فى الحقيقه انا كنت حابب احط اللينكات كامله من اول مره .. لكن تحرجت من ذلك و لذلك وضعت 3 لينكات فقط
و لكن بعد التشجيع منك قمت بأستكمالها .. و ساحاول اضافه لينكات اخرى اذا سنحت الفرصه
تحياتى و اعزازى
عرض للطباعة
السلام عليكم ورحمة الله وبركاته
اولا احب اشكر كل من تفاعل مع الموضوع وخصوصا الاستاذ tasaka
كتكمله للموضوع , ححاول اوضح شويه معلومات عن موقع Amazon.com واللى يعد اكبر موقع تسوق عبر الانترنت.
***ما هو موقع امازون؟***
هو موقع يعرض منتجات مختلفه سواء كانت عنده فى الStock او بيعرض منتجات بائعين من خلاله, طبعا نظام الامان عالى جدا , ولو فيه مشكله مع البائع او المنتج بيتم التعامل مع المشكله علطول , ويا بيتم استرجاع المنتج او استبداله وفى بعض تجارب الناس تم اعادة ارسال المنتج مجانا للعميل.
فيه كلمه دايما حنشوفها فى موقع امارزن وهى Amazon prime ودى عبارة عن خدمه باشتراك سنوى حوالى 99$ , بتعمل تخفيضات على بعض السلع وفى اسعار الشحن داخل امريكا وسرعه فى استلام المنتج....
طبعا الخدمه دى مش حنقدر نستفيد بيها لان معظم الميزات للشحن داخل امريكا
-------------------------------------------------------
*****الفرق بين Amazon US & Amazon UK *****
يوجد من Amazon نسحتين وهى النسخه الاصليه الامريكيه https://www.amazon.com/
ويوجد النسخه الانجليزيه https://www.amazon.co.uk/
يوجد طبعا بعض الاختلافات بين الاتنين وهى:
1-المنتجات
فى طبعا بعض الاختلاف فى المنتجات والبائعين بين الاثنين ولكن مش الاختلاف الكبير.
2-العمله
ودى بقى نقطه مهمه , لان العمله المستخدمه فى النسخه الامريكى هى الدولار ولكن فى النسخه الانجليزى هى اليورو ,ولهذا لازم تاخد بالك انت على انه متجر وتاخد بالك من فرق العمله واللى حيأثر على السعر المكتوب للسلعه.
3-الشحن
طبعا النسخه الامريكى حتشحن كل المنتجات لامريكا وبعض المنتجات للدول المختلفه
النسخه الانجليزى بتشحن للانجلترا, وبردوا بعض المنتجات يمكن شحنها مباشرة لدول مختلفه.
4-طرق الشراء المتاحه
زى ما ذكرنا فى اول الموضوع ان عندنا اكتر من طريقه للشراء, الطرق كلها يمكن استخدمها مع امازون امريكا, ولكن مع امازون الانجليزى لا يمكن استخدام اخر طريقه وهى عن طريق وسيط , لان معظم المواقع الوسيطه تتعامل مع امريكا فقط.
-------------------------------------------------------------------------------------------------------------------------------
***نقاط التميز***
سؤال بيطرح نفسه, ايه اللى بيميز امازون عن بقية المواقع؟؟؟
فيه شوية نقط تميز امازون, وهى:
1-الاحترام
من خلال تعاملك مع امازون حتحس اد ايه الناس دى بتقدر قيمة العميل, ودى نقطه احنا فى مصر مفتقدنها بشكل كبير, من لحظة ما تعمل اكونت على امازون بتحس انك فى كيان جديد, تلاقي رسايل عن المنتجات الجديدة, لو بتدور على منتج يبعتلك على منتجات شبيها, لو فيه عروض على منتجات انت بتدور عليها يبعتلك, تحس كدا انه عايز مصلحتك.
ولو اشتريت منه مباشر(يعنى لو استخدمت اول طريقتين فى الشراء ) حتلاقيه بيبعتلك ايه رايك فى التغليف, يسألك عندك مشاكل مع المنتج , يطلب منك تقيم المنتج , لو قيمت المنتج يبعت يشكرك, ولو حد عنده سؤال على منتج انت قيمته يبعتلك السؤال ويسألك لو تقدر تساعد.
طبعا دا غير احترام العميل لو اشتريت منتج وطلع فيه مشاكل , وانا قريت كذا تجربه لاشخاص على الموضوع دا, حاجه كدا من الخيال.
فعلا تحس انك برنس برنس برنس.
