بالونة في جانب الاطار - مشكلة الجنوط السبور

**hosamfares** · 01-03-2016 09:22 AM

طبعا بتواجه كل العربيات الهايلاين بجنوط سبور ان جنب الكاوتش الصغير نسبيا يؤدي الى ظهور بلالين مع اي نقرة خفيفة و طرقنا عامرة بها ... و لما تظهر في عربيات جديدة مكملتش 10 الاف كيلو بتبقى مشكلة و بيبقى صاحبها مش عارف يتصرف ازاي و خصوصا لو اكتر من اطار
مش معقولة انه يغير اطار جديد كل 5000 كيلو مثلا

و مستحيل تجنب جميع النقر و الحفر في طرقنا
و طبعا التوكيلات بتأمن نفسها و مبتعترفش بانها مسؤولة عن اختيار اطار يناسب الطرق المصرية و يناسب تماما طبعا مواصفات السيارة نفسها من وزن و سرعة

الموضوع ده معمول لكل حد حصل معاه ده مع اي عربية من اي نوع يقول مواصفات الكاوتش اللي عمل كده و يقول اي كاوتش جابه او سمع من معارفه انه ظهر فيه بلالين و ايه الانواع اللي طلعت محترمة و معملتش بلالين

**hosamfares** · 01-03-2016 09:23 AM

و هأبدأ بنفسي ان هوندا سيتي هايلاين
كاوتش المشكلة هو
bridgestone turanza er370 83H 185/55R16 تايلاندي

**Mecha** · 01-03-2016 03:05 PM

الاطار المناسب للطرق والسواقه المصريه نسر سموحه بتاع زمان ، باسبكت رشيو عاليه وداخلي فيه و١٦ راق فيه و مداس خشن قباقيب علي جنوطه حديد صلب.هو دا اللي التوكيلات لازم تركبه ويعيش ويستحمل النقر والدحادير وخبط الرصفان.

**zacklat** · 20-03-2016 03:22 PM

انا معايا ميجان 2016 والعربية عامله 1000 كيلو
واخدت نقره في طريق السويس وعملت بالونه
الكاوتش كونتننتال 205/55/17
والفرده عامله تقريبا 2000 جنيه

**al_manara** · 20-03-2016 09:54 PM

اي نوع هايعمل بالونة مادامت الحفرة جامدة
والكاوتش 55 او اقل

**Mohamed Desoky** · 20-03-2016 11:23 PM

المشاركة الأصلية كتبت بواسطة mecha

الاطار المناسب للطرق والسواقه المصريه نسر سموحه بتاع زمان ، باسبكت رشيو عاليه وداخلي فيه و١٦ راق فيه و مداس خشن قباقيب علي جنوطه حديد صلب.هو دا اللي التوكيلات لازم تركبه ويعيش ويستحمل النقر والدحادير وخبط الرصفان.

السلام عليكم ورحمة الله وبركاته كويس ان فى حد فاكر النسر شركه كانت ناجحه وادمرت فى عهد المخلوع ياخساره على شركات اتباعت برخص التراب وكله بلقانون المهم انا بنسبالى جربت الهانكوك احسن كاوتش جربته

**svneleven** · 21-03-2016 05:01 AM

المشاركة الأصلية كتبت بواسطة mohamed desoky

السلام عليكم ورحمة الله وبركاته كويس ان فى حد فاكر النسر شركه كانت ناجحه وادمرت فى عهد المخلوع ياخساره على شركات اتباعت برخص التراب وكله بلقانون المهم انا بنسبالى جربت الهانكوك احسن كاوتش جربته

205/55r16 هانكوك في الانترا 2012 عمل معايا بالونه. المشكلة مش في الكاوتش. المشكلة في الطرق الزبالة بتاعتنا.

**pepo2011** · 21-03-2016 08:28 AM

طبعا مشكلة الطرق اساسية بس برضو الكاوتش عليه عامل يعني Run Flat والمقاس والابعاد لابد ان تضعها في الاعتبار وطبيع الطرق اللي بتمشي عليها يعني هل سفر علي طريق مسفلت كتير ولا مدقات وتراب وحفر لازم تاخد بالك وانت بتشتري الكاوتش طبعا الناس بتفرح بجنط اسبور و16 و17 ومش بتاخد بالها من العوامل دي انا الحمدلله ربنا نجاني من حادث اكيد بسبب البالونة دي لانها فرقعت فورا بعد الحفرة
الفولدا راكب معايا كويس بقالة فترة وركبت مومو كويس برضو والاهم انك تشتري الكاوتش من عند واحد موثوق فيه وبيفهم يدلك عالصح وتاخد بالك من تاريخ الانتاج والتخزين جداااااااااااا

**hosamfares** · 23-03-2016 09:56 AM

المشاركة الأصلية كتبت بواسطة svneleven

205/55r16 هانكوك في الانترا 2012 عمل معايا بالونه. المشكلة مش في الكاوتش. المشكلة في الطرق الزبالة بتاعتنا.

عملت عند كام كيلو ؟
و ضغط الكاوتش كان مظبوط ع كام

دي الالنترا الشكل القديم ؟
لو تفتكر اسم النقشه ؟ هانكوك ايه ؟

**M A E** · 02-04-2016 01:27 AM

انهارده للأسف نزلت في حفره قطعتلي فردتين اليمين ..العربيه ريو هاتشباك 2015 و الجنط 17/45/205 و دي تاني مره تحصل ... العربيه عامله 13 الف كيلو المشلان من المقاس ده ب 1400 جنيه ...و مش موجود ...محتار جدا هل اغير الجنوط بقي عشان وجع الدماغ ده...أنزل بالمقاس يعني و لا أكمل و لا أجيب كاوتش كوري أو تركي سعره في حدود 500 أو 600 جنيه ...افيدوني افادكم الله :(