الموضوع: يه اللي المفروض نعلمه لاولادنا سن 8 سنوات

بما أنى خاطب و بفكر فى الأطفال من دلوقتى يبقى هقولك على الى ناوى أعمله
او الى كان ناقص فيا و ناوى اعوضه فيه
طبعا كلامى ممكن واحد يقراة أننا هعقد الواد و أخليه مكلكع
طبعا هقوله لأ
الأسلوب و الطريقة لو كانوا صح
أستحاله يتعقد

بما أنى مسلم ناوى أخليه يحفظ قرأن فى مكان معتدل مش متشدد
فيه كتب دينيه فيها أحاديث مفسره و بسيطه جدا ممكن يستوعبها فى سنه
أو هحاول أجيب الكتاب ده و الحاجة الى الاقيها تناسبه هقولهاله بحيث انها تستمر معاه
هفكرة دايما أن فيه حاجة أسمها داين تدان
و هحاول أجيبله كتب باللغة العاميه بس مفيده بس محدش يقولى كتاب زى 28 حرف بتاع أحمد حلمى عشان ميتعقدش لأنه بيحكى عن كوارث البلد شوية

بالنسبه للكمبيوتر أكيد هيستخدم الكمبيوتر من السن دة أو أقل
هخلى فيه مراقبه عليه بحجة أن الكمبيوتر بتاعنا كلنا لأنه طبعا هيطمح أنه يكون عنده اكونت فيس بوك أو تويتر أو الله أعلم وقتها هيكون فيه أيه تانى , و طبعا زى مانتم عارفين لو طفل أتربى على الحاجات دى بسوء أستخدام يبقى عليه العوض و منه العوض , يعنى مش هحرمه لكن هفهمه أن الحاجات دى مش لعب الحاجات دى تخليه يفهم الدنيا

بالنسبه للتليفزيون همسح كل القنوات بتاعة الأغانى و قنوات الأفلام المشبوهه و هخلى فيه قنوات للأفلام أة بس قنوات محترمة بحيث أنه ميتصدمش بالواقع لما يكبر شوية , و أنا عن نفسى بتفرج دايما على ناشيونال جيوجرافيك أبو ظبى بس ده مش معناه أنه هيتفرج عليها هو كمان معايا , على الأقل هيشوفنى بتابعها و لما عقله يستوعب أو يكبر شوية أكيد هيحاول يشوفها من نفسه

من خمس سنين كدة كنت ممكن أخليه يتفرج على ماتشات كورة , لكن فى الفتره الحاليه و حتى و الماتشات بدون جماهير مستحيل أخليه يتفرج عليها , كفاية سلوك و أسلوب اللاعبين مع بعض لما تلاقيهم بيضربوا بعض بالشلاليط و يقعوا زى الهبل و دول سنهم من 20 سنه لحد 35 سنه , ما بالك بطفل عنده 8 سنين !

بالنسبه للطمع فده موجود فى 90% من الأطفال و مش ذنبهم دة ساعات بيبقى من ترفيه الأهل الزايد ليهم , هحاول محرمهوش من أى حاجة و لكن كل حاجة هجيبهاله هعرفة أن دى من الشغل و عشان ربنا راضى عنى وفرلى الشغل ده , و أن دى مش حاجة دايمه على طول , بحيث أنه لو طلب حاجة فوق مقدرتى مثلا او قالى أنا عايز موتوسيكل أو أيفون يبقى عندى رد أعرف اقولهوله لأنهم مش بتفرق معاهم الماديات و عشان يتعود عليها لازم يبقى فيه نظام مكافأت فى الدراسة , يعنى والدى الله يرحمه لما كنت فى نفس السن دة أو أقل كان بيجيب معاه فلوس فكه كدة شلمات و برايز و أول ما يرجع من الشغل ببقى عارف أنه هيسمعلى الدروس فكنت بحفظ جدا , جاوبت صح بيدينى شلم أو بريزة مجاوبتش صح بيسحب منى شلم أو بريزة , الأسلوب ده علمنى الربع جنيه بيجيب أيه و الريال بيجيب أيه و الجنيه بيجيب أيه , قالى كلمة عمرى ما هنساها فى حياتى أنى مهنتى دلوقتى أننا طالب يبقى عشان أشتغل لازم أذاكر و المكافأت دى مرتبى فكنت بحاول أزود من مرتبى بالمذاكرة , يعنى لو كنت حافظ الدروس كلها ممكن اليوم دة يكون معايا 2 جنيه و مش عايز أقولكم بقى الأتنين جنيه دول ممكن يجيبوا أيه ولا أيه ههههههههههههه

بالنسبه للرياضة هحاول أشوف جسمه و بنيانه و ردود أفعاله و هوايته متجهه لأيه يعنى مينفعش أبنى يكون عامل زى خله السنان و أخليه يروح يلعب ملاكمه , أو يبقى تخين و أخليه يروح سباحة , و ده بالنسبه لو ربنا كارمنى بفلوس كويسه , لأن لو وديته مركز شباب يبقى عليه العوض و منه العوض و قلتها هتكون أفضل و لو يوم أنا فاضى فيه هروح أتفرج عليه كمان لأن دى بتفرق جدا فى معنوياتهم

فيه أفكار كتيرة جدا لو فكرت فيها أو الأعضاء فكرت فيها الأجيال الى جايه دى ممكن نحميها من البلطجة الى أنتشرت حتى فى الحضانه

1- حفظه القرآن وخده يصلي معاك
2- علمه السنة والتفسير والسيرة
3- ربيه على الثواب والعقاب
4- اشتركله ف نادي نضيف وعلمه رياضه فيه (السباحة-كرة القدم-التايكوندو-الكونغ فو) أفضلهم السباحة للجسم والصحة
5- لازم تفهمه بداية من السن ده وبالتدريج الثقافة الجنسية ويكون الشرح بعلم مش كلام عامي
6- مهم تفهمه الفرق بين الصح والغلط علشان لما تمنع عنه الغلط يكون هو مقتنع وميحاولش يعمله من وراك
7- مهم جدا تسيبله مساحة كبيرة من الحرية مع التوعية والنصيحة
8- شاركه آراؤه وأفكاره الإجتماعية والثقافية والسياسية واستشيره ف أمور شغلك وحياتك وخلي رأيه مهم واعمل بيه قدامه على الأقل
9- اقعد معاه وقت أطول ولو بيحب هواية معينة نميها جواه وحاول تملى وقت فراغه واخرجوا مع بعض
10- النصيحة الأهم ف اللي فات ده كله عامل أمه على أفضل ما يكون وأي مشاكل تتم بينكم مينفعش بحال من الأحوال يعرفها

ربنا يباركلك فيه ويجعله نافع للأمه إن شاء الله