2-الاسعار
بيقدم عروض اسعار حلوة جدا , وبيقدم عروض فعلا تستاهل.
3-توفر المنتجات
فيه منتجات مش حتلاقيها الا فى امازون , وفى حاجات بتاعة امازون نفسه زى تابلت وKindle وبتكون اسعارها حلوة.
4-الجوده
على الرغم من ان المنتجات بتبقى صينى ولكن بتلاقى جودتها عاليه, واللى بيبقى مش قد كدا بتلاقى تقيمه زفت, المجتمع هناك بيحترم اوى موضوع الجوده والخامه ولهذا مش اى منتج صينى ممكن يعيش هناك, لازم يكون زى جوده عاليه , يعنى حتى المنتجات التعبانه حتلاقيها احسن من اللى بتنزل مصر.
---------------------------------------------------------------------------------------------------------------------------------
***شوية نصائح للشراء من امازون***
-وانت بتشترى حدد اللى انت عايزه بالظبط قبل الشراء, لانك حتلاقى اختيارات كتير واختلافات طفيفه, فلازم تحدد انت عايز ايه بالظبط علشان متنجرفش بعيدا عن الهدف.
-لما تحدد اللى انت عايزة وتعرفه كويس , حاول تدور بنفس الاسم على الموقع علشان اكيد حتلاقى معروض باسعار مختلفه من كذا بائع فتقدر تختار السعر الافضل.
-قراءة التقييمات مهمه جدا جدا جدا , علشان تعرف لو فيه مشاكل سواء مع البائع او المنتج, وغالبا حتلاقى المنتج دا ليه review على اليوتيوب , حتاخد اسم المنتج وتروح تدور عليه فى اليوتيوب وحتلاقيه بنسبه كبيرة ,من اول فتح الصندوق بتاع المنتج لحد ما يقيم المنتج ويقول عيوبه وميزته وايه اختلافه عن غيرة من المنتجات الشبيهه.
- بعد ما اخترت المنتج وخلاص عرفت ان هى دى الحاجه اللى انت عايزها, ممكن تبص بصه على Aliexpress وتشوف لو موجود عندهم المنتج دا ولا لا, ولو موجود سعرة ايه وهل يمكن شراءة وشحنه مباشرة الى مصر ولا لا, دا حيوفر عليك طبعا فى الفلوس.
-ممكن حد يسألنى ...بخصوص اخر نقطه انا كتبتها....طيب لو انا لقيت المنتج فى Aliexpress طيب ايه خلانى ادور اصلا فى امازون, ما انا اشوف الاول فى Aliexpress؟
بص يا سيدى ...من خلال البحث فى الموقعين, لقيت ان البحث فى امازون اسهل واسرع من Aliexpress رغم تنوع البائعين فى Aliexpress ولكن الاختيارات المتاحه للبحث وسهوله البحث افضل على امازون, وبردوا زى ما ذكرت مش كل المنتجات بتبقى موجوده فى غير امازون, فممكن البدائل متعجبكش على Aliexpress وبردوا للجميع حرية الاختيار , ولكن انا بقول من وجهة نظرى وتجربتى.
-طبعا لو انت اول مرة تشترى , ومقلق وخايف, فالافضل انك تجرب بحاجه بسيطه سعرها ما يكونش عالى ومايكونش لها اهميه كبيرة, علشان لو مجاتش او ضاعت او حصل اى مشكله متخسرش كتير و متزعلش عليها , بس ان شاء الله مفيش حاجه حتحصل وحيوصلك المنتج بدون مشاكل.
- اختيار افضل طريقه للشراء, دا حيوفر معاك فلوس , بمعنى لو افترضنا ان انت عايز منتج والمنتج دا يمكن شحنه لمصر, فحضرتك تعمل مقرنه ما بين الثلاث طرق شراء اللى ذكرناهم فى اول الموضوع وتشوف انه واحده حتبقى افضل, طبعا الكلام حيبان صعب شويه فى الاول لكن مع تكرار عمليه الشراء حتقدر بعد كدا تحدد بسرعه انه طريقه الانسب بالنسبالك.
