تجربتي مع مركز بيجو ابو رواش بعد الاداره الجديده
السلام عليكم اخواني اعضاء المنتدى الكرام انا معايا بيجو 508 كان حصل معايا مشكله مع توكيل بيجو فرع غمره و اشتكيت من سوء المعامله و عدم التقدير و المواعيد باستثناء م شاهر و م هشام كانو في غايه الاحترام و اتحلت الحمد لله على خير و اعتذر ليا المهندس محمد مدير الفرع و كذلك المهندس حسين الورداني الاثنين افاضل و محترمين جدا و انا سامحتهم و عذرتهم
لينك الموضوع http://www.nilemotors.net/Nile/47387...15-4800-a.html
بعدها دخلت صيانه العشر الاف وظهر شويه حاجات في العربيه صوت في الابواب و تزييق في كرسي السواق و تفويت خرطوم مياه المساحات محبتش اروح غمره تاني لاني عصبي و ما بتحملش الامبالاه و عدم التقدير توكلت على الله ورحت ابو رواش مشوار سفر من مدينتي
شهاده لله انا عمري ما شفت كده حتى بره مصر تعامل في منتهى الرقي والذوق العالي من الكل و اهتمام شديد بكل الملاحظات الي قلتها ليهم و المدير الجديد للمركز م وليد الشربيني كان متابع كل شيء و طلع بنفسه معايا اكتر من مره نجرب العربيه . استلمو العربيه او ل ما رحت مع اني كنت متاخر كشفو على السياره كشف كامل و غيروا المسعدين الامامي من نفسهم في الضمان مع اني ما كنتش اعرف ان فيها مشكله . لدرجه دخلوني الورشه جوه و خلوني اتكلم مع الصنيعيه و اوصلهم كل الي انا عيزه وبعدها بيومين لقيت المهندس وليد بنفسه بيتصل يطمن على الشغل بتاعه و اما اشتكيت من حاجه صغيره قلي اراجعوه تاني و رحت لقيته مهتم جدا لدرجه انه كان واقف بنفسه مع المهندسين و الصنيعيه و هو الي طلع معايا جربها . بعدها جيت ادور العربيه مادارتش كلمتو بعتلي مهندس صيانه لحد مدينتي غيرلي البطريه في الضمان . انا من النوع المحسوك الصراحه تعبته جدا في تفاصيل صغيره كتر خيره صبر عليا جامد و مظهرش منه اي استياء و كان بيقول العميل ديما على حق لدرجه ان اني اكسفت منه الروح دي لقتها في كل العاملين هناك من مهندس الاستقبال لحد فني التسليم . على غير العاده لقيت رضا تام من كل الموجودين لانهم وجدوا نفس المعامله من الكل و على راسهم مدير المركز
اكيد لو اداره المركز الجديده استمرت بالسياسه دي بيجو ها تكتسح
انا حبيت اكون منصف و احكي لحضرتكو الايجابيات الي شفتها زي ما حكيت السلبيات و تفاعلتم معايا
وحبيت انصح ملاك بيجو الكرام يروحو ابو رواش مع بعد المسافه و يختبروا كلامي