تقرير و انطباع عن رينو لوجان بعد ٣٠.٠٠٠ كم بعد سنة و نص
بسم الله الرحمن الرحيم السلام عليكم و رحمة الله و بركاته بقالي كتيير مختفي بالتقارير عن العربية فقولت انزل تقرير عن العربية بعد سنة و نص مشيت فيهم ٣٠.٠٠٠ كم متضمن انطباعي عن العربية و المشاكل اللي وجهتني و حلها العربية لوجان ٢ موديل ٢٠١٥ كومفرت ماشية ٣٠.٠٠٠٠ كم و كسور هتكلم عن العربية نقطة نقطة و وجهة نظري الشخصية - الشكل الخارجي : http://nileup.com/up/uploads/nilemotors_14557163861.jpg مقدمة العربية هجومية ليها برستيجها بتعجبني و هي ماشية وحش داخل عليك لكن تشوف شكل الشنطة بيبقي هيغمي عليا مع ارتفاع العربية ورا و الخلوص الكبير اللي بين الكاوتش و البودي ساعتها مش هيغمي عليا بس لا ده انا هتشل بس النقطتين دول حلهم بسيط اولا الارتفاع اظبط الكاوتش كما هو موصي به ٣٢ قدام و ٢٩ ورا هتلاقيها اتعدلت شوية و فيه توازن و الحل التاني جنط اكبر او كاوتش بروفايله اعلي بس هيكون ع حساب الثبات اما الشنطة هو سبويلر صغير عبارة شفة كده بتظبط شكل الشنطة نيجي للتصميم اللي اختلف عن القديم و البومييه اللي حصل مخلي شكلها حلو بس مش شايف ايرودينامك في التصميم بس مش هتبقي محتاجها لانها في الاصل عربية مدينة و انا جبتها كعربية للمدينة في المقام الاول حاجة تانية بالنسبة الشكل كانت العربية محتجاها و هو الحلية النيكل اللي راكبة ع الفوجات زي اللي بتنزل برة و بدور عليها مش لاقيها هنا شكلنا ممكن نجيبها شحن من برة و نركبها الاكصدام اللي ورا كان محتاج شوية شغل و ينزل شوية مع تظبيط السبويلر الصغير اللي قولت عليه العربية ديه اتظبطت خلاص الا لو حابب تضيف حاجة كده خلصنا من الشكل الخارجي - الشكل الداخلي : http://nileup.com/up/uploads/nilemotors_14557164851.jpg تصميم التابلوه و الابواب حلو و بسيط مش معقد بس موضوع عصاية الفتيس البعيدة شوية كنت اتمني تبقي اعلي و اقصر و حلها اني بنزل الكرسي و اقرب من الدريكسيون شوية لكن برجع في كلامي عشان اراعي بعد الامان عن الدريكسيون فبرجع لنفس النقطة تاني زرار الانتظار بعيد شوية كنت اتمني يكون اقرب لان الواحد بيستخدمه كتير عند المطبات او التوقف المفاجئ مازلت متضايق من موضوع زراير الازاز الخلفي في التابلوه مش في الباب جنبي زرار الكلاكس اللي في الدراع عاجبني بصراحة بس ده لو ماشي في طريق مستقيم لكن عشان الف يمين او شمال و ادوس عليه مبعرفش و بتجنن درج التابلوه صغير اوي بالرغم ان التابلوه حجمه مش صغير و كنت اتمني لو كان طول التابلوه يقل شوية و يتيح وسع للصالون لكن معرفش هل التصميم معتمد ع الامان ام مجرد للشكل و التصميم العام موضوع البلاستيك السيلفر اللي راكب ع الابواب مجنني بصراحة عشان ازعاجه و عدم ثباته و زنه http://nileup.com/up/uploads/nilemotors_14557164852.jpg احلي حاجة عاجباني غير الوسع تصميم الفرش بالرغم انه قماش مش جلد بس عاجبني لدرجة اني معملش فرش تفصيل بس الموكيت مستفز و عايز اركب فرش جلد للارضية عند جينز كار عشان مجرب شغله كتير من سنين بس المشكلة في الوقت مش لاقي وقت اروح اعمله فالموكيت اتبهدل اخر بهدلة الساوند سيستم في العربية كويس و مش محتاج تعديل ع الاقل