الموضوع: بعد سنتين من التعامل مع رمضان الميكانيكي مانصحش حد بيه

السلام عليكم
انا هحكي تجربتي مع رمضان الميكانيكي الي في الحرفيين بكل امانة الي ليه والي عليه عشان الي هيتعامل معاه يبقي فاهم انا اشتريت الاسكورت الزيتك من سنتين وحالة شاذة بمعني الكلمة ودا الي شدني للعربية ولا كان في بالي فورد اصلا ولا كنت اسمع عن الاسكورت دي المهم دخلت عالمنتدي وسالت علي ميكانيكي فورد الناس رشحت رمضان بما انه جنبه كل قطع الغيار في الحرفيين وانا من المنصورة فمش هلحق الف كتير العربية كانت محتاجة تفير زيت وفلاتر مش اكتر يشاء القدر وانا عالدائري سير الكتينة يتقطع ركنت وقطرت العربية لحد الحرفين لرمضان شافني داخل بالعربية مقطورة ابتدا الشغل بقي من غير مايبص علي اي حاجة قالي بص الفورد قطع كتينة يعني وش سلندر علطول قلتله صلي عالنبي وش ايه وقفا ايه انا لسة بقول ياهادي قالي بص عشان اقنعك راح جايب سير من جوة ومركبه ومدور وقاس كبس الماتور قالي تلات بساتم تمام والرابع ضعيف اهو كدا الصبابات اتعوجت والوش باظ وانا والله مافاهم اي حاجة قلت قدر الله ماشاء فعل شوف عاوز تعمل ايه قالي حلين ياما تغير الصبابات ومش عارف نغير اي تاني كدا ونودي الوش لخراط وراح متصل بخراط قاله الشغل يتكلف كام راح قاله 400 من غير مايشوف اي حاجة او يفتح المكنة غير تمن الحاجات الي هتتغير غير الجوان غير المصنعية قالي هنخش في 1000 جنيه وقالي هتيجي بعد يومين تستلم وانا هسافر وارجعله وقالي الحل تاني نحط وش استيراد كامل عندي ب1200 بس عشان انت جاي من سفر هعمل معاك واجب هحسبه ب 800 والشغل يخلص النهاردة قلت امين اشتغل طلع المكنة برا خالص واقسم بالله العربية شكلها صعب عليا المسامير اول مرة تتحل وكل حاجة بتقفيل بلدها وهو شغال بقي دخلني في طرمبة مية وطقم دبرياش وسلك دبرياش ومش عارف غطي ايه وطبة ايه وبلية شداد وشوية حاجات كلها جابها من المزبلة الي عنده جوا في الاخر قفل ال2000 جنيه وحتي ماكانش معايا المبلغ دا كلمت صاحبي من القاهرة جابلي باقي الفلوس وداخل البيت ساعة 3 الفجر ..... بس للامانة العربية كانت زي الفل وشهادة لله شغله كصنايعي تمام وبيراجع ورا العيال الي شغالة تحت ايده وفاهم كل مسمار في الفورد لزمته ايه
الموقف التاني وانا في المنصورة العربية سخنت مني عشان حساس الحرارة فصل المهم جابت جوان وش قلت مش رايح لرمضان تاني سافرت جبت الجوان والزيت وعملتها عند ميكانيكي عندنا وخد مصنعية 100 والخراط الي مسح الوش 50 بس الصراحة العربية ماكانتش مظبوطة انا شكيت في تقسيمة الكاتينة وقبلها كنت اتصلت برمضان وقالي لو القصة قصة جوان بس هاخد 300 والخراط هياخد 100 طبعا العربية مش مظبوطة ومش عاجباني كنت قريب من الحرفيين عديت علي رمضان فعلا طلعت التقسيمة مش مظبوطة ظبطها وغير بوجيهات العربية ظبطت كام ياعم 200 جنيه!!!!!!!!!!!!! يمين شمال مافيش