Cla بتفكرنى بنفس فشل ال 190 e .........عربيات تحس انها ملهاش اى تلاتين لازمه ٠٠٠٠هل تتفقون معى ?
عرض للطباعة
Cla بتفكرنى بنفس فشل ال 190 e .........عربيات تحس انها ملهاش اى تلاتين لازمه ٠٠٠٠هل تتفقون معى ?
إل e190 مفشلتش هي علي حسب منا فاكر هما صرفوا عليها كتير أوي عشان كان أول مرة ينزلوا في الشريحة دي قصاد بي إم الفئة التالتة ...
وعموما العربية من أحلي ما يمكن وإلسي كلاس كانت إمتداد ليها وعربية ليها شعبيه وفعلا بتنافس الفئة التالتة ...
أما بالنسبه لل-CLA فئنا رأيي إنها فعلا عربية ملهاش أي تلاتين لازمة واللي مستغربله أنها منتشره وبايعه كويس فبالتالي مش شايف مؤشرات فشل بس هي عربية تعبانة بكل المقاييس
في رايي السبب الوحيد اللي مخلي ال cla تبيع هو تمنها. اعتقد مرسيدس منزلاها عشان تعرف تنافس بي ام في السعر المنخفض.
مبدئياً يا باشا ربنا يكرمك وتركب النجمة
بس ما ينفعش تدخل فى قسم مرسيدس تقلل من عربيات مع أعضاء كتير فى القسم هنا حتى لو فيها اللى فيها وتقول عربيات ملهاش تلاتين لازمة ده لو حد راكب سيات مش هيقبل تقلل من عربيتو كدة
وانا معايا ال 190 و يبدو انك متعرفش عنها كتير العربية دى فعلاً ممكن تكون فشلت فى مصر بس فى المقابل العربية دى برا كانت مكسرة الدنيا وقعدت تنزل 10 سنين و بأصدارات ومواتير لا نهائية 190,190e, 190e evo1,190e evo2 ومواتير من 1800 الى 3600 سى سى وعاما العربية دى هى والزلموكة اللى نجحت فى مصر بأكتساح حاجة واحدة وأى حد معاه العربية دى او الزلموكة عارف كدة كميكانيكا الأتنين واحد وبتنزل فيها كل الأوبشنز اللى تيجى على بالك من البور ستيرنج للأير باج
ال 190 منجحتش فى مصر عشان ثقافة الشعب ومفهومه ان المرسيدس لازم تكون عربية كبيرة و أوبها ودى كانت أول عربية مرسيدس بالحجم ده فا مكنش ليها شعبية فى مصر خالص واللى أنت متعرفوش أن ال 190 هى بداية ال سى كلاس لمرسيدس ولو أعتبروها فاشلة فى المانيا مكنتش هتسمع عن حاجة أسمها سى كلاس دلوقتى
يا ريت الناس تعرف قبل ما تحكم
ال CLA معرفش عنها غير أنها دفع أمامى وسعرها أقل من المعتاد عشان تحقق مبيعات بس مينفعش يتفال عليها عربية ملهاش تلاتين لازمة كفاية التصميم بتاعها والصالون فعلاً تحفة وفى النهاية مرسيدس عمرها مأصدرت عربية بالغلط ولا من غير داعى ولا لازمة
ما ينفعش ليه يقول مالهاش تلاتين لازمة. مش فاهم سيادتك؟ الراجل يقول رايه بصراحه طالما ما غلطش في شخص احد الاعضاء. و الاعضاء ليهم كامل الحق يردو عليه و بحيادية و منطق و من غير تجريح بردو.
بخصوص ال cla حضرتك شايفها فخمة و بالذات من جوة و انا رايي زي حضرتك لكن مثلا انا شايف ان ضهرها زي العربيات الصيني بالظيط. رايي كده ده ما يزعلش سيادتك و الا ملاك المرسيدس في اي حاجة.
يقول رايو علي عيني وعلي راسي بس من غير تجريح زي منتا قولت لما انت تبقي راكب عربية ومبسوط بيها ودافع فيها زي ال cla ويجي حد يقولك دي عريية ملهاش تلاتين لازمة ده شئ عادي ما يضايقش!!