بالنسبة لي نيجي للشنطة بصراحة ما شاء الله واسعة و بتشيل بس يعيبها تقفيل الفوانيس الخلفية عشان مفيش تقفيل اصلا بس حلها بسيط تفصلها غطا جلد بس انا هفصل و اصب لها غطا بلاستيك خلاص هيبقي جاهز و هبقي انزلكم تقرير بيه ان شاء الله الحوض و تقسيمته كويسة و تحس ان لو حد حب يشتغل في العربية هيشتغل بسهولة بس نيجي برده لمشكلة التقفيل زي الفوانيس الخلفية المرة ديه الضفيرة نفسها سلوكها متسابة كده بشكل مستفز بصراحة و ديه حلها تجيب خراطيم تقسمها و تغطيها او يتفصل لها علبة و خرطوم يغلف الاسلاك برده بس عاجبني انهم نزلوا الكبوت بمساعد يرفعه كده تقريبا خلصت العربية من الداخل - أداء العربية : بالنسبة التسارع فالعربية عادية بالنسبة شخص زيي بعتبرها بطة بسبب وزن العربية مع موتور ١٦٠٠ كامة ٨ صمام و طبعا عارفين كام هورس باور و العزم فلو الموتور ع بدن اخف كان هيبقي افضل العربية ديه محتاجة الموتور بتاع الاوتو ع الفتيس المانيوال هتلاقي وحش معاك بس طبعا زي مقولنا في الاول ديه بنسبة كبيرة عربية مدينة فمتحلمش باكتر من كده منها اكتر شئ بيستفزني صوت الموتور العالي و بلية الفتيس المعتادة في كل موديلات اللوجان المانيوال يعني لو صوت الموتور فيه نعرة رياضية كان هيبقي مقبول بالنسبة لي لكن جرار زراعي عاملي صداع و عشان نوصل للنعرة ديه ليها حلين اسهلهم و افضلهم فلتر هوا رياضي بلاش تلعبوا في الشكمان و حد يقنعكم بالفكرة الفاشلة اللي اسمها ديفيل طبعا عزل العربية اتحسن عن الشكل القديم و ده اللي مهون الصداع شوية بتاع الموتور و الازعاج برة لما بقفل الازاز و عجبني ان العربية مصفحة من تحت و ده امان للموتور من تحت بالنسبة للعفشة للاسف العفشة ناشفة لدرجة لا تناسب شوارعنا و مطبتنا لما بمشي في شوارع مكسرة و مطبات بالرغم انه نادرا بس بتعب جدا بسبب العفشة و نشوفيتها الميزة ان العربية عالية فمفيدة في المطبات و ايام ابشوارع لما غرقت بسبب المطرة و بفكر في المستقبل ان شاء الله اعمل تعديل لنوع المساعدين يهدي النشوفية ديه شوية بالنسبة الثبات زي مقولت سابقا العربية عالية عن الارض مع عدم وجود ما يساعد ع ثبات العربية فثباتها عادي و محدش يفكر يتهور بيها ع سرعة عالية عشان ربنا يسترها معاك و طبعا الباور زيت و تقيل بزيادة فده مفيد ع السرعات العالية للأمان بالنسبة للفرامل فهي ما شاء الله كويسة في التماسك و بتكون افضل لو غيرت الكاوتش لكاوتش افضل من اللي بينزل ستوك و بصراحة اسعفتني كذا مرة بس يعيبها التيل اللي بيخلص بسرعة اللي بيخليها تقعد معايا اكتر من ناس كتير ان اغلب طرقي سريعة مبدخلش بيها وسط البلد الا نادرا عشان بسيبها مبنزلش بيها تحت عشان الواحد يرتاح من حوار الركنات و الزحمة و الحمد لله ع نعمة المترو و باصات الرحاب و مدينتي و شركات الليموزين زي اوبر و كريم احيانا و يبعد عنا الميكروباصات و التاكسيات و قرفهم و استغلالهم و تعاملهم السئ بس للعلم ان العربية ناشفة شوية في السواقة مقارنة بباقي العربيات يعني لو نازل من كوري عامة او ياباني هتحس بفرق الشاسع في نعومة العربية لصالح الكوري و الياباني - بالنسبة للتوكيل و الصيانات انا بعتبره من التوكيلات الكويسة و خاصة انه لو فيه حاجة محتاجة تتغير في الضمان بتتغير عالطول بدون مماطلة ع الاقل ده اللي حصل معايا اكتر من مرة بس ليا تعليق ع التوكيل في طول وقت الصيانات لان اي صيانة بروح ٨-٩ الصبح مبمشيش قبل الساعة ٣-٤ العصر يعني يوم بيضيع و الواحد بيروح بالعافية نظرا لان مفيش وقت تاني حاجة حكاية الغاء صيانات دورية ٥.