-وانت بتشترى من امازون مباشرة (يعنى لو استخدمت اول طريقتين شراء ذكرناهم) , خلى الدفع بتاعك بالدولار مش بالمصرى, لييييه, لان الRate بتاع امازون فى التحويل عالى , اعلى من Rate التحويل بتاع البنك عندنا, يعنى مثلا لو اجمالى المبلع 100$ , لو دفعت على امازون بالمصرى هو بيحسب حاليا الدولار ب 8.4 جنيه يعنى حياخد منك 100 *8.4 يعنى 840 جنيه مصرى, ولكن لو دفعت بالدولار فهو حياخد ال100$ والبنك حيحولك هو الدولار ب 8 جنيه يعنى حتدفع 8*100 = 800 جنيه, كدا فى فرق انت وفرته 40 جنيه.
اتمنى ان الاضافه دى تكون مفيده , واسيبكوا مع شوية فيديوها توضيحيه عن طرق الشراء من امازون ارجو انها تعجبكوا.
https://www.youtube.com/watch?v=cgN7GwQF9V8
https://www.youtube.com/watch?v=mqVcxFOvJOM
https://www.youtube.com/watch?v=67EGcPHBFSc
https://www.youtube.com/watch?v=BStWL6DwtQk
https://www.youtube.com/watch?v=ma1FNQEBVk8
شكرا على الموضوع الرائع
فى حد اتعامل مع
wish - shopping mad fun
موضوع اكثر من رائع احييك عليه كتر الف خيرك
اطلب من حضرتك ياريت بس تنقلنا خبرتك او خبرات احد الاعضاء فى موضوع الشحن والجمارك
سواءموقع على اكسبريس او امازون
انا بس النقطه دى اللى مش فاهمها اوى
بفرض انى اشتريت تمام من على احدى الموقعين والفيزا موجوده
الفكره فى مصاريف الشحن والجمارك هل فى موضع بيشحن ديركت من غير وسيط زى ادفعلى
خاصه ان فى ناس اشتكت منهم كتير الاونه الاخيره
فهل هناك بديل عن ادفعلى؟!!
وانهى افضل من حيث السعر والجوده والسرعه والامان
امازون ام على اكسبريس
مستنى ردك واسف لو بتقل عليك والف شكر على موضوعك وسعه صدرك
احب اشارككم عشان تعم االفائدة انا تجربتي كانت مع ادفعلي من 2013 لما بداو كانو حاجة ممتازة حتى خدمة العملاء و الاوردرات كانت قبل 21 يوم و بعضها كان عند باب البيت اقل من اسبوعين و كان بيعوضو علطول لو حاجة جت مكسورة بيرجعولك الفلوس كاملة بس زي مابتقول الفترة الاخيرة بقت التجربة سيئة تاخير شديد في الاوردر لدرجة اوردرين قعدو 50 يوم في الجمارك بس. اما بالنسبة لاشتريلي عمري ماكلمتهم على اوردر ولا رفعت سماعة التليفون اكلمهم لما بتعمل معهم اوردر يبعتولك ايميل ماتكلمناش قبل شهر و عمرها ماتخرت عن كده بس هما اغلى من ادفعلى شوية بس الميزة كل الحاجات اللي ادفعلى بتقول ممنوعة تدخل مصر هما بيجيبوها و عمرهم مارفضو اوردر انا اعرف انهم في اسكندرية بس مش عارف ليه اللي ممنوع يدخل جمارك القاهرة بيعدي هناك حتى مرة كنت عايز بذور نباتات زراعية ادفعلى قالت انها ممنوعة وو بتتحجز في المطار و سالت ناس حاولو يجيبوها بشكل مباشر بدون وسيط بتقف و تتصادر و قالولي عايزها عديها مع حد نازل جي من بره يشتريها على السعودية مثلا و ينزلك بيها بس اما جربت اشتريلي للتجربة بس جابوها بس بسعر وحش جدا تخيل كيس بذور تمنه لايتعدى 3 دولا على كل كيس 20 دولار مصاريف تخليص جمركي انا جربت كيس واحد و جابوه عادي
طيب يا جماعه سؤال معلش لو اشتريت من امازون مباشره للشحن في مصر هل شركة الشحن هتتكفل مصاريف الجمارك و هتستخلص كل حاجه و لما يجوا يسلموني الحاجه هيخدوا مني سعتها المصاريف ولا الموضوع بيبقا ماشي ازاي ؟
لو عاوز اشتري مكملات غذائية ( بروتين) و وزن العبوة ٤.٥ كيلو....... و هي عبوة واحدة بس.
هل حينفع تعدي من الجمارك و إلا حيقولوا ممنوع؟
و هل حيحسبوها استخدام شخصي و تعدي و إلا حيجمركوها؟
و جمرك المكملات الغذائية كام؟ هل ١٠٪ فعلاً.
حلو الموضوع اوى تسلم