السلام عليكم كنت عايز اعرف ايه الاجرائات لو عايز افتح مصنع صغير انا هجيب المعدات من الصين بس مش عارف ايه الاجرائات الى المفروض تتعمل ياريت تفدونى يا جماعه
عرض للطباعة
السلام عليكم كنت عايز اعرف ايه الاجرائات لو عايز افتح مصنع صغير انا هجيب المعدات من الصين بس مش عارف ايه الاجرائات الى المفروض تتعمل ياريت تفدونى يا جماعه
الافضل بعد شراء الماكينات
هتروح للصندوق الاجتماعى او صندوق التنميه التابع لك
وهم سيقومون بتوجيهك.الى عمل بطاقه ضريبيه..سجل تجارى..سجل صناعى..تامينات اجتماعيه..موافقه الحى والتظيم..موافقه الدفاع المدنى..موافقه البيئه حسب صناعتك..ممكن هيئه التنميه الصناعيه وغيره وغيره
.........
الافضل تبدأ الاول وتعمل بطاقه ضريبيه فقط وبعدين تشوف الدنيا ماشيه ازاى ولو كله تمام امشى فى اجراءات الترخيص...لان احبالهم طويله وشويه موظفين ومهندسين عايزين الحرق ..بيروقراطيه عقيمه جدا وموافقات كثيره جدا وبتاخد وقت
شكرا جدا يا استاذ طارق
بس ايه فايدة البطاقه الضريبيه وهعملبها ايه
معلش اخوك ميح خالص
عشان يتفتح ملف ضريبي للمنشاه تحاسب عليه
انا بقالي سنه و8شهور بجري في ورق وترخيص مصنع شنط واكياس
كرهت البلد بسبب الموضوع دا
ولسه مخلصتش العداد التجاري والرخصه
8 شهور انت بطل
انا بقالى 4 سنين .............بس الحمد لله من كم يوم جائت لى آخر لجنه وتعطفوا وتكرموا ومنوا على بعد حرق اعصاب.. واشتراطات غريبه ... وبعد ماقلت لهم فيه امل اشوف الترخيص وانا على قيد الحياه...وهم خارجين قالولى مبروك ابقى تعالى ادفع الرسوم النهائيه للترخيص ومهندس الامن الصناعى قال لى لو جيت لك بعد الترخيص ولقيت اى حاجه مش مظبوطه مش هعديها...بجد دعيت له من كل قلبى ان ربنا يديله على قد نيته ويكرمه زى ماكرم ال.........................
بصراحه مصادفتش ان حد قريبى يبقى موظف فى الجهات الوسخه ديه وﻻ حتى ضابط شرطه وﻻ حد من قرايب قرايبى وﻻ من اصدقائى. بحس ان الناس ديه عاملين زى دراكوﻻ مش بنشوفهم الا فى وظايفهم
ربنا معاك يابطل
نصيحه شوفلك محامى صايع ليه سكه ويخلص الاجراءات ديه وغالبا بياخد تكلفة مابين 10 الى 15 الف لحد مايسلمك السجل الصناعى والترخيص وكل شيىء
لانك لو لفيت بنفسك وعملت كل حاجه يبقا ربنا معاك
بالتوفيق لك
انا كان معايا محامى صايع وتخصص تراخيص وتقريبا انا خلصت نصف اجراءات الترخيص لوحدى وكان بسرعه
ولحد اشتراط موافقه البيئه استعنت بالمحامى للتكمله لان لها جلسه ومستشارين وكلام ملوش آخر ومن بعد ها مع المحامى الدنيا اتعطلت كتير
الافضل شويه تعب هتخلص بسرعه
او حد تبع الحى بيخلص تراخيص ويكون له سمعته فى الموضوع ده هيخلصها فى اربع شهور بالكتير
بينى وبينك السنه الى فاتت طلع عينى فى ترخيص مصنع مياه معدنيه والتراخيص اصلا واقفه فى مصر
ومحامى شبه خلص نص الاجراءات ولظروف سفرى اضطريت اوقف شويه بس فعلا موضوع مشقه رهيبه داخل مصر بس على المقابل التراخيص الصناعيه فى مصر بتبقا ليها وزنه بس اهم حاجه المشروع يشتغل ويمشى صح
يا جماعه انتم اكيد بترخصوا فى اماكن غير صناعيه
المناطق الصناعيه اكيد بتسهل جدا الاجراءات لانها بتبقى خاضعه للمواصفات
وفى مناطق صناعيه متقسمه مساحات صغيره للمشاريع الصناعيه الصغيره
تقريبا مدينه المحله الكبرى عندنا كلها منطقه صناعيه
المشكله كلها الروتين وكثره الموافقات وكل موافقه محتاجه لجنه وكل لجنه محتاجه وقت علشان تتشكل
وبعدها ينزلوا يعاينوا وبعدين يضعوا لك بعض الاشتراطات ولازم تتنفز كل دا بياخد وقت ومجهود من طالب الترخيص ..يعنى مثال بسيط موافقه البيئه على المشروع لازم تقدم للبيئه وبعد شهرين البيئه ترفض الطلب..وبعدين انت تتظلم..ويحددوا لك جلسه وتكون فى القاهره فى التجمع وبتاخد وقت اكثر من 6 شهور وبعدين تاخد الموافقه..ومن دا كتير
ازاى بس دا كفايه عندنا شركه مصر دى اكبر شركه فى قطاع النسيج على مستوى الشرق الاوسط
غير مفيش شارع مفيهوش مصانع من تطريز الى نسيج الى ملابس
علشان كده تعتبر المحله كلها منطقه صناعيه
لكن فعلا ممكن فى العاشر من رمضان هتلاقى المكان مجهز بكهرباء محركات .. فخلاص مش محتاج الترخيص
او هتعمل رخصتك براحتك
ربنا يبارك لك
لا المصنع مفتوح..لكن الشغل هو اللى بعافيه من نصف شهر 11.............لكن بتشتغل عادى جدا لان من الطبيعى وقت المعاينات لازم يشوف المكن شغال...وكمان فيه حاجه اسمها قياس شده ضوضاء بيحتاجوا المصنع يكون شغال....المشكله الترخيص بياخد وقت وجهد جامد وبيعملوا اشتراطات غريبه وجديده يعنى النهارده اجبرونى على تعاقد مع الحى والزامى بدفع مبلغ 150 جنيه شهريا مع التشديد على المضاعفه فى حاله عدم الدفع قال ايه نضافه ..قلت لهم انا بدفع تقريبا 20 جنيه على ايصال الكهرباء نضافه قالوا لى دى حاجه تانيه...نظام غبى جدا والخنقه كمان هروح ادفعهم فى الحى مش هييجى لى محصل (اتاوه)ده غير رسوم السجل التجارى والصناعى كل سنه ورسوم الغرفه ورسوم اتحاد الصناعات ورسوم الرخصه نفسها والتامينات والضرايب كتييييييييييييييييييييير كده....بجد وصلت لحاله لاتتخيلها بسبب الرخصه اللعينه..مع ان والله مالها اى لازمه اغلب المصانع شغاله بدون ترخيص ومحدش بيعبرهم.. لكن احتياجى للكهرباء المحركات هو السبب
ربنا يكون في العون. بدل ما يساعدو الناس تشتغل لا بيسدوها في وشهم. حسبنا الله و نعم الوكيل.