انا شايف ان النقض ممكن يبقى باسلوب افضل من كده ويقول العربية فيها واحد اتنين تلاتة بموضوعية وهي وجهات نظر يمكن انا غلطان
الكلام دة مش مظبوط أوي .... في عربيات كتير كانت فاشله من مرسيدس زياقتباس:
المشاركة الأصلية كتبت بواسطة MIZ0O0O0VIC
إل A كلاس ، إل B-كلاس ، إل GLK
العربية دي فشلت وباعت فقط عشان النجمة
والدليل إن مرسيدس حاولت تعديل في أشكالهم ومنفعش وفي الأخر غيروا التصميم جذريا عشان يقدروا ينافسوا (قارن بين GLK القديمة وأل GLC ٢٠١٦ علي سبيل المثال )
عموما مرسيدس تعبان في إل 4x4 ، المرسيدس حلو أوي في إل E كلاس وبعديهم إل C (رغم إن البيمر إلثري سيريز أحلي ) وال S (رغم إن أودي A8 أحلي وأتعبهم بيمر سفن سيريز )
عموما الألمان ملوك العربيات وميعرفش حلاوة الألماني غير اللي ركبه بس دة مش معناه أنهم مبيغلتوش هما بيغلطو بس بيقدروا يفضلوا علي القمة حتى لما يغلطوا
اقتباس:
المشاركة الأصلية كتبت بواسطة Anxs111
اتفق مع حضرتك في أجزاء كتير... وأختلف معاك بردو في أجزاء تانية
أنا شايف المسألة من منظور تاني..
أغلب ماركات العربيات الألمانية معمولة لفئة معينة من الناس (مرسيدس - BMW - أودي - بورشه).. الفئة دي عندها القدرة على تدفع وتلاقي اللي هي عايزاه في العربية.
وبالتالي.. العربية الألماني لازم يبقى فيها خصائص معينة مش موجودة في العربيات العادية... فخامة .. رفاهية.. قوة.. أداء .. ثبات على الطريق.
دي نفس الفكرة الموجودة في أي ماركة غالية ... حضرتك بتدفع وتاخد اللي انت عايزه..
وبالتالي بقى السوق الألماني والدماغ الألمانية في صناعة السيارات هي كده... أدفع وآخد كل حاجة.. لإن ثلثين الماركات الألمانية ماركات للأغنياء فقط .
ليه بقى عربيات زي الـA-class والـB-class والـGLK ما نجحوش... لإنهم ما حققوش المبدأ بتاع الرفاهية المعروف.
حضرتك بتدفع ثمن الماركة الغالية بس بتاخد عربية صغيرة وباندفاع أمامي وثبات ضعيف .... يعني زيك زي أي عربية عادية تانية بس عليها علامة مرسيدس...
أنا بصراحة شايف بداية المشاكل في سمعة مرسيدس عموما من ساعة ما بدأوا ينزلوا فئات كتير من عربياتهم وكإنهم عايزين ينتشتروا زي تويوتا مثلا !!! مع إن الميزة الأساسية هي عدم الانتشار!!!
الفئة A و B و R و V و CLK و GLK و كل عربياتهم اللي آخرها K... ونفس الكلام أقدر أقوله على BMW 1 وBMW X1 وأودي A1 وأودي Q1.
من وجهة نظري .. اللي بيشتري العربيات دي بيبقى حاجة من اتنين:
إما واحد لسه في الكلية مثلا بس من عائلة ميسورة وعايز عربية مرسيدس.. فالعائلة بتشتريله حاجة على قده لحد ما يتخرج..
أو إما واحد نفسه في المرسيدس الأصلي (زي اللي عايز يجيب أديداس أصلي) وما صدق لقى حاجة في حدود إمكانياته المادية...
أما نقطة إن الألمان ملوك العربيات فدي أنا مش معاك فيها بصراحة... لإن فيه دول تانية بتعمل ماركات فخمة بردو وتقدر تنافس الألماني بسهولة... والأمثلة على كده كتيرة.
هتقوللي إن اختراعات السلامة بتنزل ألمانيا الأول...
أكيد طبعا... ماهو ما ينفعش تبقى ألمانيا هي الدولة الوحيدة في العالم اللي عندها شبكة طرق ما فيهاش حد أقصى للسرعة وتكون متأخرة في مسائل السلامة... دي كده ماهياش اختراعات للرفاهية أو إبراز العضلات... دي ضرورة بتفرضها ظروف دولة.. بما فيها القناعات الألمانية والقوانين داخل ألمانيا وأوروبا عموما.
