تعديل ال 127

**أحمد عادل fs** · 28-11-2015 12:15 PM

تعديل ال 127
للاسف العربيه دى قليل من الناس ال بتقدرها وتهتم بيها
رغم انها من العربيات ال سهل على اى واحد لسا مبتدأ يتعلم فيها الميكانيكا ويتعلم التعديل من غير متكلفه كتير
المهم أنا جبت 127 وحالتها على قدها عشان مكنش معايا فلوس وقتها وبردك عشان لما اعدل فيها اخد راحتى ومتبقاش تكلفتها النهائيه عاليه عشان لو حبيت ابيعها
أول حاجه غيرتلها الكوتش بمقاس 175 بيبقى شكله احلى على العربيه وبيفرق فالسرعه حوالى 7% وطبعا تيوبلس . ناوى بقى ارش التابلوه بعد ممعجنه بمعجون فيبر واصنفره وحركب بأذن الله فلتر رياضى ال بيركب على الكربراتير وليه مكان فاضى ورا الفنوس ال اليمين وحيكون بعيد عن حرارة الماتور وحركب بوجيهات 3 شمعه واغير كبلات البوجيها بكبلات لانسر
ركبت فيها لمبات ليد بيضا فالفوانيس مغيره شكلها من قدام خالص وعاوزاغير لون الصالون بنور قوى ابيض او ازرق بيفرق فالشكل كتير
ايه رأيكوا بقى ايه التعديلات ال ممكن اعملها تانى ؟
ال عمل اى تعديلات فعربيته يحطها او عنده اى اقترحات يقولها عشان انفذها
عاوز تشجيع أنا بحب العربيه دى وناوى اعمل فيها شغل كتير باذن الله

**topac122000** · 16-12-2015 06:41 AM

السلام عليكم

أولا مبروك العربيه و عقبال ما تجيب اللى احسن منها في المستقبل ان شاء الله ... قول امين

انا عاوزك بس تحكيلنا اشتريتها ازاى و موديل كم ... و بكم ... عشان نستفاد من التجربه

العربيه دى ما شاء الله كويسه و كانت مع واحد صاحبى ... الله اكبر

معلش انا مش ها اعرف افيدك في موضوع التعديلات ده .... تقبل اسفى

يا ريت يا جماعه اللى عنده خبره في 127 يدلو بدلوه و بارك الله فيكم

انا متابع ...

**topac122000** · 25-12-2015 08:50 AM

السلام عليكم

احمد باشا الف مبروك و ربنا يسلم طريقك
ممكن تحكيلنا تجربتك اشتريت ازاى و كده ... بالتفصيل عشان اخوك داخل عالخطوه دى و ميح ميح فا مش عاوز حد يشتغلنى كمان عاوز أكون فاهم
يعنى وصلت للعربيه ازاى و بصيت على ايه و انت بتشوفها و كمان اشتريت ازاى و دفعت ازاى و تعرف موديلها ازاى و بالتفصيل بقى انت تظبطنا ههههههه

و جزاكم الله خيرا

**م أحمد** · 25-12-2015 02:00 PM

وفر فلوس البوجيهات و الكابلات و الفلتر الرياضى

شمعة واحدة زى 3

الكابلات مش هتزود الفولت

الفلتر الرياضى مش هيفرق كتير مع ال127

**aliyehia** · 22-01-2016 05:19 PM

سمكره محترمه و جنوط سبور و فرش لايق و ايدك فى الموتور اول باول تبقي ميه ميه

**Abo_Mazen** · 22-01-2016 07:55 PM

موضوع البوجيهات التلاته شمعه ده فعلا هو مش هيستفاد بيه ..لان العربيه معموله إنهت تمشي ببوجيهات شمعه واحده ..حكاية كابلات البوجيهات بتاعة اللانسر اللي عايز تجيبها فالحل ده تعمله لو إنت مش لاقي الأصلي بتاع الميه سبعه وعشرين ..إنما لو الكابلات الأصلي بتاعة الميه سبعه وعشرين موجوده يبقى خلاص كابلات اللانسر فعلا مش هتزود الفولت ..اللي هيفرق معاك فعلا الفلتر الرياضي بس أهم حاجه أبلاتين وكوندنسر يكونوا نمره واحد وشكمان مفيهوش غلطه عشان تستفيد فعلا من الفلتر الرياضي