الموضوع: الأجهزة الكهربائية

انا خاطب و ناوى اجيب الاجهزة الكهربائية من كارفور اليومين دول فى عرض راس السنه عشان كدة عايز مقترحاتكم

مبدئيا هتقولولى شوف الاسعار برة قبل كارفور هقولكم والله الشغل مخلينى مش عارف حتى انزل اجيب برشام للانفلونزا الى عندى

1- التليفزيون
استقريت ان شاء الله على سامسونج 48 الى نازل ب4099
او ال جى ال49 الى نازل ب3999
الاتنين فول اتش دى و مخرج يو اس بى و اتنين اتش دى ام اى
و انا حاليا ماليش استخدام فى الاسمارت يبقى بلاها صح ؟

2- التلاجه
موجود فى العرض شارب 450 لتر ب4655
بس فيه سؤال يضحك شوية جمبها زانوسى مكتوب عليها نوفروست لكن الشارب مش مكتوب عليها نوفروست هل بتعمل تلج ؟ و الاختيار التانى فى التلاجات ال جى بس مش موجوده فالعروض و لو فيه ماركه تانيه فى نفس السعر قولولى

3- الغساله
فيه وايت بوينت دورنا عليها لقينا مشاكل كتيرة اوى ليها زى الحله و هكذا و الايديال زانوسى عندنا من زمان بس بيقولوا الجديده الى نازله فى العرض زى الزفت ففكرنا فى ال جى الناس كلها بتشكر فيها على النت محدش شافها فى كارفور و سعرها كام و لو فيه ماركه تانيه قولولى

4- المكنسه
فيه دايو 1600 وات ب319
و باناسونيك 1700 وات ب999
هل الفرق يستحق و ايه الاختلافات و لو فيه ماركة تانيه قولولى عليها

5- المكوة
فيه تيفال فرنسى ب199
و شوفت قبل كده فيليبس سودا فى احمر ب500 بس على النت
اجيب انهى و هل الفرق يستاهل ولا عشان الشكل بس ؟

6- السخان
فريش ال60 لتر ب499
هو احسن ولا تورنيدو الكهربا برضه لان تورنيدو اغلى الضعفهل الفرق يستاهل ؟ علما بأن فريش عندنا فى شقه نفس المنظر و عمرنا ما اشتكينا منه لمده خمس سنين و مش هجيب غاز نهائى

7- البوتاجاز
اى كوك و يونيفرسال الناس بتشتكى منهم على النت جدا و كريازى و زانوسى الناس بتشكر فيهم انتوا ايه رأيكم من حكم التجارب يعنى شايفين ايه حلو و وحش

8- الشفاط
ده هجيبه من برة كارفور و هجيبه الى فوق البوتاجاز ده عايز اقتراح بنوع مش بيسخن المطبخ و يكون له فلاتر رخيصه و متوفرة لانى اعرف انها بتتغير كل 3 شهور و لو جيبت الشفاط ده اجيب واحد برضه مروحه فى الحيطه يساعد على تهوية المطبخ ؟
مع العلم ان الميزانيه فى حدود الف جنيه

9- مبرد المايا
فيه انواع كتيرة جدا و نفس الانواع ناس مرة تشكر و ناس تشتم و يقولوا صوته عالى و حاجات من دى ايه افضل ماركه جربتوها لان فيه اكمى و ميديا تك و ميانتا و فريش و هكذا و الميزانيه الف جنيه

لو فيه اى اقتراحات او تعديلات على الماركات او اماكن بتبيع ارخص اوى من كارفور او اجهزة تانيه نسيتها قولولى عليها