وهو شغال بقوله التكييف تاعبني وضعيف اي الحل بص قالي الكباس مش بتاعها وضعيف عليها وعندي ليك كباس زيرو الاصلي بتاعها هيفرق خالص عامل 400 جنيه وهديك الوصلات بتاعته معاه قلتله امين خدته وركبته عندنا في المنصورة ونظفت دورة التكيف وغيرت فاتر الفريون وشحن ومصنعية ادي كمان 400 يوم بالظبط والكومبرسور قفش واتحرق اوووووووووووووووووووووووو وووووووووووووف يعني ارجع اسافر لرمضان تاني ولا اعمل ايه قلت بناقص تكييف اصلا ماله الكاسيت
الموقف التالت والناهية كان عندي قاعدة من قواعد الموتور بايظة وبتعمل هزة في العربية ولمبة الفرامل منورة في التابلوه طبعا القاعدة دي مستحيل الاقيها عندنا نزلت الحرفيين وانا معدي من عند رمضان جي وشي في وشه قلت ياواد انزل سلم وحاجة خلتني اتشك في لساني واقوله الموتور بيتهز بص كدا قالي القاعدة ضاربة اهي وعندي الفورد الاصلي اهي ومش هتلاقيها جديد كام ياعم قالي 200!!!!!!!! نعم قلتله لا انا مش هجيب استيراد تاني قالي خلاص براحتك هات جديد واركبهالك رحت جبتها تركي ب 150 وقالي التيل عندك خلصان هات تيل رحت جبت التيل الامامي والقاعدة وركبهم والله التيل طالع في نصه بس هقول ايه كام يارمضان 150جنيه!!!!!!!!!!! قلتله لا فصصهملي قالي كشق عالتيل 20 وفك العجل 20 والله قالي فك العجل وتركيب التيل الامامي الي اي صبي يغيره 40 وتغير القاعدة 80 وعشانك يبقي كله 150 قلتله اتفضل وانا الغلطان مش انت ولو العربيية تحت البيت هسيبها تصدي ولا تجيلك
الخلاصة الي هيتعامل مع رمضان يعرف ازاي يتعامل معاه ويبقي عارف هو هيعمل ايه بالظبط واياك تسمع كلامه واياااااااااااااااااااااا اااااااااااااك تشتري منه اي قطعة غيار عنده مزبلة جوا وبيحسسك انه بيبيعلك مخدرات مش قطعة غيار ومرة تاني للامانة هو كصنعة نظيف وبيشخص العطل تمام والعربية بتطلع من تحت ايده مظبوطة بس سفااااااااااااااااااااااا ااح واسهل حاجة عنده غير وعندي الحاجة الاصلي اهيه تخيلو اخر مرة بقوله الدبرياش تقيل قالي بص هنغير طقم الدواسات كله وطقم الدبرياش والسلك عشان نشتغل علي نظافة واهو كله موجود عندي قلتله لاااااااااااااااااااااا دا احلي حاجة في الدنيا الدبرياش التقيل دا حتي رياضة للرجل مش بقولكم سفااااااااااااااااااااااا اااااااح المهم مشيت من عنده وحلفت مية يمين لوحكمت اسيبها تصدي ماروح لرمضان دا تاني
وبالمناسبة الفورد مش اختراع ولا تطيير صواريخ اي ميكانيكي ذكي شوية هيتعامل معاها بس تكون واقف وعينك معاه وقبل ماتعمل اي حاجة ادخل واسال في المنتدي عشان تبقي عارف بيعك ولا شغال تمام
وربنا يكفيكم شر فتحة الكبوت

المشاركة الأصلية كتبت بواسطة mohamede002e

لا مش بسيبها طبعا مااهو انا ملتعلمتش ببلاش
مين في المنصورة بتاع فورد وفين

فى شارع حسين بيك فيه ميكانيكيه بيشتغلوا
وممكن تسال بتوع قطع الغيار الاوربى اللى فى الحسينيه على صنايعية