وفي الحتة دي بالذات.. أي ماركة عربيات غير أوروبية عايزة تدخل أوروبا بتعمل ألف حساب لسمعتها هناك مخصوص علشان الطرق في ألمانيا ومعايير السلامة في أوروبا عموما وبالتالي بتعمل عربيات بمواصفات خاصة لأوروبا بس .. ومش بنشوفها في منطقتنا إلا إذا كانت العربية الآسيوية أو الأمريكية دي مصدرة لينا من أوروبا.
دي وجهة نظر شخصية وأكيد فيه ناس تانية مختلفة معايا.
...
الألمان مش بيتعمدو يعملو او يخصصو إنتاج للعربيات الفارهة .....هما بيعملو عربيات بتطلع فارهة
كدة الكلام فيه أجزاء صح وأجزاء غلطاقتباس:
المشاركة الأصلية كتبت بواسطة borio1704
عدم وجود مبدأ الرفاهية هو سبب فشل بعض الموديلات فعلا زي إل A وال- B-كلاس
هو حقيقة مش عدم الرفاهيه ، هو أكتر يعتبر الإسترخاص في الكواليتي ودة منفعش مع عملاء متعودين علي ستاندرد معين . لأن لما مرسيدس عملت كدة هي لا فضلت في مستوي النجمة ولا في ميزة السعر لعربيات تانية زي جولف مثلا اللي حتي هذه اللحظة هي ملكة فئة الهاتشباك .
في عربيات كتير فخمة ومفيهاش استرخاص وفشلت بسبب التصميم الكئيب والأداء السيء ، زي إل Glk دي مش عربية رخيصة أبدا بس تصميم البوكس شيب فشل فشل ذريع وأدائها علي الطريق لا يقارن بل X3 ولا Q5 اللي برغم من عدم حبي ليها ألا أنها أكتر حاجة بايعة فيهم (Q5 ) في الفئة دي .
عموما مرسيدس في السيدان ناجحة جدا لكن في فئة إل SUV تعبانة جدا ودة عن تجربة (Glk وبرضه ML ) ودول في رأي عربيات تعبانة خصوصا عند مقارنة ML مثلا بعربيات زي X5 و- Q7 هتلاقي الفروقات كبيرة في كل حاجة .
فعلا معاك في نقطة إن مرسيدس لما نزلوا بفئات كتير دة مكانش في مصلحتهم .
في بقه عربيات حضرتك ذكرتها علي أنها مش في جودت الألماني المعتادة, بلعكس العربيات دي راقية جدا وأداها حلو جدا ، هي ممكن تكون مش بياعة في بلاد معينة عشان لسة متعودوش عليها فقط لا غير زي A1 . X1 ، أنا معرفش إن في Q1 فمقدرشي أحكم عليها .
العربيه اللي تعبانه في رأيي ومستواها مش إد كده هي إل BMW 2 series touring ، دي نفس سياسة مرسيدس في إل B-كلاس وعيب إن الألمان يعملوا عربيات كدة أصلا
الألمان ملوك العربيات بلا جدال ، ممكن تلاقي ماركات تانية ليها موديل أو اتنين حلوين لكن أنا بتكلم عن سياسة تصنيع وثقافة معينه موجوده في كل العربيات اللي طالعة من بلد مش هتلاقي زي الألمان أبدا ...
اقتباس:
المشاركة الأصلية كتبت بواسطة anxs111
النقطة اللي عايز أوصلها إن الألمان ما اتعودناش نشوف منهم حاجة وحشة ﻹن أشهر ماركاتهم ماركات مخصصة للأغنياء... وأكيد انت لو معاك تشتري مرسيدس أو غيرها من الماركات الشبيهة فمش هييبقى عندك أي استعداد للتنازل... بمعنى إن دي طبيعة زبون العربيات دي.
إنما لو حصل واشتريت عرببة ألماني للمستهلك العادي فالمؤكد إنها مش هتفرق عن أي عربية ياباني أو كوري بتتباع في أوروبا.
راجع كلامي الأولاني مرة تانية من فضلك.
...