٠٠٠ و ١٥.٠٠٠ و .... و ..... الفترة ديه نظرا لاهمية الصيانات ديه من فحص العربية خلالها و كان فيه ورقة متعلقة هناك مكتوب فيها ضرورة الصيانات ديه و عدم متابعتها مع التوكيل او مراكز الصيانة هتخرج العربية من الضمان طب ايه الوضع دلوقتي يا اساتذة ؟؟!! اما قطع الغيار و الصيانات و اسعارها المتغيرة و مرة عملت مشكلة بسبب ان العميل اللي بيدفع جنبي نفس صيانتي و التيل و لقيته بيدفع اقل مني و السعر اللي اتقالي و انا بحجز كان حاجة تالتة طب ازاي ؟؟؟!!! و عدلوها و اعتذروا و دفعت زيه و ده حصل معايا مرتين و في نفس الوقت شايف ان الصيانات و بعض قطع الفيار سعرها عالي شوية و اخيرا و ليس اخرا ان فيه بعض المهندسين بيستخفوا بعقلك و يعاملوك ع انك جاهل لا تفقه شئ في العربيات لعدم الاهتمام ميعرفوش ان الواحد كان بيعمل تقارير عن العربيات اصلا اول ما تنزل و كويس ان عددهم قليل جدا و مع ذلك اغلب اللي اتعاملت معاهم من مهندسين هناك بيحترموا عقلك و يتناقشوا معاك و المناقشة بتكون مفيدة للجميع و هم معروفين هناك و لسه ناوي ان شاء الله اجرب مركز فرينش موتورز لاني لقيت كله بيشكر فيه و مبيقعدوش وقت طويل و في نفس الوقت بيني و بينه دقيقتين و اتعاملت معاهم مرة في فحص سريع و كان الاستقبال و التعامل كويس المهم يكونوا كده في الصيانات برده بالنسبة المشاكل اللي وجهتني : - قطمة دريكسيون و تم تغييرها في الضمان - مساعد و تم تغييره في الضمان - اويل سيل كرنك خلفي و تم تغييره في الضمان و ربنا يستر ع الامامي - كوبلن كامل و تم تغييره في الضمان - دراع النور و الكلاكس بيعلق من وقت للتاني و كل مرة يعملوه و يرجع تاني بعد فترة و لسه متمش تغييره - بوابة ريسايكل لسه متمش تغييرها و فيها بيات للعربية اسبوع - و فيه زيت ع علبة الباور و لسه هنشوف ايه قصته الصيانة الجاية - تنفيس الشكمان بشتكي منه كل صيانة اخر صيانتين يحلوه و يرجع ينفس تاني بشكل اقوي لما اتجننت راكب عربية منفسة اجدعان طبعا موضوع الحرارة اللي بتطلع ع الواحد من تحت التابلوه قصتها معروفة و حلها بس ما علينا بتنفع في الشتا مش فاكر كان فيه حاجة تانية ظهرت و لا لأ بس كفاية كده أصلها ارزاق و انا مبخت - طب العربية محتاجة ايه و بتكلم عن نفسي لو حد عنده اضافة يتفضل - محتاجة سبويلر صغير ع الشنطة زي اللي بيركب ع الـ F30 - ممكن اكصدام خلفي فيه شوية شغل يناسب الاكصدام الامامي و تصميم العربية - حلية نيكل في الاكصدام قدام حوالين الفوج لايت - تغيير نظام الاضاءة كله الي ليد او هالوجين ابيض و ممكن تعمل نظام اضاءة كويس في Tunning mania - جنوط اكبر درجة مع مراعاة المقاسات و الوزن لعدم التأثير ع العفشة او الابقاء ع المقاس الحالي مع تعديل الكاوتش بمقاس اعرض درجتين و ارتفاع اقل درجة - تغيير الكاوتش الستوك بنوع اعلي زي بريدجستون و نقشة مناسبة هتحسوا بفرق شايع و املوا نيتروجين من بريدجستون نفسهم هو اكتر مكان يثق فيه في اني املي نيتروجين من عنده او اظبط زوايا - و بمناسبة تغيير الستوك لو طلعت من الضمان او خلص جرب تغير لزيت كاسترول او امسويل و شوف الفرق و كذلك افضل عن نفسي تغيير زيت الفتيس ع ٥٠.