عاوز اشتري عربيه ممكن حد يسعدني

**modii** · 26-11-2008 01:58 AM

انا بفكر اشتري فيرنا اليومين دول بس في ناس بتقولي استني للسنه الجديده علشان الاسعار هتنزل كتير
بس انا مش شايف ان دا ممكن يحصل
ممكن حد يقولي ايه رايه في الكلام ده لان انا محتار

**amr22_00** · 26-11-2008 10:55 PM

أنا في نفس موقفك يا مودي
بس انا توكلت على الله و هشتري ان شاء الله اول 12
الاسعار واقفه مع ان الازمه بقالها شهرين اهو
لو انتا عاوز تستنى استنى لاول السنه الجديده مش اكتر من كده
وده رأيي الخاص طبعا
واكيد انتا كمان صلي استخاره و ربنا يوفقك ان شاء الله

**engwalid** · 28-11-2008 04:15 PM

فيه ناس بتقول السيارات هترخص علشان الازمه الاقتصاديه وحالة الكساد اللى بتزيد فى العالم وإنخفاض مبيعات الشركات المصنعه للسيارات فالشركات دى هتحاول تروج لسياراتها عن طريق خفض الاسعار.
وفيه ناس بتقول السيارات هتغلى علشان الشركات المصنعه مع تخفيض انتاجها لازم ترفع السعر علشان تحافظ على ربحها وتقدر تستمر.

رأييى الشخصى إن كل ده الله أعلم بيه ومحدش يقدر يحسم الموضوع ده. يعنى مين يعرف الدولار والين واليورو هيبقوا بكام ؟

يعنى مثلا لو سعر السياره نزل وسعر العمله ارتفع ، أو سعر السياره إرتفع وسعر العمله نزل ، هتبقى النتيجه اسعار ثابته تقريبا.
ولو سعر السياره نزل وكمان العمله سعرها نزل هتبقى الأسعار فى الأرض , ولو سعر السياره ارتفع وكمان سعر العمله ارتفع هتبقى الاسعار نار.

باختصار أكبر تأثير على سعر السيارات هو سعر العملة ولا يعلمه الا الله.
ومثال على عدم سهولة توقع السوق سعر الذهب فى الفتره الاخيره اكبر محلليين واقتصاديين فى العالم قالوا سعره هيستمر فى النزول واللى حصل العكس فالجرام زاد حوالى 15 جنيه فى خلال الاسبوعين الماضيين.

رأييى إن كل واحد يشوف مصلحته فين يعنى لو محتاج سياره ضرورى يتوكل على الله ويشترى دلوقتى ولو مفيش إحتياج ضرورى ليها يحوش القرشين اللى معاه مش علشان اسعار السيارات هتتغير او كده ولكن لأن فيه أيام جايه محدش عارف شكلها ايه.

على فكره انا مش تاجر سيارات علشان محدش يفتكر انى بشجع الناس على الشراء لمصالح شخصيه ولكن دى طريقة تفكيرى واللى أنا فكرت بيها لنفسى ودلوقتى بدور على سياره اشتريها.

والأهم من كل ده التوكل على الله واليقين بأنه لايعلم الغيب الا الله والاجتهادات والتحليلات فى الايام دى صعبه علشان السوق متلخبط عالميا.

وأسف للإطاله .. وتحياتى للجميع ..