الموضوع: تجربتى مع تظبيط عفشة تيدا 2008

فى البداية أحب أشكر كل أعضاء منتدى نايل موتورز الكرام اللى كان ليهم الفضل فى اختيارى للتيدا وأغلب المعلومات اللى عندى بخصوص العربيات بشكل عام من مشاكل وأعطال وحلول ونصح وتوجيه، وأرجو أن يكون موضوعي ده فيه افادة لناس زى ما موضوعات كتير فادتنى.

- العربية (نيسان تيدا هاتشباك 2008 / عداد 145000 كم)

- المشكلة: دبدبة فى الطرق الغير ممهدة وعلى فواصل الكبارى بحس بيها خاصة فى السيارة من الخلف، وحدف مع الفرامل

- رحت التوكيل (أوتو ايجيبت أبو رواش) لعمل كشف على العفشة بتكلفة 160 جنيه: تشخيصهم كان أن العربية عايزة 2 كاوتش تراب للمساعدين الأمامى وتغيير المساعدين بعد الكشف عليهم، بطاحات المساعدين وبلى بطاحات، صالة عفشة (مش عارف يعنى ايه)، 2 كاوتش كبالن داخلى، و2 مقص أمامى. (تكلفة اجمالية حوالى 10 الاف جنيه بحسب كلام المهندس)

- تشخيص اثنين عفشجية بأثق فيهم (بطبيعتى بأحب اخد كذا رأى): جلب المقصات الأمامية ومسمارين (أتياش) الميزان تالفة ويفضل تغيير المقصات بالكامل بسبب عدم جودة الجلب الموجودة بالأسواق والاحتياج الى تغييرها مرة تانية بعد كذا شهر. بالاضافة الى ان المساعدين الخلفية (خفيفة) وتحتاج الى تغيير. باقى الجاجات اللى قال عليها التوكيل سليمة وكنت بأشوفها بنفسى مع العفشجية والعربية مرفوعة. (*ملحوظة: التوكيل ماقالش حاجة عن المساعدين الخلفية الخفيفة ومسمارين الميزان)

- بعد متابعة الموضوعات هنا فى المنتدى استقريت على ان أفضل مكانين لشراء قطع غيار للتيدا هما محمد جابر والعالمية فى شارع دمشق بمصر الجديدة. الأسعار هناك كانت كالآتى:
. 2 مقص أمامى أصلى (1500 جنيه للاتنين فى العالمية ومش فاكر بالظبط كان بكام فى محمد جابر بس كان أغلى)
. 2 مقص أمامى يابانى (700 جنيه للاتنين عند العالمية ومحمد جابر)
. 2 مقص أمامى تايلاندى (400 جنيه للاتنين)
. 2 مسمار (تيش) ميزان أصلى (350 جنيه للاتنين عند المحلين)
. 2 مساعد خلفى KYB يابانى (380 جنيه عند العالمية)

- أنا جبت 2 مقص أمامى يابانى ب700 جنيه من محمد جابر عشان كان خلص من عند العالمية (بس هو نفسه اللى عند العالمية بالظبط)، ومسمارين الميزان ب350 جنيه من محمد جابر برضه. المساعدين جبتهم من عند بشاي فى التوفيقية (وكيل KYB فى مصر) ب344 جنيه (سعر جملة). مصنعية تركيبهم 150 جنيه عند العفشجى.

- النتيجة: احساس كبير بالاختلاف فى نعومية العفشة واختفاء الدبدبة بشكل كبير مع احساس بثبات أفضل واختفاء الحدفة مع الفرامل (كان بسبب تلف جلب المقصات حسب كلام العفشجى).

*عندى بس استفسار بسيط: فيه تزيقة بسيطة جاية من ناحية الشمال(البطاحة أو ما تحتها ده احساسى) لما بلف الدركسيون والعفشجى قالى أرش WD 40 على الجلب عشان ماينفعش تشحيمها زى عربيات تانية، وطبعاً أنا رفضت أعمل كدا لعلمى بتأثير WD 40 على أى كاوتش بعد ماينشف.
يا ترى هل يمكن تشحيم البطاحة فى التيدا أو ممكن يكون عمود الدركسيون مثلاً هو اللى محتاج التشحيم؟

شكراً

الف مبروك يا معالي الباشا

احساس العفشه الجديده حاجه كدا تفتح النفس
ربنا يديمها نعمه عليك يارب

المهم انك ما فتحتش نفسنا وقولت مين العفشجي وفين :d