيه شحنة حاليا بقالها 3 أسابيع مش عارف اذا كانت حتوصل ولا لا
وخلال الفترة اللي فاتت توصلني منهم رسالة بتقول انهم عايزين 200 جنيه
عشان يخلصوا موضوع الجمارك "الاجراءات فقط" بعيدا عن قيمة الجمارك
ولو مش عايز تدفع ممكن تاخد الورق وتروح تخلص الجمارك بنفسك
حاجة مستفزة جدا
والشكاوى منهم كتيييييييييييييييير على النت

اسلوبهم في التليفون سوقي لو طولت معاهم ويعيدوا الكلام بشكل غريب لو متقبلتهوش منهم
التيكيت ممكن ياخد 3 ايام عشان يبدأوا يردوا عليه
ممكن تجيلك رسالة تقولك ان الشحنة في طريقها اليك ولما تنتظر لايام وتحاول تتواصل معاهم يقولك لا الشحنة في الجمارك والرسالة "ممكن" تكون اتبعتت بالغلط

لو الجمارك غيرت اي حاجة او عملت قيود على استيراد حاجة معينة
مش حتلاقي اي حاجة بتقول كده على موقعهم والقايمة اللي عندهم بتاعت المحظورات مش مكتملة
يعني لازم تدرس وتقرأ قانون الجمارك قبل ما تفكر تستخدم خدمتهم

على عكس ادفعلي او ديل جامد اللي بيعملوا تشيك على الشحنة هل حينفع تعدي من الجمارك ولا لا

بالمناسبة كنت استوردت قبل فترة عدد زجاجات بلاستيك من سائل غسيل
وادفعلي قالي انها ممكن تقعد في الجمارك شهر او شهرين عشان تتفحص فعايز تشتريهم ولا لا ؟
قولتلهم اوكي وبعد 7 أيام لقيت الشحنة وصلت لحد باب البيت

**Ahmed_selmy** · 27-11-2015 10:25 PM

واضح جدا من الردود انى افضل مع ادفعلى احسن, انا بصراحه مشوفتش منهم حاجه وحشه بس كل اما اخش فى اى حته يقولوا اسعارهم عاليه اسعارهم عاليه قولت اما اسأل يمكن يكون شوب اند شيب احسن
انا شايف الميزة الوحيده فى شوب اند شيب هى لو حتحتاج تجيب حاجات من اماكن ادفعلى مبتتعاملش معاها زى الصين مثلا.
غير كدا انا مش شايف فيها ميزه