٠٠٠ او ٦٠.٠٠٠ كم بنوعية نضيفة برده نفس اللزوجة - تغيير المستعدين لمساعدين زيت ع غاز - طقم بارات Front strut bar Rear upper & lower strut bars Side bars اما لو قلبك يطاوعك تفك الرفارف و تركب fender bar لو متاح عيش حياتك بس انا معرفكش - و ممكن اللي حابب فلتر هوا رياضي يبقي تجيب فلتر يكون replacement بلاش universal و خلافه طالما متعرفش التأثير او تعمل تعديل ع كومبيوتر العربية لنسب خليط الهوا و البنزين عشان متأثرش بالسلبع الاداء و استهلاك البنزين او تريح نفسك و تغير الفلتر الستوك كل ١٠.٠٠٠ هيفضل الاداء كويس - موضوع البوجيهات لسه ببحث فيه و مستقرتش ع حاجة بخصوصه لحد دلوقتي و عامة الحالي كويسين - فرش ارضية جلد ده مهم جدا مع الشنطة برده بجانب فرش للكراسي للحفاظ ع الفرش الستوك و نصيحة فرش الكراسي يكون تفصيل مش كسوة عشان متندموش و عن تجربة افضل فرش تفصيل جربته كان من Jeans Car http://www.nilemotors.net/Nile/133983-a.html - تقفيل ضهر الفوانيس الخلفية و كذلك اسلاك الضفيرة في الحوض - عايز ازود عزل العربية شوية عن طريق اضافة طبقة ٧ مم او طبقتين ٥ مم لباد تحت عازل الكبوت و تحت فرش الارضية جلد طبقة ٧ مم او طبقتين لباد ٥ مم برده تحته و كذلك الشنطة ارضيتها و باب الشنطة برده و كان نفسي للأبواب طبقة بس قلبي مش مطاوعني افك فرش الابواب دلوقتي - تغيير الاريال الطويل بواحد اقصر ميزدش عن ٣٠ سم شكلا و اامن من الكسر عن الطويل انا شيلته في البيت اصلا عشان اتقرصت قبل كده - و اخيرا نفسنا باب الشنطة يتفتح من جوة و ديه حلها بسيط جدا كل اللي هنحتاجه ناخد المقاسات و الطول و نجيب السلك و الورد المناسبة و نوصل و نعدل السوست فتفتح لوحدها اما اللي هيسأل ع باب تانك البنزين هي ليها حل بس انا شايف انها كده أأمن و ده المغزي من تصميمها بالشكل ده عشان محدش ينسي العربية شغالة و يملي بنزين و ساعتها العواقب هتكون وخيمة - فيه بقي شوية تكات بسيطة ممكن تضاف مستقبلا زي وحدات رفع الازاز و يتوصل ع السنتر و باركينج سينسورز عشان اللي معندوش في الفئة بتاعته معتقدش محتاجة حاجة تانية من وجهة نظري و اخيرا في المجمل و بشكل عام العربية كويسة و شغالة و مش وحشة و مناسبة بشكل كبير لشوارعنا بس بالنسبة لي او بالنسبة لواحد بيركب او ركب عربيات مختلفة اعلي منها فالعربية كأداء عادية جدااا و ماشية مش توب يعني اما لو واحد نازل من عربية قديمة او اقل منها هيلاقيها كويسة جدا و في جميع الحالات محدش ينكر انها الافضل في فئتها من ساعة ما نزلت سواء الشكل القديم او الجديد بالرغم كل اللي ظهر لو حد ناوي يعمل فرش عند جينز كار او يغير نظام الاضاءة عن توننج منيا او يجيب كاوتش من بريدجستون فيه خصم لاعضاء نايل موتورز http://www.nilemotors.net/Nile/459996-a.html و ده كان تقرير لرينو لوجان ٢ ٢٠١٥ بعد سنة و نص من الاستخدام و اللي عنده استفسار يتفضل و انا ان شاء الله ارد عليه
