الموضوع: تجربتي مع أوبر Uber

بسم الله الرحمن الرحيم

السلام عليكم ورحمة الله وبركاته

في البداية قبل ما أحكي تجربتي مع أوبر انا هوضح ايه هي خدمة أوبر للي مايعرفهاش
أوبر شركة أمريكية أعتمدت علي خدمات GPS لتحديد المواقع واستفادت من ان الموبايلات الحالية بتقدم الخدمة دي فعملت برنامج للموبايل سواء اندرويد او ايفون
البرنامج لازم يكون متصل بالأنترنت ولازم تكون مشغل الـGPS علشان يقدر يحدد موقعك
أوبر شركة مواصلات بعربيات ملاكي خاصة وليست سيارات أجرة
العربيات بيسوقها أصحابها او سائقين مدفوعي الأجر من صاحبها
البرنامج في منه نسختين
الأولي للمستخدم (الراكب)
الثانية لمقدم الخدمة (السائق)
كلا الطرفين لازم يكونوا متصلين بالأنترنت ومشغلين الـGPS

الراكب بيفتح البرنامج والـGPS بيحدد موقعه (للأسف الشديد ليس بدقة)
الراكب بيعمل طلب Request UBER

السائق بيتلقي الطلب وبيعمل Accept
طبعاً الـGPS بتوضحله مكانك وانت كمان بيظهرلك مكانه (للأسف ليس بدقة)

كدة أحنا فهمنا ايه هو أوبر بأختصار شديد

تجربتي الشخصية لأوبر UBER

قبل ما اتعامل مع أوبر كنت طبعاً بركب التاكسي زي اي حد ما بيعمل
الجديد ان السواقين بقوا دائماً طافيين العداد وبيطلبوا اسعار خيالية في المشوار - ناهيك عن رفضه او امتناعه انه يوصلك - غير رفضه لدخول بعض الشوارع - بالأضافة للتدخين او المزيكا اللي بيسمعها - واخيراً شكله

خدت القرار ونزلت البرنامج وشغلته واستخدمته
تجربة اكثر من رائعة
أولاً سيارات جديدة (موديلات 2015 - 2016)
ثانياً سائق محترم جداً جداً جداً
ثالثاً أجرة متواضعة بالمقارنة بالتاكسي
رابعاً بيروح اي حتة تقولوا عليها - حتي لو مكان غير اللي انت حددته اثناء الطلب وكمان انت اللي بتختار خط السير سواء مثلا دائري او من البلد او يمشي من هنا او من هناك
خامساً ممكن يستناك تنزل تشتري حاجة وترجعله تاني
سادساً بيجيلك لحد عندك وانت قاعد باشا في بيتك وبيكلمك علي حسابه يعرف مكانك بالظبط او يقولك انا وصلت
سابعاً تقدر تحاسب بالفيزا او كاش او تقسم الأجرة مع زميلك لو هو كمان مشترك في أوبر
ثامناً ودي ميزة جامدة اوي انك لو رشحت اوبر لحد من زمايلك واستخدمه - ليك علي كل حد استخدمه رحلة مجانية بحد اقصي 70 جنيه


ازاي اوبر بيحاسبك؟؟؟

اولاً الرحلة بتبدأ من اول لما تحط رجلك في العربية وليس من اول الطلب
يعني احياناً كتيرة كنت بطلب العربية وبتجيلي تقريباً من المكان اللي انا اساساً رايحه (في المشاوير الصغيرة اللي جمب البيت) ومع ذلك بيتم الحساب بمجرد لما بركب ومن حقي كراكب ان السواق ينتظرني 5 دقايق وبعد كدة يبدأ الرحلة حتي لو انا لسة مركبتش

أجرة الرحلة بتتحسب بأكتر من معامل
1- مسافة الرحلة (بالميل)
2- زمن الرحلة (بالدقائق)
3- حالة المرور وساعات الزروة المحددة مسبقاً
4- أجرة بداية الرحلة المحددة مسبقاً
5- الحد الأدني للأجرة المحددة مسبقاً

اولاً فتح او بداية الرحلة ب3 جنيه
كل كيلومتر ب1 جنيه و30 قرش (130 قرش)
كل دقيقة اثناء الرحلة ب20 قرش
الحد الأدني للأجرة 10 جنيه حتي لو ركبت 100 متر وزمن الرحلة دقيقتين
أوقات الزروة بالأضافة لحالة المرور بالأضافة لمدي توافر العربيات بيحدد قيمة الأجرة سواء كانت بالحسابات السابقة او انه يضرب الأجرة في 1.X يعني ممكن يضرب الأجرة في 1.3 او 1.4 او 1.5 او اعلي نسبة 2.0 يعني تبقي الأجرة مضاعفة

طبعاً الـGPS زي ما قولنا في البداية هو الفيصل بينك وبين السواق في الحسابات
يعني الـGPS هو اللي بيحدد المسافة بناء علي خط سيرك كذلك زمن الرحلة (توقيت البدء وتوقيت الوصول او انهاء الرحلة) بالأضافة لحالة المرور وكل المعاملات اللي ذكرتها من شوية.


شروط السلامة والأمان

أولا مش اي عربية بتتقبل في أوبر
يعني مثلا لازم تكون عربية حديثة ماعداش علي موديلها 5 سنين وشكلها كالزيرو بالأضافة انها لازم يكون فيها ABS - Air Bags وباقي مواصفات الأمان العادية زي احزمة الأمان وخلافه

ثانياً بمجرد طلب أوبر وموافقة السائق علي الطلب بيظهر أسمه وصورته ونوع عربيته ورقمها

ثالثاً سجل رحلاتك بيكون فيه مساعدة تقدر من خلالها ترجع للشركة في حالة اي شكوي زي مثلاً مشكلة مع السائق او مع العربية او فقدت امتعتك او الأجرة غالية او اي شكوي اخري من وجهة نظرك

رابعاً لو انت طلبت أوبر للبيت عندك انت بتكون شايف العربية علي الخريطة ومتابع خط سيرها

خامساً السائقين بيخضعوا لتدريب للتعامل مع الركاب بالأضافة للفحوصات الطبية

سادساً كل سائق بيكون ليه تقييم انت بتعمله في نهاية كل رحلة وبالتالي لو سائق مش كويس كأخلاق او كسواقة بيتم استبعاده بناء علي تقييمات الركاب وشكاويهم منه وبالتالي انت بتضمن ان السائق كويس بناء علي تجربة الغير


ملاحظات

- تقدر تسجل في البرنامج مكانين (Home - Work) ودي بتفيدك لو بتروح مكانين بشكل متكرر وبالتالي بتساعدك كتير في سرعة الطلب

- الأحسن انك قبل الطلب تحدد مكانك بدقة لأن زي ما قولت في الأول عيب البرنامج انه مش بيحدد مكانك بدقة وبالتالي السواق يقدر يوصلك بسهولة لو استخدم الـGPS

- بنفس المنطق الأحسن انك تحدد الـDestination او المكان اللي انت رايحه بدقة قبل الطلب علشان تساعد السائق انه لو استخدم الـGPS يوصل بسهولة

- وانت بتطلب لو لقيت ان الحساب هيكون بنسبة كبيرة زي مثلا ان المشوار هتكون اجرته 1.8 او 2.0 استني دقيقتين وارجع اطلب تاني هتلاقي النسبة قلت شوية


التجربة بصراحة كانت تستحق الكتابة لأني معجب جداً بالفكرة وبالموضوع

تحياتي للجميع